(Díli) Tasi tolu- Negosiante ambulante Antonio Neno hanesan funsionariu kontratadu iha Ministeriu Edukasaun(sigla-ME) destaka iha Rejiaun Administrativa Espesial Oe-Cusse Ambeno (RAEOA), hafoin nia remata kontratu nia (Antonio) kontinua ho negosiu fa’an pentolan iha área tasi tolu hodi bele kontinua sustenta fila fali nesesidade báziku uma laran nian.
Hafoin intervista ho negosiante ne’e nia hatete, uluk liu nia hanesan funsionario kontratadu iha Ministeriu Edukasaun (sigla-ME) iha departamentu Asosiasaun Merenda Eskolar Munisipiu (RAEOA), hafoin termina husi kontratu nia kontinua buka dalan halo negosiu hanesan fa’an pentolan iha dala ninin ho motor hodi bele sustenta fila fali ekonomia fali.
“Bainhira ha’u nia kontratu remata ha’u koko buka servisu seluk la iha, entaun ha’u hili dalan kria negosiu rasik hanesan fa’an pentolan ho motor haleu dili laran hodi bele ajuda fali ekonomia familia uma laran”, dehan negosiante Antonio Neno ba jornalista Média Mudansa iha Tasi Tolu foin lalais ne’e.
Nia salienta,maske negosiu nia halo la fó benefisiu bo’ot ba nia familia maibe husi negosiu nia senti diferente tebes ho servisu anterior hanesan funsionario kontratadu,aliende ne’e negosiu ne’e rasik bele apoiu nia alin nain tolu ne’ebe remata ona eskola iha universidade balun.
“Negosiu ne’ebe hau’u halo bele ki’ik maibe bele ápoiu alin nain tolu hodi remata sira nia estudu iha estudu Universidade” nia deklara.
Nia kompara servisu anterior ho negosiu ne’ebe nia halo diferente tebes tamba uluk hanesa funsionario kontratadu simu salariu kada fulan, maibe ho negosiu nebe nia halao kada loron bele hetan to’o dolares amerikanu rua-nulu ($20) ou bele mos liu to’o dolares amerikanu tolu-nulu ($30) nune’e nia deklara katak osan refere bele ajuda nia familia
“Loron ida ita bele rai $20 dolar seitap ha’u sura $20 to’o 30 dolar liu fali funsionariu nune’e ha’u bele suporta ha’u nia alin nain 3 remata estudu iha banku Universidade”, nia deklara
Enkuantu negosiante Antonio Neno nafatin husu ba joven sira labele atu hein governu hodi kria servisu maibe koko loke rasik oportunidade ki’ik sira hanesan negosiu. No nia hatete labele lakon ho oportunidade no labele halerik bebeik ba governu kria saida maka bele fó benefisiu ba ita.
Jornalista : Frederica do santos serra/ Rogerio Anuno.
Editora :Sandi Bello
