(Díli) Jardin 5 de Maiu– Negosiante Cecília da Conceição hala’o negósiu iha jardin 5 de maiu hodi atende ba nesesidade uma laran, no mós atende ba oan sira nia estudu.
Negosiante Cecília da Conceição hatete, moris iha família ne’ebé diferente lalika tur iha uma de’it tanba hela iha sidade Díli buat hotu prezisa osan.
“hala’o negosiu ida ne’e tanba ami nia moris loro-loron mak hanesan ne’e ona hanesan fa’an sasan sira hodi hetan sentavus 0,10 ou sentavus $.0,25 ida ne’e hodi sosa hahan sira no hare’e oan sira nia eskola, ha’u nia katuas oan la servisu entaun ha’u ajuda nia hodi buka osan”, dehan negosiante Cecília da Conceição ba jornalista Média Mudansa iha jardin 5 de maiu, segunda, 14/04/2025.
Negosiante ne’e hatutan, nia hahú negósiu ne’e ho modal dólar sanulu $10 hodi sosa sasan sira ba fa’an iha jardin 5 de maiu, nune’e kada loron nia hetan $10 dólar to’o $15 dólar husi negósiu ne’ebé nia fa’an mak hanesan sigaru, pulsa, bee, Pop mie, kafe, Good day, inklui mós sira seluk.
“hahú negosiu ida ne’e ho osan dólar sanulu ($10) hodi ba sosa sigaru, pulsa, bee, Pop mie, kafe,Good day no sasan sira seluk hodi mai fa’an iha ne’e, no osan ne’ebé ha’u hala’o negósiu ida ne’e ho ha’u nia osan rasik, no loke negósiu ne’e iha tinan 2018 to’o ohin loron, no ha’u hala’o negósiu ne’e kada loron ha’u hetan dólar sanulu resin lima ($15) ou dólar sanulu ($10), maibé ha’u nafatin agradese tanba loron-loron hetan dólar sanulu resin lima ($15) to’o dólar sanulu ($10) no osan sira ha’u hetan ne’e hodi sustenta nesesidade loro-loron, no mós hare’e fali ba oan sira nia eskola”, nia konta.
Iha dadersan madrugada oras tuku ne’en (6:00) otl, negosiante Cecília prepara nia sasan komesa hi’it ain sai husi nia horik fatin Fatumeta ba hala’o nia atividade rutina hanesan bai-bain iha jardim 5 de maiu husi dader to’o kalan tuku hitu (7:00) mak foin fila ba uma.
Cecília haktuir, difikuldade ne’ebé nia hasoru mak dalaruma guarda munisípiu ba duni sira tenki halai husi fatin ne’eba, maibé sira nafatin ho fuan bo’ot hodi kontinua fa’an.
Entretantu negosiante Cecília da Conceição ho idade tolu nulu resin sia (39) husi Munisípiu Ainaro, Postu Administrativu Maubisse’ hanesan kaben nain ho oan nain ne’en (6) maibé nia oan ikun mak sai hanesan ema ho defisiensia, nia oan nain lima (5) seluk eskola hotu.
Jornalista : Inácio Silva/Estagiadu: Hilário Chayfan
Editora : Gaudencia Belo
