(Dili), Mudansa – Sidadaun Timor-Leste husi baze to’o Nasionál tenke partisipa iha selebrasaun loron nasional sira hanesan 20 de maiu loron Independensia, 30 agostu Konsulta Popular no loron boot seluk maibé husu mos ba Lider sira atu nafatin unidade hodi servi nasaun ida ne’e.
Lia hirak ne’e hato’o husi, Prezidente Republika Timor-Leste José Ramos Horta hafoin remata serimonia retaurasaun 30 agostu konsulta popular ne’ebé organiza husi ministeriu Administrasaun Estatal (MAE), iha Jardin 5 de maiu Kolmera Dili, Segunda 30/08/2022.
“Hanesan Xefe Estadu hato’o ba povu no líder hotu-hotu, atu nafatin iha unidade nasionál, hodi dezenvolve ita nia nasaun Timor-Leste,” PRTL Horta rekomenda.
PRTL Horta esplika, loron ohin loron ne’ebé espesial ba povu Timor tomak tan ne’e ema hotu la bele haluha partisipa iha komemorasaun loron boot konsulta popular.
“Loron referendu, loron Konsulta Populár, ha’u mai iha ne’e hanesan, obrigasaun Estadu, obrigasaun pesoal, nu’udar sidadaun ita maka prezensa iha ne’e, atu labele haluha momentu, ne’ebé povu, joven, ferik, katuas sira iha tinan lubuk nia laran ne’ebé luta fó aan ba mate iha funu laran,” Horta afirma
Horta informa, nia parte sempre ko’alia ho líder hotu-hotu, kuaze loro-loron kontaktu malu, dala ruma kontaktu privadu, dala ruma mós kontaktu ofisiál, tanba Prezidente, hanesan mahon ba partidu polítiku sira, sosiedade tomak, laiha diskriminasaun ba polítika ho sosiál no buat sira seluk.
“Nasaun ne’ebé iha dame, Timor bele kontente iha mundu konflitu funu barak loos, maibé ita moris nafatin iha dame nia laran no ekonomia la’o daudaun ona, Ha’u espera ba fulan sira mai ne’e ekonomia bele la’o di’ak liu tan,” Horta esplika.
Prezifente Repubika José Ramos Horta relata, joventude assuwain Santa Kruz, nia istória, no ba Igreja, portantu ba rede klandestina sira, Horta sempre hakruk tanba hanoin hikas momentu ne’ebé liu ona.
“Ha’u hakruk ba fundadór FRETILIN, FALINTIL, Komité Sentrál FRETILIN ne’ebé mohu hotu ona, fundadór FALINTIL, komandante boot sira, soldadu sira, Sarjentu sosiál ne’ebé mate inklui Joven lubuk ne’ebé mate no fakar ran iha Santa Cruz,” PR Horta hakotu.
Jornalista : Ekipa MD
Editór :Orlando Magno
