Kandidatu PNTL 2026 Husu Klarifikasaun kona-ba Dokumentus no Rekrutament

(Díli), Jardim 5 de Maiu 21/09/2026 – Kandidatu PNTL 2026 Preokupasaun kona-ba transparénsia no prosesu verifikasaun dokumentus iha rekrutamentu Polísia Nasionál Timor-Leste (PNTL) 2026 sai asuntu ne’ebé kandidatu balun husu atu hetan atensaun no klarifikasaun husi autoridade kompetente.

Portavoz Tito Orleans hatete katak reklamasaun kona-ba prosesu rekrutamentu no seleksaun presiza haree ho kuidadu, liu-liu kona-ba transparénsia, verifikasaun evidénsia no garantia ba direitu kandidatu sira.

“Preokupasaun kona-ba prosesu rekrutamentu no seleksaun sai asuntu ne’ebé husu atensaun ba públiku, liu-liu kona-ba transparénsia, verifikasaun evidénsia no garantia ba direitu partisipante sira,” hatete portavoz Tito Orleans iha jardim 5 de maiu 21/09/2026

Tuir deklarasaun ne’ebé fó sai, iha alegasaun kona-ba buat balun iha prosesu rekrutamentu anterior ne’ebé konsidera hanesan erru ka lapsu tanba ne’e, reklamante sira husu atu halo verifikasaun kompletu antes prosesu kontinua.

Objetivu husi pedidu ne’e, tuir sira, mak atu garante oportunidade ne’ebé justu ba públiku no kandidatu sira ne’ebé partisipa iha prosesu rekrutamentu evidénsia no dokumentus ne’ebé aprezenta mós husu atu liu husi prosesu verifikasaun ne’ebé apropriadu no konsistente.

Iha sorin seluk, Gevania Gusamo Pinto, hatutan katak nia la satisfeitu ho rezultadu reverifikasaun dokumentus iha 2026, tanba dokumentus hanesan ne’ebé uza iha prosesu verifikasaun 2025, antes konsidera aprovadu, maibé iha prosesu 2026 dokumentus balun konsidera la aprovadu tanba la konsidera hanesan dokumentus orijinal.

“Dokumentus ne’ebé ami aprezenta agora mak dokumentus ne’ebé ami uza iha prosesu verifikasaun iha tinan 2025,” hatete Gevania Gusamo Pinto.

Kandidatu ne’e husu atu autoridade kompetente haree no verifika fali dokumentus sira ho justisa, inklui aplika prosedimentu ne’ebé hanesan ba kandidatu hotu.

Nia mós husu klarifikasaun kona-ba razaun ne’ebé halo rezultadu verifikasaun dokumentus iha 2025 no 2026 diferente, liu-liu ba dokumentus ne’ebé iha prosesu anterior konsidera aprovadu, maibé iha reverifikasaun foun hetan rezultadu la aprovadu.

Iha sorin seluk Argenio Marimar Malik mos hatutan katak kandidatu sira ne’ebé la satisfeitu ho rezultadu verifikasaun dokumentus PNTL 2026 husu ba Komandante-Geral PNTL no Konsellu Rekrutamentu atu fó atensaun ba reklamasaun kona-ba autentisidade dokumentus no diferénsia rezultadu verifikasaun entre 2025 no 2026.

“Kandidatu sira husu ba Komandante-Geral PNTL no Konsellu Rekrutamentu atu fó atensaun ba reklamasaun kona-ba autentisidade dokumentus no diferénsia rezultadu verifikasaun entre tinan 2025 no 2026,” hatete Argenio Marimar Malik.

Tuir deklarasaun kandidatu sira, dokumentus ne’ebé uza iha prosesu rekrutamentu 2026 mak dokumentus ne’ebé antes liu husi prosesu verifikasaun iha 2025 maibé, iha prosesu foun, dokumentus hirak ne’e konsidera la’ós dokumentus orijinal.

Diferénsia ne’e halo kandidatu sira husu klarifikasaun kona-ba mekanismu no kritériu ne’ebé uza iha prosesu verifikasaun dokumentus, atu sira bele kompriende razaun ba mudansa rezultadu entre prosesu rua.

“Antes dokumentus kompletu no aprezenta ba prosesu rekrutamentu, dokumentus hirak ne’e liu husi verifikasaun no konsidera nu’udar dokumentus original tanba ne’e, ami husu atu halo avaliasaun no verifikasaun ne’ebé justu no transparente,” dehan Argenio.

Além husi asuntu dokumentus, reklamante sira mos enfatiza importánsia lideransa no supervisaun iha prosesu rekrutamentu tuir sira, autoridade relevante tenke hala’o responsabilidade ho kapasidade no integridade atu garante prosesu ne’ebé justu no proteje dignidade públiku.

 

                       Ekipa: Media Mudansa