(Ermera) Railaku, 10/06/2026 – Florentina de Araujo, orijin husi Suku Railaku,posto administrative Railaku, Munisípiu Ermera, kontinua hala’o negósiu ki’ik fa’an ai sunu iha Estrada ibun hodi sustenta nia nesesidade família loroloron inklui bele mos asegura oan sira bele kontinua hetan edukasaun.
Iha intervista ho inan Florentina deklara,negosiu ne’e sai ona fonte rendimentu importante ida ba nia familia,ih sorin seluk mos nia hatete nia laen servisu hanesan karpintaria/badaen konstrusaun ho maibe depende ba projetu nebe’e mak hetan, nia esplika katak iha responsabilidade atu kontribui ba ekonomia família no prepara futuru di’ak ba nia oan sira.
“Ha’u la hakarak depende de’it ba ha’u nia laen. Hanesan inan ida, ha’u mos iha responsabilidade atu ajuda sustenta família no asegura ha’u nia oan sira bele kontinua eskola,” dehan Florentina ba jornalista Média Mudansa iha Railaku foin lalais.
Tuir Florentina, rendimentu husi negósiu ne’e la diak,tanba depende ba númeru konsumidór/maksosa sira ne’ebé liu husi área ne’e. Iha loron balun nia bele hetan rendimentu husi dolares amerikanu $5 de’it, maibé iha tempu movimentu ema maka’as, liu-liu bainhira tempu feriadu ka loron bo’ot ema sosa barak no rendimentu bele to’o dolares amerikanu $20 iha loron ida.
Nia esplika, ai- sunu sira ne’ebé nia fa’an la’ós nia mak ba tesi rasik maibe sosa tutan husi ema seluk no fa’an fila-fali ho lukru ki’ik atu nune’e ema bele sosa.
“Ha’u sosa futun ida ho osan centavus $0.10 no fa’an fila-fali ho osan centavus $0.25. Lukru ne’ebé ha’u hetan la bo’ot, maibé ajuda tebes atu atende nesesidade loroloron no apoiu ha’u nia oan sira ne’ebé agora sei estuda iha nível pré-secundária,” hatete nia.
Maski enfrenta dezafiu ekonomia no rendimentu ne’ebé la permanente, Florentina kontinua servisu ho determinasaun no nia fiar katak ho esforsu ne’ebe iha no edukasaun ba oan sira mak sai dalan importante hodi bele muda familia nia situasaun difisil.
Florentina mos apela ba inan-feto sira seluk atu labele moe ka tauk hahú negósiu ki’ik, tanba servisu hotu-hotu iha valor bainhira hala’o ho onestidade no responsabilidade.
“La bele moe atu servisu. Negósiu ki’ik ida de’it mos bele ajuda sustenta família. Importante mak ita iha vontade no servisu maka’as atu alkansa moris ida ne’ebé di’ak liu,” nia hakotu.
Jornalista : Ana Maria da Silva.
Editor :Manuel Andrade
