(Dili), Mudansa – Koordenadór, Grupu Arte Sanarai Inovativu Manatuto Rosalino Soares da Silva informa, sai ona joven kreativu tenke fiar an hodi foti desizaun, kontinua la’o ba oin ho kreatividade ne’ebé iha labele moe hatudu produtu ba ema.
Rosalino hato’o asuntu ne’e bainhira tuir feira iha Jardin 5 dé maiu ne’e organiza husi Miniseriu Administrasaun Estatal no Autoridade munisípiu Dili hodi promove joven kreativu no promove ai-han lokál.
“Joven sira kreativu labele moe atu hatudu ita nia produtu iha fatin ne’ebé deit maibé tenke fiar an foti desizaun forte no mós inklina an iha organizasaun ne’ebé maka ligasaun ho arte hanesan AMTL, Asosiasaun Arte mor, Artezenatu Timor Leste, tanba sira ne’e maka lori ita koñese merkadu arte ninian” dehan Rosalino ba média mudansa iha jardín 5 de maiu, tersa feira 29/08/2022
Rosalino haktuir, nia sente kontente bainhira tuir feira ida ne’e, tanba nia konsidera feira mak sira nia servisu fatin no merkadu, entaun tenke nafatin fuan boot bainhira produtu ne’e folin ka lae?
“Ami mai tuir feira ne’e durante loron tolu ona, maioria partisipante mai kalan tanba divertimentu iha tempu kalan de’it, maibé husi ne’e ami bele hetan $.50 até $.100 iha kalan ida tanba feira mak hanesan ami nia merkadu,” nia esklarese.
Rosalino afirma, Kreativu tenke partisipa feira ne’ebé maka iha, nune’e koñese lolos arte nia merkadu la’o oinsá, tanba agora daudauk arte nia folin maka barak liu.
“Ita hakarak atu avansa ho ita ninia kreativu ne’ebé atu folin lolos iha feira ne’e, bainhira NGO ka Guvernu mak loke feira konvida ita mai partisipa ne’e ha’u sente ita-nia produtu sei folin,” Rosalino esplika.
Nia relata, nu’udar ema kreativu la bele baruk atu simu ema hotu nia sujestaun no Kritika tanba hirak ne’e hotu mak sei muda ema ida nia hanoin hodi halo di’ak liu tan.
“Tenke nakloke an iha feira nune’e konsumidór(a) sira bele sosa ita-nia produtu, no ita bele simu sujestaun husi sira nune’e fila ba uma modifika fali produtu ne’ebé konsumidór(a) sira sosa, nune’e haforsa liu tan ita-nia kreatividade,” Nia reafirma
Rosalino reafirma, inísiu husi 2017, bainhira sira tuir feira iha loron santo Antonio nian ne’ebé hahú iha ne’ebá, konsege governu balun haree no bele tuir feira iha dili, entaun sira konsege lori produtu mai iha dili.
“Osan ne’ebé durante ami hetan maka, dadaun ne’e ami harii ona estúdiu ida iha Faról oinsá bele fasilita ami atu tuir feira ne’ebé loke iha dili laran, tanba feira mak ami nia merkadu,” nia esklarese.
Nia aumenta, sei atu poupa osan ne’ebé hetan husi feira ida ne’e, primeiru nesesidade loroloron, balun tenke rai bá materiál sira ne’ebé presiza sosa, hanesan tinta kór haat, entaun bele hetan dolar amerikanu $.100 resin.
“Ami nia grupu arte sanan rai inovativu Manatuto, harii iha tinan 2014, iha grupu ami ativu durante na’in-5 kompostu husi Feto ida (1) no na’in Mane haat (4), kompetisaun mosu iha kreatividade nia laran, nune’e ami hamosu tan bidogranfas, kilograf, ho asesoris,” nia afirma.
Rosalino esplika, Grupu Arte Sanarai Inovativu Manatuto ida ne’e sira estabelese tan grupu ida ho naran komuniti arte paint Manatuto, iha grupu ida ne’e arte ki’ikoan sira ne’ebé maka iha Munisipiu Manatuto inklina an hotu iha laran.
“Iha momentu ami harii, ami na’in tolu hahú harii grupu arte sanarai inovativu ne’e ami ho osan bázika 100 dolar, tanba ekipamentus bázika atu desain ne’e karun liuliu pinta akilitu sira ne’e, entaun ami mai ho 100 dolar ne’e to agora”
Planu ba oin, Rosalino hakarak, diversifika liu tan produtu ne’ebé iha ona atu halo inovativu liu tan iha planu mós atu harii komuniti arte painti iha munisípiu Manatuto mós hili Rosalino nu’udar koordenadór iha koomuniti art painti nian
“Joven sira inklina an iha ne’ebá bele fahe servisu ba malu, oinsá arte ne’e bele la’o ho susesu liuliu bá iha merkadu entaun ida ne’e sai hanesan koko ita atu halo mudansa produtu sira ne’ebé loroloron ita sempre prodús,” koordenadór ne’e hakotu.
Jornalista :Azelio da Cruz
Editór : Orlando Magno
