(Díli) Merkadu Lama– Servisu hadia telemóvel sai hanesan traballu ida ba Ozorio da Silva Belo hanesan mós ho ema seluk tanba nu’udar maun tenki apoiu no presiza ajuda alin sira ho ida ne’e Ozorio hili dalan hodi hapara nia estudu tanba alin nia futuru.
Ozorio da Silva Belo hanesan foin sa’e ne’ebé mak hakarak suporta alin nia estudu no atende ba nesesidade uma laran liu husi hadia telemóvel iha dalan ninin, tanba ne’e nia rasik la kontinua nia estudu tanba hakarak hakman inan aman nia terus.
“Ha’u nia alin eskola entaun laiha ema ida mak atu tau matan ba alin nia eskola, no ha’u nia pai ho maen mós sira iha foho hanesan depedensia de’it ba vida agrikultura, entaun laiha ema ida mak atu suporta alin nia eskola, ho ida ne’e mak ha’u rasik lakohi kontinua eskola no hakarak buka osan hodi suporta alin nia eskola no da-daun ne’e alin eskola iha ensinu sekudáriu 10 de Dezembru iha klase I, dehan Ozorio ba jornalista Média Mudansa iha Merkadu Lama, Kuarta 12/03/2025.
Nune’e nia haktuir, iha Díli ne’e presiza buka osan no isin moris atu nune’e bele hetan dólar ida ka rua hodi atende ba moris loro-loron nian no hare’e ba alin nia eskola.
“Ami nia modal laiha maibé ami la’o ho fiar aan de’it, ho osan $ 20 dólar ho safenda ida to’o ohin loron ami bele bo’ok aan ba mai mós sente bele ona”, konta Ozorio
Nune’e nia hatete, osan $20 dólar nee empresta husi nia belun di’ak ida ne’ebé loro-loron sira sempre hamutuk.
“Hadia telemóvel ne’e loron ida ha’u bele hetan $30 ou $20 dólar ba karik, sorte ne’ebé di’ak liu entaun ha’u bele hetan $30 dólar ba leten, maibé tuir nia tempu de’it no depende ba ema tanba ema barak mak hatene hadia telemóvel, nia haktuir.
Enkuantu telemóvel ne’ebé mak Ozorio hadia ho marka ne’ebé mak diferente no folin mós diferente tuir telemóvel nia marka.
“Ha’u hadia telemóvel barak no telemóvel nia merek oi-oin hanesan Oppo, IPhone, Realme no seluk tan, maibé nia presu la hanesan, ba telemóvel IPhone ne’e nia layar karun, ida $15 dólar, no sira seluk ne’e bele iha $12 ou $13 dólares sira hanesan ne’e”, dehan Ozorio.
Benefisiu husi hadia telemóvel ne’e mak bele sustenta nesesidade uma laran no hodi selu kos ho folin $50 dólar no balu uza ba alin nia eskola.
Nune’e difikuldade ne’ebé nia hasoru mak dala ruma ema ba hadia telemóvel hotu ona no sira hodi la’o do’ok tiha husi nia hafoin sira fila fali ba no hatete ba nia katak telemóvel ne’ebé nia hadia la di’ak.
Difikuldade ne’ebé ha’u hasoru mak hanesan bainhira ha’u hadia di’ak tiha no sira lori la’o do’ok tiha depois lori fila mai dehan, telemóvel ha’u hadia mak la di’ak”, haktuir Ozorio.
Foin Sa’e ne’e mós rekomenda ba nia maluk foin sa’e sira tenki kuidadu tempu ho di’ak no tenki aproveita atu buka osan maske tu’ur iha dalan ninin, labele moe tanba bainhira moe mak sei la hetan buat ida no tenki hapara ona konflitu entre kór oi-oin no tenki kaer liman hodi tau iha hanoin katak futuru mak importante.
Entretantu Ozorio hadia telemóvel kuaze tinan rua (2) resin atu ba tinan tolu (3) ona, no Ozorio orijen husi Munisípiu Viqueque postu Administrativu Uatu-Carbau, suku Afaloikai, Aldeia Darlari no oan datolu iha sira nia família, ne’ebé mak kompostu husi feto rua (2) no mane tolu (3).
Jornalista: Zemidonio Martins
Editora: Sandi Belo
