(Dili), Mudansa – Sekretáriu Estadu Joventude Desportu (SEJD), Abrão Saldanha informa, nia parte husu ba Membru Persaudaraan Setia Hati Terate (PSHT), foun no tuan bainhira sa’e ona Warga PSHT tenke hatudu buat di’ak hodi fó benefísiu ba públiku maibé la bele fó fali problema ba ema seluk.
“Hau fiar katak bainhira graduasaun ha’u fiar PSHT sei fó benefísiu ba ema la’ós fó problema (KRIMI) ba ema seluk” dehan SEJD Abrão liu husi ninia diskursu iha serimónia membru PSHT graduasaun iha GMT Dili, kinta (18/08/2022)
Abrão esplika, Hatoo ba membru PSHT no membru graduadu sira bainhira halo tuir lolos doutrina ne’ebé iha no sai SH ne’ebé lolos maka ema seluk sei respeitu ita boot sira, se ita boot sira maka ikut-ikutan de’it entaun sei estraga SH nia naran.
“Governu reativa hikas arte marsiais la’ós atu haburas problema iha rai laran maibé reativa fali arte mariais atu kontribui ba pás no estabilidade inklui dezenvolvimentu iha rai laran,” Abrão afirma.
Nia relata, espera katak, arte marsiais sira bele simu buat hotu iha sosiedade nia leet hodi hala’o tuir saida mak membru aprende liu ona tanba iha tinan 2011 PSHT lori timor nia naran ba rai li’ur, hein katak, ba oin arte marsiais hanesan PSHT KORK no Kera Sakti sei lori timor ba rai li’ur liu husi atividade desportu.
Iha sorin seluk, Prezidente Autoridade munisípiu Dili, Guilhermina Filomena Saldanha Ribeiro argumentu, nia parte fó parabéns ba governu liuliu SEJD ne’ebé fó ona oportunidade ba joven sira hodi realiza sira nia graduasaun, maibé nia husu ba membru PSHT atu kaer metin estabilidade iha rai laran.
“Parabens ba graduadu sira ne’ebé ohin halo graduasaun PSHT nian, Husu ba membru PSHT sira atu kaer metin nafatin hadomi malu haburas pás no estabilidade iha ida-idak nia aan kontribui dezenvolvimentu iha ita-nia rai laran hodi minimiza konflitu entre joven sira iha Timor,” PAM Dili Filomena deklara.
Tuir dadus ne’ebé Media mudansa asesu, totál membru PSHT iha Timor ne’ebé halo graduasaun tinan ne’e hamutuk 8599.
Jornalista : Ekipa MD
Editór : Orlando Magno