Serimónia Deslotu Max Stahl, SEJD Prontu Servisu Hamutuk Ho KO

banner 120x600

(Dili), Mudansa – Sekretáriu Estadu Joventude Desportu (SEJD), prontu servisu hamutuk ho Komisaun Organizador (KO) relasiona ho asuntu ne’ebé Komisaun aprezenta ba SEJD atu halo serimónia Deslotu saudozu Max STahl nia ne’ebé sei realiza iha loron 28/10/2022.

Diretór Nasionál Asosiativismu Joventude Jacinto Antonio Ximenida informa, Parte SEJD aseita no hakarak envolve mós iha komisaun hodi halo preparasaun ba serimónia ne’ebé komisaun sira aprezenta ona .

“Ami aseita malu ona atu mobiliza rekursu hotu hotu tanba maun Max Stahl nia atividade la’ós kabe de’it iha ministériu ida maibé iha ministériu hotu hotu,” dehan Diretór Jacinto ba jornalista iha SEJD Dili, Kuarta, (17/08/2022).

Jacinto afirma, Kona-ba orsamentu hira maka atu aloka ba serimónia deslotu ne’e seidauk hatene tanba SEJD sei halo preparasaun hamutuk ho komisaun oinsá atu realiza atividade ne’e.

Iha fatin hanesan, Vise Prezidente Komite 12 Novembru Rogerio Castro da Cruz esplika, Ohin komisaun organizadóra ne’ebé kompostu husi komité 12 Novembru ho KAMSTAL hakbesik an ba estadu no governu liuliu SEJD.

“Ami mai husu sira nia apoiu no tulun oinsá atu bele hamutuk ho komisaun hodi realiza eventu saudozu Max STahl ninia deslotu no mós halo bénsaun rate ne’ebé iha hela konstrusaun ne’ebé atinji ona porsentu 97 ha’u fiar loron 28 fulan outubru buat hotu bele remata ho di’ak,” Rogerio deklara.

Rogerio relata, loron 28 Outubru Kada tinan la’ós komemora de’it saudozu Sebastião Gomes nia loron mate maibé iha ona ema na’in rua, ida maka saudozu Max Stal tanba sira na’in rua mate iha loron no fulan ne’ebé hanesan.

Jornalista : Ekipa MD
Editór        : Orlando Magno

banner 325x300