Joven Audian “Konfuzaun” AS Mak Lutu Ba Povu, Tansa JB Mate Iha Sela Detensaun?

banner 120x600

(Dili), Mudansa – Portavós Joventude Audian Ano Carvalho informa, sira sente triste no konfuzaun bainhira rona matebian José Bernardo mate iha sela laran, maski ema hotu hatene Autoridade Seguransa (AS), mak Lutu ba Povu no nasaun.

“Imposivel ami nia alin bele tara an, ida ne’e halo ami konfuzaun serake polísia ne’ebé kontrolu no piket halo seguransa iha sela detensaun ne’e ba ne’ebé mak ami nia alin bele tara an to mate,” dehan Portavos Ano ba Jornalista liu husi pres konferénsia iha Audian Dili, 03/09/2022.

Portavós Ano sujere, nia parte Husu ba Komandu Polísia Nasionál Timor-Leste munisípiu Dili atu fó serteza lolos ba Juventude Audian no família inklui ba públiku katak, loos duni ka lae matebian José Bernardo mate tara an?

“Husu ba Autoridade Seguransa (AS), favór ida sai hanesan lutu ba povu la’ós sai fali hanesan kro’at ba povu, tan ne’e Ami Juventude Audian husu Justisa ne’ebé transparénsia no loloos ba ami nia alin nia mate,” nia deklara.

Ano relata, Tuir kronolojia, iha loron 01 setembru 2022 membrus PNTL na’in 4 mai halo kapturasaun ba matebian José Bernardo mais ou menus oras tuku 12:00 meudia no Membru PNTL hirak ne’e rasik hato’o ba família matebian katak, Imi tau konfiansa ba Policia imi nia oan ne’e, ba iha kantór polísia ami prontu garante imi-nia alin nia vida no nia sei seguru iha sela kantór polísia hodi tuir prosesu normál.

hafoin membru PNTL hirak ne’e lori ba halo prosesu identifikasaun hodi detein iha sela polísia Kaikoli, Iha meudia tuku 02, matebian hetan vizita husi nia Inan ne’ebé lori almosu ba fó matebian iha sela Kaikoli komandu Dili.

“Tuku 07:20 kalan, alin matebian nia família ba vizita derrepente de’it ami hare karreta Ambulansia para hela iha estasionamentu edifísiu polísia nia oin, perguntas mak ne’e, tanba sá? ema ida mate la bolu uluk família maibé bolu uluk mak ambulánsia mai.

Portavós Ano informa, Juventude Audian ho família hare katak laiha lójika, tanba ne’e sira sente lamentavel no konsidera la razoavel ba José nia mate iha sela detensaun.

Nia akresenta, Se matebian José mate ho tara an, entaun família no Juventude Audian ezije atu loke kamera CCTV hodi hatudu faktus ba matebian nia mate no mós tenke investiga membrus PNTL ne’ebé piket iha loron ne’ebá husi komandante to’o nia membrus sira

“Karik tuir duni polísia sira dehan katak kamera CCTV avaria no taka malu ba kazu ida ne’e, Ami Juventude Audian deskonfia boot ba polísia sira, mak baku mate ami nia alin?” Ano argumenta.

Portavós Ano Carvalho afirma, bainhira kaptura juventude ou suspeitu ba iha sela detensaun husu atu labele halo torturasaun ka baku iha sela detensaun, tanba ne’e nia husu ba Parlamentu Nasionál no VIII Governu atu hatuur regulamentu ou Lei ida hodi regula membru PNTL ka se de’it, nune’e bele evita kazu hanesan la bele mosu tan.

Jornalista        : Ekipa MD
Editór                : Orlando Magno

banner 325x300