(Díli)- Parlamentu Nasionál (PN) halo diskusaun no debate iha faze jeneralidade ba Projetu Lei No. 10/VI kona-ba Rejime Jurídiku Seguransa Sosiál ba eis Titulár Órgaun Soberanu, no revogasaun Lei benifísiariu Pensaun Mensál Vitalísia (LPMV) ba Titulares Órgaun soberanu no aprova halakon totál lei Pensaun Mensal Vitalísia, ho voto A-favor 61, Kontra zero (0), abstensaun zero (0).
Prezidente Parlamentu Nasionál (PPN), Maria Fernanda Lay, prezide plenária estraordinária PN, nune’e halo diskusaun no votasaun ba projetu lei rua refere, iha faze jeneralidade.
Projetu lei nú 10/VI (3a) Vota A-favor 22, kontra 38, no abstensaun 1, nune’e la pasa, no rezultadu votasaun ba projetu lei númeru 11/IV (3a) A-favor 61 kontra zero (0) no abstensaun zero (0), ho nune’e pasa iha jeneralidade.
Iha intervensaun Deputadu Bankada CNRT Patrocínio Fernandes hatete, halakon totál lei pensaun vitalísia.
“CNRT iha konsisténsia atu halakon totál lei pensaun vitalísia, halakon hotu hosi retroativa, hatur justisa,” Dehan Deputado Patrocínio Fernandes, iha Parlamentu Nasionál, Kinta, 25/09/2025.
Nune’e Deputada KHUNTO Olinda Guterres afirma, apoiu halakon totál lei pensaun vitalísia, laiha ema ida mak simu osan, sein halo servisu.
“Apoia halakon totál lei pensaun vitalísia, nune’e labele iha ema ida hetan osan sein halo servisu ruma, ha’u apoia projetu númeru 11 katak halakon totál pensaun vitalísia,” Afirma Deputada Olinda
Bankada PD liu hosi nia Xefe Bankada Manuel Henrique informa, PN laiha rezerva hodi halakon totál lei pensaun vitalísia.
“PD laiha rezerva hodi halakon lei pensaun mensal vitalísia, ha’u deputadu foun hakarak halo buat foun, agradese ba juventude sira,” Nia afirma
Deputada Bankada FRETILIN Cristina Yuri Rebelo dos Santos Costa sublinha apoia “halakon lei pensaun vitalísia tanba ne’e mak igualdade no Justisa sosiál,” Nia deklara
Deputada PLP Ermenegilda Laurentina hatete, PLP iha komitmentu hodi hapara privilejiu desproporsionál sira ne’ebé kria injustisa sosiál ba ema timoroan hotu.
“To’o ona tempu ita hotu ho komitmentu hodi hapara privilejiu desproporsionál sira ne’ebé kria injustisa sosiál ba ema timoroan hotu, hodi integra ukun nain sira ho sira nia titularidade iha rejime ida bolu naran Rejime Kontributivu no Seguransa Sosiál,” Subliña deputada PLP.
Parlamento Nasionál Sesta Lejislatura hatudu ona vontade no halo ona esforsu lubun ida, halo andamentu ba prosesu Lejislasaun nu’udar jestu ida hodi rona preokupasaun sosiedade nu’udar pasu importante hodi konsolida konfiansa sidadaun sira ba estadu no nasaun.
Deputada PLP ne’e hatutan importante tebes, kualker inisiativa lejislativas tenke tane aas ba Konstituisaun da Repúblika Timor-Leste no Estado de Direitu Demokratiku. “Tanba ita hotu hatene katak inisiativa Lejislativa bazeia ba justisa sosiál no prinsípiu igualdade nian,” Nia hatutan
Nune’e mós iha ámbitu debate jeneralidade ne’e, bankada FRETILIN, Deputada Nurima Ribeiro Alkatiri, apoiu totál atu halakon lei pensaun mensál vitalísia, nune’e bele reforsa fali setór produtivu, atu hadi’a povu nia moris.
Enkuantu, bankada Parlamentares sira bele iha konsensu hodi armoniza projeitu rua ne’e sai ida de’it, nune’e hamosu testu subtitutivu atu Parlamentu Nasionál aprezenta diploma ida ne’ebé ho objetivu transforma sistema atuál ba sistema ne’ebé justu no sustentável ba estadu no nasaun.
Entretantu, durante diskusaun hetan atensaun bo’ot husi públiku no estudante universitáriu sira iha resintu Parlamentu Nasionál nia oin. ,
Jornalista: Francisco Pereira/ Olvadis Clara da Costa.
Editora: Sandi Belo
