(Díli), Metiaut,10/06/2026 – Maski estudante nain rua ne’e sei halao hela sira nia estudu iha ensinu superior iha Universidade Oriental Timor Lorosa’e (sigla-UNITAL) no ida seluk husi Institutu Ciências da Saúde (sigal-ICS), joven feto nain rua ne’e maka Benedita da Costa no Domingas Quintão, hatudu spiritu empreendedór liu husi inisiativa loke negósiu ki’ik hodi fa’an etu iha dalan ninin. Inisiativa ne’e la’ós de’it atu hetan rendimentu ba nesesidade loroloron, maibé sai mós ezemplu ba joven sira seluk kona-ba importánsia kria oportunidade servisu ba an rasik.
Iha tempu ne’ebé barak joven sira hein oportunidade servisu husi ema seluk ka instituisaun sira, Benedita da Costa no Domingas Quintão hili dalan diferente hodi hala’o atividade ekonomika ida. Ho kapital inisiál hamutuk montante dolare amerikanu $250, sira konsege hahu negósiu fa’an etu iha fatin estratéjiku ida iha dalan ninin.
Negósiu ne’e lao ona besik fulan ida no hatudu rezultadu positivu. Tuir informasaun husi estudante nain rua ne’e katak, kada loron rendimentu bele to’o dolares amerikanu $40, no iha loron balun menus liu husi ne’e, maibé la ki’ik liu husi dolares amerikanu $20. Durante períodu badak ne’e, total rendimentu ne’ebé sira rekolla ona besik dolares amerikanu $500.
Benedita da Costa, estudante iha Institutu Ciências da Saúde (sigal-ICS), no Domingas Quintão, estudante iha Universidade Oriental Timor Lorosa’e(sigla-UNITAL) dehan katak inisiativa ne’e ajuda tebes atu responde ba sira nia nesesidade pesoál no akademika, inklui despeza eskola no atividade loroloron sira.
Maski enfrenta dezafiu barak iha merkadu, hanesan osilasaun folin no sasan balun la fa’an hotu tuir esperansa, sira nain rua konfirma katak situasaun hirak ne’e la halakon sira nia motivasaun atu kontinua badinas.
“Dalaruma ami nia sasan folin, dalaruma la folin tuir ami nia hakarak. Maibé ami la hakarak para, tanba ami fiar katak ho badinas no perseveransa, rendimentu ne’e sei aumenta iha loron sira tuir mai,” dehan Benedita no Domingas ba jornalista Media Mudansa foin lalais ne’e.
Sira mos hatete,rendimentu husi negósiu ne’e sei sai baze importante ida atu dezenvolve negósiu seluk iha futuru. Karik lukru ne’ebé tama kontinua aumenta, sira planeia atu espande atividade emprezáriu sira liu husi loke loja,fa’an OB ka roupa inkllui loke salon beleza.
“Karik iha futuru rendimentu tama di’ak liu tan, ami hakarak loke negósiu seluk hanesan fa’an OB, loja roupa ka salon hodi aumenta tan oportunidade ba ami no mos bele fó oprtunidade ba ema seluk,” dehan sira.
Istoria no idieia husi joven Benedita da Costa no Domingas Quintão hatudu katak juventude sira iha kapasidade atu kria mudansa liu husi inisiativa no kreatividade. Maski ho kapital limitadu no dezafiu merkadu ne’ebé la fasil, sira konsege transforma ideia simples ida sai fonte rendimentu ne’ebé ajuda sustenta sira nia moris no estudu.
Jornalista :Zeferino da Silva
Editor :Ana Maria
