(Díli) Caicoli– Institutu Nasionál Kombate HIV-SIDA hala’o atividade Sensibilizasaun ho objetivu atu konsolida no proteze Timor oan hotu husi moras HIV-SIDA iha Timor-Leste.
Tuir prezidente HIV-SIDA Daniel Marçal hatete, objetivu husi sensibilizasaun ne’e atu konsolida, haforsa no oinsá mak atu proteze problema HIV-SIDA no tenki hamutuk hodi proteze Timor-Leste.
“Ohin ne’e importante tebe-tebes tanba xefe suku no xefe aldeia sira mak iha baze tanba hamutuk ho komunidade sira loro-loron no sira tenki iha koñesementu hodi identifika fatin risku sira ne’ebé sai hela knuk ba transmisaun HIV no labele moris hamutuk iha fatin sira ne’ebé sai hela ema balun nia tarjetu, dehan Prezidente INCSIDA Daniel Marçal ba jornalista sira iha salaun CNE, Caicoli, Kinta 13/03/2025
Nune’e nia haktuir, programa sensibilizasaun informasaun nu’udar preventivu ida ba transmisaun HIV iha Timor-Leste no programa ida ne’e nia funsaun mak atu konsensializa ema hotu hodi prevene an husi transmisaun vírus ida ne’e.
“Tanba ita hare’e iha Timor-Leste no iha mundu transmisaun HIV barak liu ne’e husi relasaun sexual no nia pursentu iha Timor-Leste iha tinan ida ne’e ami seidauk iha, maibé númeru ne’ebé ami hare’e husi Ministériu Saúde ne’e fin do ano 2024 ne’e iha ona rihun rua atus rua ona (2200)”, nia sublina.
Prezidente ne’e hatutan, Institutu Nasionál Kombate HIV-SIDA, halo ona kordenasaun ho entidade balu hodi realiza atividade seminariu sensibilizasaun informasaun HIV-SIDA no moras hada’et relasaun sexual iha ambiente ba estudante, professores, autoridade lokal no fardadus sira durante loron rua (2).
“Barak liu ne’e ita hare’e husi atividade ne’ebé produtivu tebes, bainhira ita la servisu makas no la hamutuk ita sei lakon fini barak ne’ebé potensia tebe-tebes tanba sira moris ho HIV-SIDA”, dehan Nia.
Iha fatin hanesan reprezentante Ministériu ESTATAL diretór Nasionál Apoiu Administrasaun Suku Celestino Marques hatete, Minitériu ESTATAL iha komitmentu tomak sempre fó apoiu ba iha INCSIDA hodi bele halo formasaun ba prevensaun HIV nian katak labele iha munisípiu Díli de’it, maibé bele halo iha munisípiu hotu-hotu no liu-liu ba iha munisípiu ne’ebé mak detekta ona iha risku ne’ebé bo’ot ba iha transmisaun HIV-SIDA.
“Atu ne’e ita bele iha asaun ida de’it hodi halo prevensaun ba moras hirak ne’e atu nune’e bele hado’ok ita nia komunidade no liu-liu ba ita nia joven sira ne’ebé mai ho idade produtivu atu nune’e bele prevene sira husi moras HIV-SIDA iha Timor-Leste”, tenik nia
Entretantu iha atividade refere hetan partisipasaun másimu husi Vice-Primeiru Ministro, reprezentante ESTATAL, representante Prezidente Autoridade Munisípiu Díli, Autoridade Suku no Autoridade Aldeia iha Munisípiu Díli.
Jornalista: Zemidonio Martins.
Editora: Sandi Belo
