(Díli)-Liseu- Bankada Governu PD, CNRT no KHUNTO realiza komferensia Imprensa hodi deside kansela sosa kareta ba deputadu 65 iha parlamentu nasional tamba hetan protesta husi kamada sosial no estudante universitariu sira.
Tuir reprezentante Bankada Governu Deputadu Patrocínio Fernandes hateten, Bancada CNRT, PD no KHUNTO konsiente katak desizaun sosa kareta la reprezenta preokupasaun públiku, haree ba ezijénsia deputados 65 no difikuldades ne’ebé sekretariadu Parlamentu Nasional enfrenta nu’udar aproveitamentu polítiku hodi hamosu instabilidade.
“Ohin, Bancada CNRT, Bancada PD no Bancada KHUNTO hakarak hala’o konferensia Imprensa ida-ne’e atu esklarese ba públiku tomak kona-ba pozisaun Bancada Governu nian deside hodi husu ba Parlamentu Nasionál atu kansela prosesu akizasaun karreta” Dehan Deputadu CNRT Patriosino, Iha Parlamentu Nasional, 15/09/2025.
Vise-chefe Bankada Partidu Congresso Nacional da Reconstrução Timorense (sigla-CNRT) fundamenta, Bankada Governu halo análize ba polémika sosa kareta, indika katak própriu deputados balun direta no indireta esplora situasaun ne’e ba sira nia interese polítika partidária no grupu
“Deklarasaun ne’ebe hato’o husi Bankada Governu konsidera hanesan resposta politika ba voz povu, ne’ebé hatudu atravez manifestasaun sira hodi deside resposta ba prekupasaun ne’ebe povu reklama iha loron ohin” nia deklara
Enkuantu Kordenador Estudante Universitariu Timor-Leste Natalísio Nunes komfirma katak iha dialogu ho Presidente Parlamentu Nasional deside kansela imediatamenti prosesu sosa kareta Pradu ba deputadu sira, no promete kontinua diskute alterasaun ba Lei manifestasaun no Lei Pensaun Vitalísia antes lori ba plenária.
“Ami representa estudante sira halo dialogu ho Presidente Parlamentu Nasional. Objetivu mak atu bele deside desizaun sira tuir ezizensia EUTL, no sira deklara imediata katak hapara prosesu ezekusaun sosa karreta Pradu 65 ba deputadu sira” nia hatutan.
Nia husu atu kansela sosa kareta Prado ba deputadu sira no husu kona-ba alterasaun ba Lei pensaun vitalisia no lei Manifestasaun no Liberdade Manifestasaun,ne’ebe mak ho prosesu sei kontinua iha Parlamentu Nasional.
“Ami hein desizaun final liu husi rezolusaun ne’ebé sei hato’o,ami sei kontinua akompaña, no karik rezolusaun la afavor estudante sira nia ezizensia, ami sei kontinua kontra, Terseru, kona-ba alterasaun ba Lei Pensaun Mensal Vitalísia, iha dialogu ne’e Presidente Parlamentu Nasional hamutuk ho bankada PD, KHUNTO no CNRT hateten katak semana ida ne’e sei iha rezolusaun, sei lori ba plenária no sei fo sai ba públiku” nia argumenta
Entretantu, tuir observasaun iha loron dahuluk Estudante Universidade Timor-Leste (sigla-EUTL) halo asaun pasífika kontra Parlamentu Nasionál sosa kareta Prado ba deputadu 65 mosu polemika entre manifestante ho seguransa Polísia Nasional Timor-Leste (sigla-PNTL) hodi rezulta estudante balun kanek, karreta patrolia Polisía ida rahun no karreta korpu diplomat aida hetan estragus iha Vidru kotuk, Wainhira polísia sira ne’ebe presente iha fatin tiru gás lakrimogêneu, estudante sira halai namkari, barak monu iha fatin, hetan kanek, no barak trauma no tanis.
Jornalista. :Rogerio Anuno
Editor. :Sandi Bello
