(Díli) Palasiu Governu-IX Governu konstitusionál liu husi Sekretáriu Estadu Komunikasaun Sosiál (SEKOMS sigla português) asina kontratru ho média sanulu resin rua (12) hodi hametin parseria ho média plataforma dijitál online ho programa tolu (3) mak hanesan Governu Rona, Hare’e Rasik no Advertorial.
Tuir Sekretáriu Estadu Komunikasaun Sosiál (SEKOMS) hatete, hanesan representa IX Governu konstitusional hodi asina akordu koperasaun ho média plataforma sanulu resin rua (12).
“Objetivu husi asina akordu ida ne’e atu nune’e plataforma online dijitál sira bele habelar informasaun no asaun governativa nian no atividade sosiál komunidade nian ba iha públiku liu husi média meus komunikasaun sosiál nian”, dehan Sekretáriu Estadu Komunikasaun Sosiál, Expedito Loro Dias Ximenes ba jornalista sira iha salaun SEKOMS, Tersa, 11/03/2025.
Governante ne’e haktuir, iha tinan 2025 iha rekursu orsamentu ba Ministériu hotu-hotu tantu SEKOMS mós iha revolusaun nune’e SEKOMS nia akordu ne’e mós iha revolusaun ba média plataforma dijitál online sira.
“Iha programa tolu (3) ne’ebé prisipal mak ohin ita asina, iha programa Governu Rona, Hare’e Rasik no publisidade advertorial, hanesan ohin ita hotu akompaña governu rona ne’e ba iha televizaun média konvensionais sira ne’ebé iha no Programa Hare’e Rasik ne’e sei produs rasik husi SEKOMS mós iha Estudiu produsaun nian”, dehan SEKOMS.
Nune’e nia deklara, hakat tan pasu importante ida ba Governu tanba bele servisu hamutuk ho média plataforma dijitál online sira no SEKOMS sei hein média sira nia servisu no sei nafatin la’o ho di’ak.
“Mezmu Governu servisu hamutuk no halo akordu ba preparasaun programa ida ne’e, maibé Governu laiha intensaun atu interven ba iha ita bo’ot sira nia polítika editórial no depende ba polítika editórial ita bo’ot sira nian”, Nia salienta.
Tanba ne’e nia dehan, Governu husu bainhira atu fó notísia ruma liu husi média sira nia plataforma dijitál online tenki respeita nafatin ba kódigu étika jornalizmu nian no bainhira notísia ida atu fó sai tenki hare’e fila fali no mós presiza halo investigasaun.
“Tanba ne’e husu ba kolega sira produtu jornalístika sira ne’ebé imi halo tenki liu husi investigasaun tanba ne’e IX Governu mós servisu hamutuk ho Konsellu Imprensa (CI sigla português) bele fó formasaun ba kolega sira ho karakter investigative”, dehan nia.
Sekretáriu Estadu ne’e dehan, orsamentu ne’ebé aloka ba média sanulu resin rua (12) ne’ebé mak asina kontratu ho SEKOMS ne’e hamutuk dólares rihun ne’en nulu (60.000).
“Orsamentu ba Média plataforma dijitál online sira ne’ebé ohin asina ne’e hamutuk seis senta Mill dólares USD (60.000) no kada instituisaun depende ba média plataforma dijitál online sira nia produsaun, orsamentu 60.000 ne’ebé SEKOMS tau ne’e tantu bainhira Média plataforma dijitál online sira produz hotu no invoice mai bazeia ba média sira nia produsaun no asina kontratatu durante tinan ida”, hakotu SEKOMS
Entretantu média plataforma dijitál online sira ne’ebé asina kontratu ho SEKOMS hamutuk sanulu resin rua (12) mak hanesan; Grupu Média Nasionál (GMN), Televizaun Edukasaun (TVE), media VIP, Tatoli.IP, Lafaek News, Lian Orluli, G-RTV, Média Mudansa, Sapnews no Hatutan.
Jornalista: Zemidonio Martins /Estaziadu: Timotio Belo.
Editora: Sandi Belo
