(Díli) Merkadu Taibessi-Negosiante Merkadu Taibesse nafatin okupa espasu públiku hodi hala’o negosiu tanba ekipa seguransa iha merkadu Taibesse sei menus atu halo kontrolu ba negosiante sira.
Jestór Merkadu Taibesse, Carlos Borges da Costa, hatete, ekipa seguransa iha merkadu Taibesse sei menus hodi halo kontrolu ba negosiante sira iha merkadu refere.
“Sim, negosiante sira sei okupa espasu públiku tanba ami nia ekipa seguransa sei menus entaun labele halo kontrolu ba negosiante sira iha merkadu ne’e, tanba iha merkadu ne’e iha portaun lima (5) ou ne’e (6) kedas entaun ha’u nia ekipa ne’e fahe la to’o”, dehan Jestór Merkadu Taibesse, Carlos Borges da Costa ba média mudansa iha merkadu Taibesse, Segunda, 3/02/2025.
Nia hatutan, tuir lolos departamentu Guarda Munisípiu mak bele halo kontrolu ba hodi fó seguransa ne’ebé di’ak iha merkadu ne’e.
“Iha departamentu rua (2) ida mak Guarda Munisípiu Díli no Jestór merkadu, ha’u nia servisu mak oinsá atu halo kontrolu ka halo jestaun ba merkadu ne’e ho di’ak no oinsá mak atu hadia merkadu ne’e, sira ekipa gurda munisípiu mak tenki halo kontrolu hodi fó seguransa ne’ebé di’ak atu nune’e ita nia negosiante sira labele okupa fali espasu públiku hodi halo negosiu”, hatutan nia
Nune’e jestór merkadu ne’e mós husu ba negosiante sira atu tau lixu iha iha lixeiru ne’ebé mak governu prepara ona.
“ha’u husu ba negosiante sira atu labele soe lixu arbiru iha merkadu laran, tenki tau lixu iha fatin ne’ebé mak governu prepara ona, ita bo’ot sira tenki tau lixu iha plástiku nune’e iha oras tuku ne’en 6:00 ba leten ita bo’ot sira bele ba tau iha lixeiru fatin”, nia husu.
Entretantu negosiante sira iha merkadu Taibesse hala’o negosiu husi dader to’o kalan nune’e kontinua to’o fali iha oras dader tanba negosiante sira husi munisípiu mós ba halo hotu negosiu iha merkadu Taibesse, entaun negosiante iha merkadu Taibese hala’o sira nia negosiu la tuir oras nune’e negosiante barak mak toba de’it iha merkadu Taibesse.
Tuir observasaun jornalista média mudansa nian iha terenu nota katak iha oras loro-kraik negosiante sira okupa estrada ninin hodi halo negosiu, nune’e hodi hamosu engrafamentu iha estrada públiku.
Jornalista: Zemidonio Martins/ Estajiadu: Hilario Chayfan
Editora: Sandi Belo