(Díli), Caicoli 15/09/2026 – Sekretariadu Estadu Formasaun Profisionál no Empregu (SEFOPE) kontinua haforsa dezenvolvimentu no preparasaun juventude Timor-Leste, liu-liu iha área formasaun profisionál, empregu no oportunidade servisu, hodi prepara sira atu bele partisipa no kompete iha merkadu traballu nasionál no internasionál, ida ne’e hatete husi Sekretáriu Estadu Formasaun Profisionál no Empregu, Sr. Rojério Araújo Mendonça, no orador iha atividade meet the press, organiza husi Sekretáriu Estadu Komunikasaun sosial (SECOMS).
Sekretáriu Estadu Formasaun Profisionál no Empregu, Sr. Rojério Araújo Mendonça, hateten katak durante períodu servisu hosi Juñu 2023 to’o Setembru 2026, SEFOPE kontinua implementa programa no atividade sira ne’ebé orienta hasa’e kualidade, kapasidade, kompeténsia no esperiénsia juventude Timor-Leste.
“Durante períodu servisu hosi Juñu 2023 to’o Setembru 2026, SEFOPE kontinua implementa programa no atividade sira atu hasa’e kualidade, kapasidade no esperiénsia jovem sira, hodi nune’e sira bele kompete ho di’ak iha merkadu traballu nasionál no internasionál,” hateten Sekretáriu Estadu Formasaun Profisionál no Empregu, Sr. Rojério Araújo Mendonça, iha Caicoli foin lalais ne’e.
Tuir Dekretu-Lei N.º 80/2023, loron 11 Outubru, SEFOPE iha responsabilidade prinsipál iha área prioridade tolu, mak formasaun profisionál, empregu no traballu tuir responsabilidade ne’e, SEFOPE kontinua dezenvolve polítika, programa no atividade sira ne’ebé responde ba nesesidade merkadu traballu no dezenvolvimentu rekursu umanu iha Timor-Leste.
“SEFOPE iha responsabilidade importante iha área formasaun profisionál, empregu no traballu tanba ne’e, ita kontinua dezenvolve polítika no programa sira atu responde ba nesesidade merkadu traballu no haforsa rekursu umanu iha Timor-Leste,”nia hatutan.
Iha área formasaun profisionál, SEFOPE konsidera juventude hanesan patrimóniu no forsa importante ba futuru nasaun, no Preparasaun juventude la’ós de’it fó oportunidade atu sira remata formasaun, maibé mós asegura katak sira hetan kualifikasaun, kompeténsia, esperiénsia no sertifikasaun profisionál ne’ebé bele hetan rekonesimentu husi empregadór, tantu iha rai laran no mos iha rai liur.
Nia mós esplika katak, Atu atinji objetivu ne’e, SEFOPE kontinua servisu hamutuk ho sentru formasaun profisionál akreditadu no sentru formasaun sira ne’ebé hetan lisensa operasionál no Kolaborasaun ne’e importante atu haforsa kualidade sistema formasaun, liu-husi dezenvolvimentu kapasidade formadór no formandu sira
Iha implementasaun programa sira, SEFOPE mós fó atensaun ba haforsa instituisaun no ekipamentu formasaun Suporta ba infraestrutura no ekipamentu konsidera nu’udar elementu importante atu garante ambiente aprendizajen ne’ebé seguru, di’ak no apropriadu ba formandu sira.
Aleinde suporta infraestrutura, SEFOPE kontinua fó apoiu ba nesesidade formandu sira, inklui ekipamentu hanesan kadeira meza ba estudante sira, no atividade sira ne’ebé diretamente relasiona ho preparasaun no dezenvolvimentu kapasidade profisionál.
Sekretáriu Estadu Rojério Araújo Mendonça salienta katak, preparasaun juventude ba merkadu traballu presiza liu husi formasaun téknika, maibé mós presiza informasaun kona-ba oportunidade empregu no dalan atu asesu ba merkadu traballu.
“Preparasaun juventude la’ós de’it kona-ba remata formasaun, importante mós atu sira hatene oportunidade empregu ne’ebé disponivel, komprende nesesidade empregadór sira no hatene dalan atu asesu ba merkadu traballu,”nia salienta.
Iha kontestu ne’e, liu-husi polítika no programa governu, SEFOPE kontinua promove akreditasaun, rekonesimentu kompeténsia profisionál no atividade expozisaun karreira. Inisiativa sira ne’e destina atu ajuda formandu sira komprende oportunidade profisionál no planeia sira-nia dalan ba mundu traballu.
Programa no atividade sira ne’e sai parte husi esforsu SEFOPE atu asegura katak juventude, bainhira remata sira-nia formasaun, iha kualifikasaun no kompeténsia ne’ebé presiza hodi responde ba nesesidade empregadór sira no oportunidade iha merkadu traballu.
Iha fatin hanesan, SEFOPE mós hato’o apresiasaun ba ekipa komunikasaun sosial, jornalista no profisionál mídia sira ne’ebé kontinua kontribui iha divulgasaun informasaun kona-ba programa, atividade no rezultadu servisu SEFOPE ba públiku.
Jornalista: Madalena/Dina
Editor: Ana Maria da Silva
