(Dilí) Kapela São João Bosco Beto- Selebra misa semana santa Domingu Ramos hanesan sarani katolika sira fó omenajen no onra ba jesus kristu nia terus no mate iha kruz, nune’e atu hametin nafatin sarani katolika sira nia fiar iha tempu kuarezma.
Tuir Padre Selebrante Hermenegildo Pereira iha nia omilia hatete, loron ohin hanesan semana santa ba Domingu Ramos tamba ne’e importante tebes ba sarani sira hotu hodi hanoin no fó omenajen ba nai jesus kristu nia terus no mate.
“ Durante tempo kuarezma ita tenki halo buat tolu (3) ne’ebe konsidera importante tebes mak hanesan, hader mai halo orasaun ho ismola no fo karidade” hateten Omilia padre selebrante Hermenegildo Pereira iha kapela São João Bosco Beto Díli Loron, 13/04/2025.
Nia hatutan,tempu Kuarezma hahu hadia a’an hodi simu penetensia karidadae hamutuk ho kreda, halibur a’an hamutuk hodi hanoin loron paskua tamba loron ne’e maka nai jesus kristu hetan terus no mate iha kruz hafoin liu loron tolu nia moris hias, ohin no horseik nai jesus kristu tama iha jerusalem atu halo misteriu paskua nian no ohin loron laran nakloke atu hanoin tuir loron ida nee.
“ hanorin ita lao tuir jesus nia ain terus ho nia nia loron moris hias, Saida mak ai-tahan ida nee ita bolu dehan Ramos nudar simbolu ida vitoria, ramos nudar simbolu heroi iha mate nia leten , nai jesus kristu hatudu relasaun ai-tahan ramos nudar simbolu sala no mate” nia subliña.
Iha fatin hanesan representante sarani katolika José jorge, hatutan nudar ema kristaun Domingu Ramos Importante tebes tamba besik ona ba feridu paskal liuhusi ne’e hanesan sarani tenki prepara a’an hodi tuir misa solene domingu ramos tamba nai jesus kristu tama ona ba Jerusalem.
“ ita haksolok nafatin ho jesus iha ita nia le’et tamba ne’e ohin semana santa ida nee Importante ba sarani katolika iha mundu hotu ” Representante Sarani Katolika José Jorge hatutan
Nia argumenta, hanesan sarani katolika iha Timor-Leste lamenta tebes ho grupu balun ne’ebe koondena igreja katólika no lideransa igreja katolika sira katak ne’e manipulasaun no atu estraga fiar sarani relijiaun katolika iha Timor-Leste.
“ Grupu falsu ICCTL sira halo manipulasaun ba relijiaun katolika no estraga sarani relijiaun katolika sira iha timor leste, relijiaun katolika iha fundasaun nebe metin nafatin iha situasaun ohin loron. Maske mosu oioin maibe relijiaun katolika sei la muda.” Nia deklara
Nia husu ba sarani katolika sira katak, iha tempu kuarezma nia laran labele rona lia falsu ka tuir ema seluk nia relijiaun, nafatin tuir fiar relijiaun katolika no sai Nafatin katolika ida ba Timor-leste inklui hili posisaun nebe diak no tuir santu padre nebe hanorin.
Jornalista. : Rogerio Anuno
Editor. :Gaudensia Bello
