(Dili), Mudansa – Tenente Lorenço José Cabral “AQUITO” hanesan mós Beteranus 24 anos sente triste bainhira veteranus balu la hetan konvite husi parte responsavel serimónia atu partisipa serimónia 20 agostu 2022 ne’ebé selebra loron FALINTIL ba dala 47.
Tenente Aquito informa, Beteranus 24 ho nia família sira barak la sente 20 agostus tanba sira la partisipa serimónia ne’e ho razaun la hetan konvite, tan ne’e husu komisaun organizadór tenke tau konsidera másimu ba veteranus 24 anos.
“Hau sente kontente bainhira selebra loron FALINTIL, maibé ha’u triste makas tanba la Konvida veteranus 24 anos mais ou menus konvida netik ami, la bele reprezenta de’it tanba uluk halo funu la’ós ema ida ba reprezenta ema seluk maibé ida-idak reprezenta nia an hasoru funu hodi hetan ukun an,” dehan Tenente Aquito ba média Mudansa iha nia rezidénsia Aimutin Dili, Sabadu 20/08/2022.
Aquito afirma, Pelumenus tempu hanesan ne’e tula netik veteranus 24 anos husi munisípiu mai Dili hodi partisipa serimónia ne’e, maibé realidade konvite mós la to’o ba sira.
“Beteranus barak no Hau rasik mós la hetan konvite maski ha’u mós veteranus 24 anos segundu komandante kompañia, maibé la hetan konvite, komisaun hanoin FALINTIL ne’ebé eziste iha ukun an ne’e mak maka’as liu fali maibé Ema iha munisípiu hotu hotu fakar nia raan maka Timor hetan ukun an,” Aquito deklara.
Nia esplika, Sentimentu ne’ebé nia iha sente triste boot tanba veteranus sei moris mós la iha konsiderasaun ba sá tan aban bainrua mate tiha oinsá ho jerasaun veteranus nia, sei valoriza ka lae?
“Hau ko’alia hanesan ne’e tanba ha’u-nia sentimentu triste makas tanba FALINTIL agora la hanesan FALINTIL uluk, FALINTIL ulun nian ne’e 24 anos FALINTIL agora ne’e ukun an nian maibé FALINTIL uluk nia maioria la asiste iha serimónia 20 agostus tanba la hetan konvite,” Aquito realsa.
Tenente Aquito afirma, Lolos Eventu 20 agostu komisaun sira konvida veteranu 24 anos la bele reprezenta fali, tanba uluk funu la iha reprezente, tan ne’e hakarak povu tomak sente serimónia ne’e, kada tinan tenke selebra loron FALINTIL iha munisípiu 6 la bele selebra de’it iha Dili, nune’e povu no veteranus sira mós sente hotu selebrasaun loron FALINTIL.
“Ha’u rekomenda ba komisaun organizadór ba serimónia 20 agostu ne’ebé selebra loron FALINTIL nian atu tau konsiderasaun másimu ba veteranus 24 anos sira atu la bele bolu de’it reprezentante, no mós komisaun la bele konsidera an, sira maka makas tanba ema ne’ebé makas maka veteranus 24 anos,” Tenente ne’e reafirma.
Aquito realsa, Povu ne’ebé fó an terus no mate ba Timor ukun an ne’ebé hakerek ho raan ne’e mós sira la hanoin oinsá veteranus nia oan sira ne’e ba futuru Timor sei valoriza ba sira ka lae?
“Hau asiste serimónia ne’e, hanesan tropa maibé oinsá ho ha’u-nia maluk veteranus sira seluk kuitadu, kada tinan ami veteranus 24 anos sempre hetan konvite atu partisipa iha serimónia 20 agostu maibé agora ha’u rasik mós la hetan konvite, ha’u hatete Ema ne’ebé na’in la sente buat ida ema ne’ebé la’ós na’in nia nia mak maka’as,” nia argumenta.
Nia sujere, Parada tenke halo kontinénsia ba veteranus sira tanba sira nia esforsu mak Timor ukun an maibé FALINTIL uluk nia ema haluha ona, tan eziste fali maka FALINTIL agora.
“Hau nia hanoin atu loos ka sala komisaun tenke sente karik komisaun sente la di’ak mai ko’alia, ha’u prontu deklara ha’u-nia an.
Aquito haktuir, husu ba veteranus no veteranus nia oan ne’ebé iha timor laran tomak, katak, 20 agostu loron FALINTIL, no loron ne’ebé espesiál ba luta na’in sira ne’ebé uluk luta iha funu laran.
“Ohin ita la partisipa iha serimónia selebrasaun loron FALINTIL ida ne’e sala husi Kominsaun organizadór tanba ita la hetan konvite maibé, la buat ida importante ba oin la bele akontese tan hanesan ne’e,” nia rekomenda.
Nune’e mós, Tenente Aquito hato’o Parabens ba FALINTIL, veteranus 24 anos no povu Timor tomak ne’ebé liman tohar, ai tohar, Faluk no oan kiak ne’ebé iha foho no sidade tanba família barak mate mak ohin Timor ukun an.
Entretantu relasiona ho Tenete Aquito nia preokupasaun, jornalista média Mudansa tenta konfirma ho Prezidente Komisaun Organizador ba serimónia 20 agostu Komodoro Donacino da Costa Gomes Pedro “Klamar Fuik” atu halo entrevista maibé Prezidente komisaun okupadu ho servisu balu ne’ebé atende bainaka sira husi rai li’ur.
Jornalista : Orlando Magno
Editór : Felisberto F. da Costa
