(Díli), Akait 23/09/2026 – Teknolojia dijitál hahú sai parte importante iha preparasaun konferénsia no eksposisaun internasionál ne’ebé sei realiza iha Timor-Leste aleinde website ofisiál ne’e fahe informasaun ba públika, organizadór sira prepara mós sistema jestaun vizitante ne’ebé uza QR Code atu fasilita rejistu, verifikasaun no kontrolu entrada partisipante sira.
Plataforma dijitál ne’e dezenvolve atu sai hanesan sentru informasaun ba públiku, ho kontentu kona-ba tema eventu, programa, oráriu, partisipante no atividade sira. Informasaun sira bele asesu antes, durante no depois eventu, nune’e públiku ne’ebé la konsege marka prezensa diretamente iha fatin mós bele akompaña atividade sira.
Iha introdusaun Kompainia R’Mahina 72 Halarau Unip, Ricardo da Costa Ribeiro esplika katak plataforma ne’e iha objetivu atu kria espasu dijitál ida ne’ebé bele fornese informasaun kompletu kona-ba eventu no fasilita komunikasaun entre organizadór ho partisipante.
“Plataforma ne’e dezenvolve ho objetivu atu kria espasu dijitál ida ne’ebé bele fornese informasaun kompletu kona-ba eventu, inklui tema, programa, partisipante no atividade sira ne’ebé sei hala’o.” hatete Kompainia R’Mahina 72 Halarau Unip, Ricardo da Costa Ribeiro iha Akait 23/09/2026.
Lansamentu Website ne’e sei sai mós hanesan plataforma sentrál ba komunikasaun públika organizadór bele uza sistema atu fahe ho objetivu eventu, programa, oráriu no atividade sira, enkuantu partisipante bele asesu informasaun ne’ebé presiza iha fatin ida.
Dezenvolvimentu plataforma ne’e envolve kooperasaun ho parte SECOM, liu-liu iha prosesu preparasaun no fornesimentu informasaun relevante kona-ba eventu. Aspetu tekniku hanesan asesu website, aparénsia interface no fasilidade utilizasaun mós tama iha planeamentu.
Parte ida ne’ebé hetan atensaun mak sistema jestaun vizitante liu-husi QR Code ho sistema ne’e, partisipante bele rejista-an liu-husi plataforma dijitál no hetan QR Code ne’ebé bele uza bainhira tama iha fatin eventu.
Bainhira to’o iha eventu, partisipante bele hatudu QR Code ba ekipa resepsaun atu sken no halo validasaun antes tama prosesu ida ne’e sei ajuda organizadór sira jere entrada vizitante ho maneira sistemátika no reduz dependénsia ba rejistu manual.
Iha fatin hanesan Secretáriu Estadu Koperativa, Arsenio Lavera, hatete katak preparasaun ba konferénsia no eksposisaun ne’e avansa ona to’o 90 porsentu nia mós refere katak sistema rejistu dijitál prepara atu fasilita partisipasaun no jestaun dadus partisipante sira.
“Kuandu ita tama ba rejistu, bele lori oras ida, oras rua maibé ho sistema ne’e, ema bele hatama kartaun, skaneia, depois sistema mosu konfirma.” Hatutan Secretáriu Estadu Koperativa, Arsenio Lavera.
Sistema ne’e sei rai dadus partisipante iha baze dadus, inklui informasaun kona-ba identidade no estadu rejistu dadus ne’e bele ajuda ekipa organizadór iha prosesu verifikasaun, monitorizasaun no preparasaun relatóriu eventu.
Aleinde rejistu, plataforma bele fó informasaun kona-ba númeru vizitante, partisipasaun, oras prezensa no atividade ka tema ne’ebé partisipante sira tuir dadus sira ne’e bele sai referénsia ba preparasaun relatóriu ba organizadór no parte relevante sira.
Website eventu nian mós planeadu atu sai espasu ba dokumentasaun fotografia. Fotografia ne’ebé produz hosi ekipa dokumentasaun durante atividade bele publika iha website, depende ba prosesu upload no publikasaun.
Partisipante sira bele asesu fotografia eventu liu-husi plataforma no, bainhira disponivel, halo download ba fotografia relevante ba sira-nia partisipasaun.
Fasilidade ida ne’e bele ajuda partisipante sira asesu dokumentasaun eventu ho maneira direta, la presiza buka fotografia iha plataforma sira seluk ho nune’e, website la’ós de’it sai fonte informasaun antes eventu, maibé mós sai arkivu dijitál ba atividade sira ne’ebé hala’o ona.
Iha parte eksposisaun, organizadór sira identifika ona besik 80 persen produtu lokál ne’ebé sei hetan espasu atu hatudu no promove produtu sira ne’e inklui rezultadu produsaun husi komunidade no koperativa sira.
Eksposisaun sei fó oportunidade mós ba patrosinadór no entidade sira ne’ebé hakarak hatudu sira-nia produtu espasu komersiál, inklui kafetaria no negósiu lokál, bele uza oportunidade ne’e atu promove sira-nia produtu ba vizitante.
Organizadór sira mós espera reprezentante husi munisípiu sira atu partisipa partisipasaun ne’e sei depende ba koordenasaun no mobilizasaun hosi federasaun sira ne’ebé responsavel.
Arsenio Lavera informa katak preparasaun eventu avansa ona to’o 90 porsentu. Equipamentu no nesesidade téknika sira tama ona iha prosesu finalizasaun, enkuantu instalasaun estrutura iha fatin eventu sei hala’o iha loron besik ba abertura.
Tuir planu, estrutura no ekipamentu sira sei instala iha loron rua antes eventu loke eksposisaun sei hahú iha tuku neen dadeer.
Programa ne’e iha orsamentu hamutuk $614,000, ne’ebé destina ba nesesidade eventu, inklui eksposisaun, konferénsia, alojamentu, transporte no atividade operasionál sira seluk.
Ho utilizasaun website no sistema rejistu dijitál, seguransa sibernétika mós sai parte importante hosi preparasaun organizadór sira presiza asegura katak informasaun partisipante sira ne’ebé rai iha sistema hetan protesaun no plataforma bele funsiona ho seguransa durante no depois eventu.
Ekipa: Media Mudansa
