Dezafius La Sai Bareira Ba Carlota Hodi Hala’o Negosiu Tanba Oan Nia Futuru

banner 120x600

(Díli) Merkadu Manleu– Tanba nesesidade moris Carlota la hare’e ba dezafius moris ne’ebé nia hasoru, nia nafatin esforsu hodi hala’o negosiu fa’an modo atu hetan Netik dólar ida ka rua hodi bele sustenta família uma laran no selu oan sira nia eskola, tanba oan sira nia futuru mak importante liu.

 

“Ha’u hakarak hala’o negosiu fa’an ida ne’e tanba vida negosiu la sai sasukat ba ita ema, tanba moris iha mundu presiza osan no buat barak, banhira fa’an modo hanesan ne’e ita bele sustenta família uma laran no hetan netik osan oituan karik bele selu mós ba ha’u nia oan sira nia eskola, hanesan inan tenke esforu a’an hodi buka osan, ita labele tu’ur iha uma de’eit”, dehan negosiante Carlota de Carvalho ba jornalista Média Mudansa iha merkadu Manleu Kuarta, 29/01/2025.

 

Negosiante ne’e deklara, maske loron manas no udan, maibé nia pasensia nafatin hodi tu’ur iha merkadu laran fa’an modo, bainhira tempu udan makas ema sosa ou la sosa maibé nafatin sé isin ba udan be’en hodi buka moris.

 

“Hanesan ami tu’ur iha ne’e keleur ami nafatin tu’ur iha ne’e, ema atu sosa ou la sosa ami nafatin pasensia, tanba kabun nia presiza, primeiru ha’u atu hala’o negosiu ida ne’e ami uza modal rasik, modo ne’ebé ami fa’an mak hanesan, brinjela, mostrada, kanku, tomate, li’is, foos-rai, fore no sira seluk”, afirma nia.

 

Negosiante Carlota hahú nia negosiu fa’an modo iha tinan 2013 to’o ohin loron, rendimentu ne’ebé nia hetan husi fa’an modo kada loron id abele hetan  dólar 30 to’o dólar 40 ba leten, banhira ema sosa barak loron ida bele hetan dólar 50.

 

“Bainhira udan bo’ot entaun ema la dun sosa ami nia sasan tanba be’e nalihun to’o iha estarada,  entuan ita nia kompradores sira susar atu tama mai hodi sosa no defísil oituan, modo sira ne’ebé mak ami fa’a ne’e ami sosa tutan husi ema hanesan dader kareta tama ona mai, entaun ami ba sedu hodi sosa modo ne’ebé mak menus hodi aumenta fali atu bele fa’an kontinua”, haktuir negosiante Carlota

 

Dezafius ne’ebé mak negosiante Carlota hasoru hanesan, banhira tempu udan modo ne’ebé sira fa’an bele dodok, tanba ema la dun sosa, udan be’en kona hela de’it nia bele sai dodok hotu, entaun lori fila ba uma fó fahi no ida ne’ebé dodok liu bele soe ba lixeiru fatin.

 

“Ha’u nia mensajen ba maluk feto no jeven sira katak, tempu agora ita labele tu’ur iha uma de’it, maibé tenke hatene buka osan hodi bele sustenta família uma laran no labele moe atu halo negosiu saida de’it, hakarak ou lakohi ita tenke halo negosiu oituan atu bele ense ba ita nia kabun”, Hakotu Negosiante Carolta de Carvalho

 

Estajiariu:        Rogerio Anuno/ Dwi Magno

Editora:           Sandi Belo

banner 325x300