(Dili), Mudansa — Organizasaun Forum Komunikasaun Feto Timor-Leste (FOKUPERS) no Assosiasaun Chaga Ba Ita (ACBIT) servisu hamutuk ho Hivos, Realiza Workshop Nasionál, hodi halo ligasaun servisu atu responde ba inkluzaun no haforsa ekonomia feto sobrevivente violénsia bazeia ba jéneru.
Diretóra Ezekutiva FOKUPERS, Maria Fatima Pereira Guteres informa, atividade workshop ida ne’e, servisu kolaborasaun ne’ebé halo entre FOKUPERS, ACBIT no mós Hivos no hetan fundus husi Uniaun Europeia.
“Projetu ne’e hanaran Reforsa Hamutuk, objetivu husi ida ne’e reforsa malu hodi haree sobrevivente sira, husi Hivos sira barak, ACBIT haree ba iha sobrevivente ne’ebé hasoru konflitu pasadu no FOKUPERS haree ba maluk sobrevivente sira husi violénsia bazeia ba jéneru” dehan Diretóra Ezekutivu FOKUPERS Fatima ba jornalista hafoin workshop nasionál iha salaun katedrál São José, Vila-Verde Dili, Kinta (28/07/2022)..
Fatima realsa, Bainhira sobrevivente sira hasoru tiha problema depois husik sira mesak, no la iha ema ruma akompaña tanba ne’e mak FOKUPERS ho nia parseria realiza Workshop ida ne’e.
“Atividade kapasitasaun oioin ne’ebé konsege realiza tiha ona mak hanesan, empoderamentu ekonomia no life skil, maibé Projetu agora ne’e nia objetivu oinsá la bele husik sira mesak maibé ita nafatin akompaña no la’o hamutuk haree sira nia ekonomia no sira nia kondisaun,” Fatima Afirma.
Fatima akresenta, Organizasaun FOKUPERS ho nia parseiru realiza mós kompetisaun ba sobrevivente sira husi proposta 68 ne’ebé iha ekipa juri konsege identifika ema na’in tolu maka sai manán na’in iha kompetisaun refere.
“Kritéria ba sira ne’ebé sai vensedór mais ou menus iha planu oinsá atu hahú sira nia negósiu, oinsá atu jere didi’ak sira nia orsamentu, Entaun ita fó mós fundus finanseiru uitoan ba sira hodi suporta sira nia ekonomia atu sai di’ak liu tan,” Fatima deklara.
Iha fatin hanesan, Reprezentante delegasaun Uniaun Europeia, Responavel Ba Zeneru Sosiedade Sivil, Carla da Silva Leitzke informa, projetu ida ne’e sira hahú iha fevereiru 2020, to’o outubru tinan ida tanba ne’e sira hakarak apoiu ekonómiku no sosiál ba hakbiit sobrevivente husi violénsia bazeia ba jéneru.
“Saida maka ita tenke halo no Oinsá ami bele fó apoiu efetivu ba sobrevivente, tanba la’ós Uniaun Europeia de’it maibé ami iha parseiru finanseiru, husi governu, sosiedade sivíl, igreja, setór privadu no seluk tan” Carla esplika.
Nia informa, violénsia bazeia ba jéneru, ne’e responsavel ba sosiedade tomak, entaun sosiedade hotu tenke responde hamutuk, maibé projetu semináriu remata mak sira foin hatene se mak bele halo planu estratéjiku ba sobrevivente.
“Fulan setembru sei iha finansiamentu foun, ne’ebé nakloke husi Miliaun Ida ho balun ba sosiedade sivíl no organizasaun hotu-hotu bele aplika ba finansiamentu atu enkoraja feto iha ekonómiku no sosiál,” Nia afirma.
Carla relata, Projetu ida ne’e organiza husi organizasaun FOKUPERS, Hivos no ACBIT, atividade ne’e sei remata iha fulan outubru 2022, no Benefisiariu mai husi munisípiu Manufahi, Ermera,Likisa, Dili Baukau Oekuse no seluk tan.
Jornalista : Azelio da Cruz
Editór : Orlando Magno
