(Díli) Merkadu Taibesse– Leopoldino do Rego Ramalho lakohi tane liman ba inan aman atu sustenta nia estudu, tanba ne’e nia hili dalan hala’o negosiu iha merkadu Taibesse hodi selu rasik nia eskola no bele hakma’an inan aman nia servisu.
Negosiante Leopoldino do Rego Ramalho, nu’udar estudante ida ne’ebé hakarak fa’an sasan hodi sustenta rasik nia eskola no bele atente moris loron-loron nian.
Tuir Negosiante Leopoldino do Rego Ramalho hatete, sasan ne’ebé nia fa’an la iha ema ida mak haruka nia atu fa’an, maibé husi nia inisiativa rasik hodi hili dalan hakarak atu buka osan, hodi sustenta nia eskola, no nesesidade loro-loron hanesan foto kopi ho sasan sira ne’ebé mak nia presiza inklui mós ba osan transporte nian.
“Durante ne’e nia fa’an de’it sasan hanesan, sakola, sampo, plástiku no sira seluk, no sasan sira ne’ebé nia fa’an uza nia modal rasik husi dólar $7 (hitu) husi modal ne’ebé nia hetan kada loron ho dólar $8 (Ualu), dólar $3 (tolu) ida ne’e hanesan depende de’it ba ema sira ne’ebé sosa, no husi sasan ne’ebé nia fa’an ne’e atu sosa kadernu, lapizeira, sapatu, farda eskola no mós sira seluk”, dehan Leopoldino do Rego Ramalho ba Jornalista Média Mudansa iha nia fatin Merkadu Taibesse, 7/2/2025.
Negosiante Leopoldino do Rego Ramalho, hela iha bairo Likintai, no fa’an sasan iha merkadu Taibesse hamutuk ho nia kolega sira, negosiante ne’e nia hakarak ba oin nafatin kontinua ho negosiu ida ne’e, hodi hetan osan atu nune’e nia bele fa’an fali sasan sira seluk hodi aumenta ba nia nesesidade loro-loron.
“Ha’u nia hakarak ba oin atu kontinua nafatin ha’u nia negosiu nune’e bele hetan osan hodi fa’an fali sasan sira seluk hodi atende ba ha’u nesesidade loro-loron nian”, haktuir nia
Negosiante Leopoldino do Rego Ramailho nia mensajen ba nia mane maluk sira katak labele tane liman bei-beik ba inan aman tanba sira iha foho servisu la hatene kolen no la hatene deskansa, tanba ne’e koko fa’an saida mak ita iha, atu bele hakma’an sira nia uma laran.
“Ha’u nia mensajen ba maluk mane sira atu labele tane liman bei-beik bai nan aman, tanba dala- ita la hatene sira iha foho ne’eba servisu la hateten kolen no sira la hatene atu deskansa, tanba ne’e ita tenki koko buka osan ho maneira ne’ebé maki ta iha hodi nune’e bele hakma’an ita nia uma laran”, tenik nia
Entretantu Leopoldino do Rego Ramailho ho idade 16, hanesan oan da-ha’at husi aman Afonso do Rego no inan Domingas Mendonça, Leopoldino iha maun alin nain lima (5) kompostu husi mane na’in tolu (3) no feto na’in rua (2), enkuantu Leopoldino husi Munisípiu Ainaro, Postu Administrativu Maubisse.
Jornalista: Inácio Silva/Rogerio Anuno
Editora: Sandi Belo
