Lixu Kontinua Naklekar Iha Merkadu Taibesse Tanba Laiha Seguransa Ne’ebé Maximu

banner 120x600

(Díli) Merkadu Taibesse-Lixu iha merkadu Taibesse kontinua naklekar tanba ekipa seguransa iha tempu kalan la iha, tanba ne’e negosiante sira ne’ebé mak husi munisípiu ba halo negosiu iha tempu kalan sempre soe lixu arbiru tanba la iha seguransa ne’ebé mak atu kontrola sira.

Ekipa Jestór Merkadu Menus Seguransa atu kontrola Negosiante sira ne’ebe Soe Lixu Arbiru tanba

Jestór Merkadu Taibesse Carlos Borges da Costa, hatete, sira forma ona ekipa hodi kontrola lixu sira iha merkadu Taibesse, maibé lixu kontinua naklekar iha merkadu laran tanba iha tempu kalan negosiante sira husi munisípiu ba halo negosiu iha merkadu Taibesse hodi soe lixu arbiru iha merkadu laran.

 

“Ami forma ona ekipa rua (2) ekipa seguransa loron no iha ekipa ida seguransa kalan atu kontrola lixu sira iha merkadu Taibesse maibé ita kontrola iha loron, kuandu iha tempu kalan ita labele ona atu kontrola tanba ekipa ida kalan ne’e paradu tiha ona, tanba ne’e mak negosiante sira ne’ebé mai husi munisípiu halo negosiu iha tempu kalan ita labele kontrola tanba iha tempu kalan ita la servisu, entaun sira mai halo negosiu soe lixu arbiru iha merkadu laran tanba ne’e mak lixu ne’e sempre naklekar arbiru de’it”, informa Jestór merkadu Taibesse, Carlos Borges da Costa ba Jornalista Média Mudansa iha Taibesse, Díli, Segunda,03/02/2025.

Lixu naklekar iha portaun merkadu Taibesse nia sorin (foto MD)

Nia hatutan, maske nune’e iha tempu dader nia ekipa sira sempre halo limpeza ba lixu sira ne’ebé mak soe arbiru iha Estrada hodi ba tau iha lixeiru.

 

“Maibé dadersan ha’u nia membru sira sempre hamo’os tutuir lixu ne’e ba tau iha nia fatin, tanba ne’e mak ha’u hato’o hela ba superior sira liu-liu ba xefe departamentu sira atu forma mós ekipa ida seguransa iha tempu kalan maibé to’o oras ne’e seidauk iha resposta”, dehan nia.

 

Jestór ne’e dehan, maske sira la iha ekipa ne’ebé halo seguransa iha tempu kalan maibé sira nafatin esforsu hodi fó apoiu seguransa iha tempu kalan, maibé negosiante sira mak la iha konsiensia atu soe lixu iha nia fatin.

 

“Ami la iha seguransa kalan, maibé ami sempre esforsu hodi fó apoiu seguransa iha tempu kalan, maibé negosiante sira mak la iha konsiensia atu soe lixu iha nia fatin, dala ruma sira soe lixu iha oras tuku 2:00 ou tuku 3:00 madrugada iha oras ne’ebé mak ami fila ona ba uma hodi deskansa mak foin sira soe foer ne’e arbiru de’it, entaun dader ami nia ekipa tenki halo limpeza fila fali ba lixu sira ne’e”, hakotu nia.

 

Jestór ne’e mós husu ba xefe departamentu jestaun merkadu tenki tau mós ekipa seguransa ba iha tempu kalan nian, atu nune’e bele halo kontrolu maximu ba iha lixu sira iha merkadu Taibesse.

 

Jornalista:  Zemidonio Martins/ Estajiadu: Hilario Chayfan

Editora:      Sandi Belo    

banner 325x300