Dom Virgílio Husu Sarani Refleta Sentidu Moris no Legadu Preladus Katóliku Na’in-Haat

‎(Dili), Tasi Tolu 10/09/2026 – Sua Eminénsia Cardeal Dom Virgílio do Carmo da Silva, SDB, husu sarani sira iha Timor-Leste atu aproveita momentu misa funerál ba Preladus Katóliku na’in-haat hodi refleta kona-ba sentidu moris, valór no legadu ne’ebé ema ida husik ba jerasaun sira tuirmai.
‎
‎Misa funerál ne’e hala’o iha Tasi-Tolu, Díli, iha quinta-feira (10/09), hodi komemora no fó omenajen ba kontribuisaun Preladus Katóliku na’in-haat ne’ebé durante sira nia moris dedika-an ba Igreja no povu Timor-Leste.
‎
‎Iha nia omilia, Dom Virgílio hateten katak mate nu’udar parte inevitável husi moris umanu, maibé mos sai oportunidade ba ema hotu atu para no haree fila fali ba moris, valór no kontribuisaun ne’ebé sira fó ba ema seluk.
‎
‎“Mate mak parte inevitável husi moris umanu no sai oportunidade ba ita hotu atu refleta kona-ba valór no kontribuisaun ne’ebé ita fó durante ita nia moris.” hatete Cardeal Bom Virgildo do Carmo da Silva iha tasi tolu 10/09/2026.
‎
‎Cardeal Dom Virgílio mós konvida sarani sira atu husu ba an rasik kona-ba sentidu moris no saida mak sira hakarak husik ba jerasaun sira tuirmai.
‎
‎“Pergunta importante ne’ebé ita presiza husu ba ita-nia an mak: valór saida mak ita hakarak kuda iha ita-nia moris no legadu saida mak ita hakarak husik ba ema seluk Nia hatete
‎
‎Tuir nia, moris umanu la’ós de’it kona-ba dimensaun fízika, maibé iha mos dimensaun espiritual ne’ebé fó sentidu ba ezisténsia umana. Iha kontestu ne’e, fiar no esperansa sai fonte importante ba sarani sira atu enfrenta dezafiu sira iha moris no kontinua servisu ba ema seluk.
‎
‎“Moris umanu la’ós de’it kona-ba dimensaun fízika, maibé iha mos dimensaun espiritual ne’ebé fó sentidu ba ita-nia ezisténsia. Fiar no esperansa ajuda ita atu enfrenta dezafiu sira no kontinua servisu ba ema seluk.”nia hatutan
‎
‎Dom Virgílio subliña katak legadu di’ak la presiza de’it mai husi pozisaun ka estatutu ida, maibé bele mos moris liuhusi asaun simples ne’ebé fó benefísiu ba ema seluk, hanesan karidade, domin, respeitu, servisu no solidariedade.
‎
‎“Legadu di’ak bele manifesta liuhusi karidade, domin, respeitu, servisu no solidariedade ba ema seluk, liuliu ba komunidade no jerasaun sira tuirmai.”nia afima
‎
‎Preladus Katóliku na’in-haat ne’ebé komemora iha misa funerál ne’e mak Dom Jaime Garcia Goulart, Dom José Joaquim Ribeiro, Monsenór Martinho da Costa Lopes no Dom Alberto Ricardo da Silva.
‎
‎Sira haat nia moris no servisu iha Igreja iha Timor-Leste husik kontribuisaun importante, liuliu iha área pastoral, sosial no edukasaun. Nia sira nia legadu kontinua sai parte importante husi istória Igreja Katóliku no dezenvolvimentu komunidade iha Timor-Leste.
‎
‎Liuhusi misa funerál ne’e, Dom Virgílio la’ós de’it fó omenajen ba Preladus Katóliku na’in-haat, maibé mós konvida komunidade atu haree mate nu’udar momentu ida atu refleta kona-ba moris rasik no responsabilidade atu husik legadu di’ak ba jerasaun sira tuirmai.
‎
‎
‎Jornalista : Madalena de lima
‎Editor       :Ana Maria da Silva