(Dili), Mudansa- Ministeriu Turismu Komersiu no Industria ho UNDP hahu faze inkubasaun durante loron lima ba manan nain sanolu resin lima hosi kompetisaun negosiu inovativu daruak hanesan kontinuasaun ba programa kompetisaun ne’e rasik.
“Hahu hosi fulan Maiu tinan ida ne’e Ministeriu Turismu Komersiu Industria servisu hamutuk ho UNDP loke oportunidade kompetisaun negosiu inovativu daruak ba joven Timoroan tomak ne’ebé iha idea nogosiu ne’ebé diak hodi kompete,”dehan Jestór Projetu SEEWAY Francelino Guterres iha abertura ba formasaun inisiál ba manan nain kompetisaun negosiu inovativu dahuluk no daruak, iha SIN Matadoru Dili, Segunda (22/08/2022)
Iha inisiu fulan juñu programa kompetisaun ne’e konsege konklui ho mana nain hamutuk sanolu resin lima.
Hosi total sanolu resin lima ne’e hamutuk ho manan nain kompetisaun negosiu inovativu dahuluk nain salonu ohin tuir faze inkubasaun ho objetivu atu haklean tan kapasidade negosiu nian hodi bele garante sustentabilidade negosiu nian iha futuru.
Iha faze inkubasaun ne’e oferese formasaun kona ba planu negosiu ne’ebé di’ak no los atu nune’e idea negosiu ne’ebé manan nain sira aprejenta iha prosesu inisiu kompetisaun nian bele garante nia projesaun ba oin ho di’ak.
“Faze tuir mai mak sei identifika hirak ne’ebé seidauk halo rejistrasaun iha SERVE. MTCI ho UNDP sei konvida parte relevante hodi mai fasilita rejistu ba hirak ne’ebé seidauk halo rejistu,” tenik nia
Faze datoluk mak MTCI ho UNDP sei fasilita oinsa produtu hirak ne’ebé prodúz ona bele asesu ba merkadu.
Faze ikus liu mak sei halo graduasaun ba manan nain sira hodi sai empreja formál, signifika katak empreja ne’ebé bele fo ona servisu ba ema no legalizadu.
Sei iha tan atividade ne’ebé sei prense ho fó rekoñesementu ba emprejariu hitak ne’e katak empreja ne’e kontribui ona ba dezenvolvimentu rai laran no iha tempu ne’ebé hanesan hamenus ona dezempregu iha Timor-Leste.
Fomasaun ne’e sei lori loron lima no sei fasilita hosi Business Development SMART ho materia Business Canvas Model.
Jornalista : Felisberto F. da Costa
Editór : Orlando Magno
