(Díli) Cristo-rei– Cartinha Perreira hala’o negosiu iha dalan ninin hodi hatutan moris loro-loron nian nune’e bele atende mós bao an sira nia estudu.
Fa’an sigaru ho etu iha dalan ninin mak sai hanesan servisu loro-loron nian ba Cartinha Perreira hodi sustenta ba nesesidade loro-loron nian.
“Ha’u hala’o negosiu ida ne’e bele sustenta ba moris loro-loron no selu oan nia eskola iha tinan ida selu hamutuk dólar 250”, dehan Cartinha Perreira ba Média Mudansa iha Cristo-rei, Sexta 31/01/2025.
Moris ne’ebé mak Cartinha hasoru dala ruma halo terus nia, maibe nia la rende ho moris ne’e, nafatin hamrik hodi luta ba oan sira nia futuru.
Cartinha hatete, dala ruma atu selu oan nia eskola osan la iha, entaun nia tenki empresta osan husi Empreza Moris Rasik hodi selu ba oan sira nia eskola.
“Dala ruma la iha osan atu selu oan sira nia eskola ho obrigasaun ha’u kredit husi moris rasik hodi halo pagamentu ba oan sira nia eskola”, konta Cartinha
Negosiante Cartinha hala’o nia negosiu iha Cristo-rei husi loron Segunda to’o loron Sexta nia hetan rendimentu ne’ebé mak minimu liu, iha loron sábadu ho Domingu mak nia foin hetan rendimentu ne’ebé naton ba nia.
“Iha loron segunda to’o sexta ha’u hetan rendimentu ne’ebé mak, maibé iha loron sábadu ho Domingu ami hetan rendimentu barak, maibe ida ne’e mós depende ba ema mai sosa, sé karik ema la sosa entaun ami hetan de’it 5/10 dólar, karik ema sosa ami nia sasan hotu ami senti kontenti sé la hotu ami senti triste,” haktuir nia
Nia konta tan, hanesan negosiante nia nafatin pasensia hodi halo nia negosiu tanba oan sira nia eskola no nesesidade uma laran nian.
“Maibé ha’u nafatin pasensia hodi hala’o negosiu ida ne’e tanba de’it labarik sira nia eskola no nesecidade uma laran”, tenik nia
Nune’e nia informa tan, husi loron Segunda to’o Sexta sira hala’o negosiu ho subar de’it tanba fatin ne’eba governu la autoriza komunidade atu halo negosiu.
“Husi segunda to sexta ami hala’o ami nia negosiu subar de’it tanba Estadu bandu atu hala’o negosiu iha área Cristu-rei, dalaruma sira mai hala’o patroliu no duni ami entaun pasensia ami tenki lori sasan sira ne’e halai”, hakotu nia.
Entretantu negosiante Cartinha Perreira orijem husi munisípiu Díli Postu Administrativo Nain Feto, Suku Mascarinhas, enkuantu Cartinha iha oan nain (5) ida (1) forma ona família no nain ha’at (4) mak sei eskola.
Estajiariu: Esperanca Maia/ Timotio Belo
Editora: Sandi Belo