(Díli) Becora-Eskola Sekundáriu Jeral (ESG) 5 de Maio menus fasilidade ba estudante sira hanesan menus sala de aula, laboratoriu, IT, biblioteka no seluk tan ne’ebé mak difikulta estudante sira nia prosesu aprendizajen.
Tuir Direitór Eskola Ensinu Sekundáriu Jeral (ESG) 5 de Maio Casimero Dias Marques hatete, fasilidade eskola menus tebes ba estudante sira atu aprende hanesan menus sala de aula, sala laboratoriu, IT, biblioteka no seluk tan, hirak ne’e mak menus tebes ba estudante sira atu asesu.
“Fasilidade sira hanesan sala de aula, laboratoriu, IT, biblioteka ne’e menus tebes atu estudante sira asesu, tanba laiha fatin ba estudante sira atu halao Pratika, tanba ida ne’e mak iha tinan 2024 ami hein hela edifisiu foun ne’ebé mak lokaliza iha eskola ida ne’e nia sorin to’o ohin loron seidauk remata,” dehan Direitór ne’e ba Média Mudansa iha nia rezidensia Becora, Kinta 9/01/2025.
Nia hatutan, difikuldade bo’ot ba nia estudante sira tanba menus sala de aula, tanba ne’e mak estudante sira la Pratika, tanba menus fasilidade barak husi eskola refere.
“Ami hanesan dirizente eskola nian preokupa tebes ho estudante sira nia presiza maibé ami hato’o ona ba parte relevante sira hanesan Ministériu Edukasaun faz parte ba diresaun infrastrutura edukasaun nian maibé to’o ohin loron seidauk responde preokupasaun eskola ida ne’e nian,” informa nia.
Nia salienta, fasilidade ne’ebé mak sira presiza mak hanesan estabelese ba eskola nia laboratoriu, IT no aumenta sala de aula, tanba laiha fatin atu tau manual ba estudante sira nian no estudante labele atu halo pratika ruma kona-ba siensia ne’ebé mak sira aprende ona nia teoria, no hirak ne’e mak sai problema bo’ot ba estudante sira.
“Husi parte edukasaun sira mai vizita direitamente iha eskola ida ne’e maibé to’o ohin loron seidauk iha informasaun kona-ba atu halo kontinuasaun ba projetu ida ne’e,” Salienta Casimero.
Enkuantu Diretór ne’e salienta, ensinu sekundáriu jeral 5 de maio hanesan eskola públiku ida ne’ebe atu transforma no reforma mentalidade estudante nian husi ladiak ba diak, no eskola nia mehi mak hakarak transforma ema ida atu hatene nia aan nu’udar ema lolos katak nia kakutak labele tau seluk hodi nune’e bele organiza no lori estudante ba diak hodi produs no fasilita estudante ho kapasidade intelektual ne’ebé naton iha kontekstu global iha valór kultural, moral, espiritual no iha kapasidade hodi uza siensia ho responsabilidade atu dezenvolve nasaun.
Entretantu, estudante foun no tuan iha eskola Ensinu Sekundáriu Jeral 5 de Maio hamutuk rihun ida tolu-nulu resin ne’e (1.036) no professores sira hamutuk lima nulu resik neen (56).
Jornalista: Zemidonio Martins.
Editora: Sandi Belo
