(Dili), Mudansa – Prezidente Republika Timor-Leste (PRTL), José Ramos Horta realiza enkontru ho Ekipa Nahdlatul Ulama Nusa Tenggara Timur (NU NTT), hodi ko’alia kona-ba oinsá atu hametin pás no estabilidade entre Timor-Leste no Indoensia.
Prezidente Repúblika Ramos Horta informa, nia parte konsidera NU NTT servisu di’ak hanesan motivasaun ida atu NU nafatin halo follow up ba servisu hotu liga ho toleránsia, Direitus Humanus no igualdade inklui pás no estabilidade.
“Ema hotu sei servisu hamutuk atu promove buat di’ak sira hodi garante moris hakmatek iha sosiedade liuliu Timor Leste no Indonézia atu bele tau iha implementasaun prátika di’ak iha fronteira hodi garante pás no estabilidade,” Dehan PRTL Ramos Horta ba jornalista iha Palasiu Prezidensial Aitarak laran Dili, Kuarta (17/08/2022).
Vise-Prezidente Konsellu Rejional NU husi Provínsia NTT, Ibrahim Arif relata, sira hasoru malu ho Prezidenti Repúblika Timor Leste José Ramos Horta, ho objetivu atu hakle’an diskusaun ne’ebé liga ho servisu NU nian ne’ebé atu kontribui ba pás no estabilidade entre nasaun rua.
“Ohin ami nia parte NU aprezenta ba xefe estadu hodi halo mós esplikasaun kle’an kona-ba objetivu prinsipál iha sorumutu, NU hakarak haree kondisaun balun atu estabelese NU nia ramu iha Timor Leste,” Ibrahim afirma.
Ibrahim esplika, Oras ne’e dadaun organizasaun musulmanu NU nia ramu iha ona nasaun 74 no hein katak Timor Leste sei sai nasaun 75 ne’ebé NU estabelese nia ramu ba.
“NU nia misaun importante ne’ebé oras ne’e halo oinsá tau importánsia ba Direitus Humanus no kombate tráfiku umanu inklui negósiu ilegál sira ne’ebé lori risku ba sosiedade NU nia servisu tomak foka liu ba Direitus Humanus, toleránsia, igualdade tuir konseitu prezidente repúblika José Ramos-Horta nia ba promove fraternidade umana,”Afirma nia
Nia deklara, NU nu’udar organizasaun relijiozu musulmanu, iha konseitu ideia ho umanidade tanba ne’e NU sei sai hanesan organizasaun islámiku ne’ebé sei fó apoiu tomak ba esforsu rekonsiliasaun ne’ebé PR José Ramos-Horta halo dadaun ho Timoroan sira iha NTT.
Esensiál umanidade ne’ebé sai hanesan isu internasionál no nasionál NU sei halo esforsu hotu atu halo estudu hodi hakle’an ba sosiedade hotu
Jornalista :Domingas Viana
Editór : Orlando Magno