(Díli) Farol-negosiante fa’an nuu iha tasi ibun farol suku Motael postu administrativu Cristu Rei munisípiu Díli sente kontente tanba kada loron hetan rendimentu di’ak.
Elezito Alves da Cruz hatete, durante ne’e nia fa’an nu’u iha area refere sempre hetan rendimentu di’ak husi fa’an nu’u durante ne’e folin di’ak tebes tanba komprador sira sempre sosa hotu nu’u ne’ebé nia fa’an.
Iha atividade negosiu ne’e kuandu sorte di’ak bele hetan rendimentu bele to’o dolar $70 no $80 maibé sorte aat hetan de’it rendimentu kiik mak dolar $30. Husi totál ne’e kuandu to’o semana to’o fulan bele hetan dolar $300 to’o dolar 400.00 kuandu konta fulan ida bele hetan to’o dolar $1000.
“Ha’u mak hakarak fa’an tanba ita moris idade hanesan ne’e osan laiha ne’e ita buka rasik lalika depende liu ba inan aman sira hanesan orsida ita faan tuir dalan entaun ho ha’u nia atividade ne’e loron ida se sa’e maka’as liu ha’u hetan to’o dolar $ 70 to’o $ 80 hanesan ne’e de’it kuandu ladun folin tun to’o $30 dolar de’it”, dehan negosiante Elezito ba Jornalista Media Mudansa iha Farol, Sesta 28/02/2025
Nia hatete atividade fa’an nu’u ne’e mos sosa tutan husi kliente sira ne’ebé iha nu’u, hafoin bele fa’an tutan hodi hetan funan husi negosiu fa’an nu’u ne’e.
“Nu’u ne’e ha’u fa’an sosa tutan husi langanan sira ho fuan lima $2.00 entaun funan manan de’it sentavus $0,50 maibé hafoin sosa tutan no nia halo jestaun hodi aluga fali rma nia tiga roda hodi fa’an nu’u to’u fulan selu dolar $130”, nia konta.
Alen de ne’e kuandu kliente sira la lori mai husi Munisípiu hanesan Baucau, Manufahi, Liquiça entaun sira tama rasik ba buka iha Liquiça no mós Díli laran nune’e sira bele kontinua fa’an iha area Farol.
Elezito relata, antes ne’e nia halo negosiu nu’u ho nia pai ki’ik no aprende husi nia pai ki’ik, nune’e nia hili dalan halo negosiu lao mesak atu nune’e nia bele sente saida mak moris, no nia halo negosiu ne’e hahú iha 2024.
“Benefisiu ne’ebé ha’u hetan mak hanesan hodi uza ba presiza loro-loron nian no mós bele uza ba nesesidade uma laran nian no bele uza ba alin sira nia presiza”, dehan Elezito
Negosiante ne’e salienta, difikuldade ne’ebé nia hasoru mak dala ruma guarda munisípiu sira ba foti nu’u ne’ebé nia fa’an, maibé nia nafatin pasiensia hodi kontinua fa’an nu’u tanba nia moris loro-loron depedensia de’it ba fa’an nu’u.
“Maluk sira ne’ebé mak abandona hela tempu labele husik liu tempu ne’ebé fó hela mai ita tanba tempu sei la fila ba kotuk, no tempu ne’e la sai hanesan istória atu repete fila fali, no labele depedensia de’it ba ita nia inan aman ka família sira, tanba moris ne’e importante liu ba ita”, hakotu nia.
Entretantu negosiante Elezito orijen husi Munisípiu Baucau, Postu Administrativu Baguia, Suku Samalari no Aldeia Darlaoi-Kraik no negosiante iha família hamutuk nain lima (5) no nia oan ba dala rua (2) ne’ebé kompostu husi feto nain tolu (3) no mane nain rua (2).
Estajiada: Vanesa Auxiliadora Gusmão
Editora: Sandi Belo
