(Dili), Mudansa – Populasaun hotu-hotu iha rai laran tenke ko’alia lolos ba ajente sira bainhira halo pergunta iha momentu ne’ebé sira foti dadus kada uma kain.
Lia hirak ne’e, hato’o husi Prezidente Repúblika José Ramos Horta liu husi ninia diskursu iha Sermonia Programa Lansamentu Nasionál ba Sensu Populasaun no Uma-kain 2022, iha CCD Kaikoli Dili, Segunda (15/08/2022).
“Ita-nia família balu lakohi hatete sai buat ne’ebé sira hasoru tanba Ita iha esperiénsia ida ne’e, maibé ita husu ho loos atu oinsá governu bele ajuda husi kosok-oan to’o ferik katuas, dala ida tan ha’u apela ba ita hotu atu kontribui hodi fó dadus lolos ba ajente sira ne’ebé halo perguntas,” PR Horta esplika.
PR Horta informa, Kada tinan lima Timor halo eleisaun no sensu, sensu importante tebes ba sidadaun no governu inklui parseiru internasionál sira atu hatene lolos retratu sosiál umanu no polítiku ba rai ne’e nian.
“Governu no parseiru internasionál servisu hamutuk ita bele hadi’a di’ak liu tan dezenvolvimentu rai ida ne’e nian, Importante tebes tanba ita besik ona atu tama asean entaun ita tenke fornese dadus sientífiku ne’ebé loos, ba parseiru asean,” PR Horta hakotu.
Jornalista : Ekipa MD
Editór : Orlando Magno