(Díli) Balide- Segunda ne’e Média Mudansa hetan vizita ofísial husi prezidente Konselho Imprensa (CI sigla português) ho objetivu atu hare’e direita Média Mudansa nia fatin no rekursu sira, antes prezidente termina nia mandatu.
Tuir prezidente Otélio Ote hatete, vizita ida ne’e nia objetivu, importante liu mak atu hare’e direita média ne’e nia fatin no atu hare mós nia rekursu lolos ba média sira no iha plenaria dala-ruma CI lahatene média nia kondisaun lolos.
“Duke ita ko’alia uza imazinasaun de’it, di’ak liu ita vizita para ita ko’alia kona-ba plenaria no ita sente buat hirak ne’e los”, dehan Prezidente Otélio Ote ba estrutura média mudansa, iha edifisiu MD, Balide, Segunda 10/02/2025.
Prezidente ne’e haktuir, Média rejistu iha Conselho Imprensa hamutuk 53, tanba ne’e sira koko atu buka dalan hodi hare’e media sira ne’e sei eziste no sei halo atividade jornalistiku ka lae?.
“Iha semana kotuk ha’u assina tiha ona notifikasaun ba média balun ne’ebé rejistu maibé la halo atividade jornalista nian”, dehan Otélio Ote
Prezidente ne’e relata, vizita média sira hotu, tanba iha tinan kotuk CI vizita média sira iha munisípiu hasoru mós jestór sira no uza mós oportunidade hasoru Prezidente Autoridade Munisípiu no Polísia sira atu bele halo komunikasaun ho jornalista sira, nune’e bele promove mós liberdade asesu informasaun, liberdade imprensa no liberdade espresaun opiniaun.
Nune’e nia dehan, atu hari’i Média tenki iha karteira professional rua ba leten no tenki komprende lei komunikasaun sosiál nian no lee mós estatutu CI nian.
“Bainhira imi hari’i média, imi tenki iha karteira professional rua ba leten no tama ba lei komunikasaun sosiál hodi lee textu sira, nune’e lee artigu sira no lee mós estatutu CI nian atu nune’e bele hatene no tama ba regulamentu sira iha Conselho Imprensa”, hakotu nia.
Entretantu iha vizita ne’e hetan partisipasaun husi Prezidente Conselho de Imprensa de Timor-Leste Otélio Ote ho nia ekipa monitorizasaun média nian no partisipa maximu mós husi estrutura média mudansa ho nia ekipa.
Jornalista: Zemidonio Martins
Editora: Sandi Belo
