(Dili), Mudansa – Sekretáriu Estadu Formasaun Profisionál Empregu (SEFOPE), Alarico de Rosario informa, nia parte hato’o pontu importante rua mak Timor oan sira presiza halo iha nasaun Estranjeiru.
Sekretáriu Alarico hatoo asuntu ne’e bainhira governu liu husi SEFOPE, Diresaun Nasionál Exterior Empregu (DNEE), halo despedida ho traballador sira iha Timor lodge Dili, 15/07/2022.
Sekretàriu Estadu Alarico de Rosario apela liafuan rua ba trabalhador sira atu ba Korea do Sùl katak. ba buka osan, no aprende iha ema nia rai, wainhira aprende iha ema nia rai fila mai Timor tenke aplika fali iha Rai laran.
Alarico esplika, SEFOPE buka dalan no fasilita de’it, tanba buat hotu iha sira (traballadór), nia liman maibé disíplina nafatin buat ne’ebé SEFOPE hato’o, tau iha fuan, hametin nafatin Timor-Leste iha kakutak no labele haluhan servisu ho laran iha ema nia rain.
“Ha’u hakarak apela de’it buat rua ba alin sira, objetivu ba ema nia nasaun atu buka osan no ba aprende, wainhira imi nia kontratu hotu mai fali Timor tenke halo dezenvolvimentu ba rai ida ne’e ,” Sekretáriu Alarico esplika.
Nia afirma, ba Buka osan iha ema nia rai atu hadia ida-idak nia moris no hadia familia sira nia moris hodi halo mudansa moris iha futuru oin mai.
“Husu ba familia bainhira oan sira haruka osan mai karik utiliza ho didiak no kuidadu osan hodi hare’e ba oan sira nia eskola ,suporta familia sira nia moris no halo uma halo dezenvolvimentu ba rai ida ne’e,” nia sujere.
Iha fatin hanesan, Trabalhadora Marculina de Jesus informa, nia sente orgullu tebes bainhira hetan oportunidade ba servisu iha Korea hodi bele hadia ninia moris no ninia familia sira nia moris.
“Ha’u kontente tebes tamba bele hetan oportunidade ba servisu iha rai liur hodi hetan osan oituan hodi muda ha’u nia moris maibe iha parte ida ha’u mós sente triste tamba husik família sira ,maibe hau forsa nafatin hodi buka osan,” Trabalhadora Marculina relata.
Nia hatutan, dezfius ne’ebé mak durante ne’e nia hasoru liu-liu iha lian Korea tanba iha teste primeiru nia la pasa iha ezame tan ne’e Marculina kontinua esforsu aan tuir kursu Lian Korea ikus mai nia liu iha teste ezame foin lalais.
“Hau tuir Lian korea ne’e iha tinan 2019 hau tes liu tiha maibe hein kontratu seidauk mai entaun hau tama tiha SOLS i liu tiha tinan rua mak foin kontartu ne’e mai ,ne’e mak agora daudaun prepara an atu ba,” Marculina realsa.
Marculina mós hato’o ninia mensajen ba joven Timor liu-liu ba feto sira katak, oportunidade ne’ebe iha koko de’it labele dehan mane de’it mak bele, hanoin de’it iha fuan dehan núne’e, “bainhira Mane bele Hau mos bele,”
Entretantu tuir dados ne’ebé jornalista asesu katak, semana oin SEFOPE liu husi DNEE sei haruka tan trabalhadór Timor oan hamutuk nain 111 ne’ebé kompostu husi mane 110 no feto 1 sei ba servisu iha Korea Sul hodi servisu iha area peskas no fàbrika.
Jornalista :Domingas Viana
Editor : Orlando Magno
