Dili (Mudansa)- Portá Voz Florindo da C. Pires hanesan Estudante husi Universidade Nasional Timor Lorosa’e (UNTL), husu Komisaun Anti Korupsaun (KAK) atu hakbesik ba kampus sentral UNTL, relasiona ho polémika neébe maka estudante sira hasoru, no deskonfia ezekusaun osan kaixa UNTL iha indisius forte ba partisipasaun ekonomia.
Ho ejizensia hira ne’e Asosiasaun Akademika Estudantil hakarak rekomenda ba Reitor Auditoria Garanti kualidade Interna UNTL, atu halo nia servisu lolos no profisional hodi halo auditoriu ba ezekusaun osan kaixa UNTL no polítika finansas kaixa nian.
“Husu ba Komisaun Anti Korupsaun (KAK), atu hakat mai kampus sentral tamba estudante deskonfia ezekusaun osan kaixa UNTL iha indisius forte ba partisipasaun ekonomia, no husu ba magnifiku reitor atu tau konsiderasoens ba estudante sira nia problema konaba ejijensia ne’ebe estudante sira hato’o” Dehan Porta Voz Florindo da C. Pires ba Jornalista sira iha kampus sentral UNTL Quarta ne’e 11/12/2024
Nia Relata Universidade Timor Lorosa’e estabelese tuir dekreitu lei númeru 16/2010 neébe mak hanesan Universidade Públika ida neébe ho prinsipiu legalidade hodi garante funsionamentu hotu-hotu tuir regras ne’ebe iha.
“hare ba funsionamentu universidade nian asosiasaun akademika estudantil AAE-UNTL nota katak iha problemas barak ne’ebe akontese iha universidade liuliu iha Infrasturtura, Gestaun Finanseira, maski universidade ne’e finansia husi Orsamentu Geral Esatdu OGE, no kontribuisaun estudante nian liu husi Kaixa UNTL,” nia deklara
Porta Voz ne’e informa tan katak, problema ne’ebe akontese iha Universidade Nasional Timor Lorosa’e (UNTL), Asosiasaun Akademika Estudantil AAE-UNTL tenta informa ba estrutura universidade maibe estrutura universidade ignora no la iha tau asuntu neé ho seriu no hodi ba resolve problema sira ne’ebe komunidade akademika sira infrenta.
“konsistensia estrutura universidade nian mak Asosiasaun Akademika Estudantil AAE- UNTL hamutuk ho estudante tomak, halo asaun pasifika iha loron 09/12/2024 maibe la iha resposta husi estrutura universidade nune’e iha loron 10/12/2024 kontinua blokeia gabinete reitoria, no iha momentu mak hanesan reprezentante estudante aprezenta opsoens ba Magnifiku Reitor hanesan orgaun governasaun universidade nian, atu buka dalan hodi resolve, maibe magnifiku reitor uza nia poder no ignoransia, hodi ameasa estudante sira katak se estudante sira blokeia gabineti mak nia sei kansela graduasaun iha fulan dezembru, aktu ida ne’e puramente hatudu katak magnifiku reitor la iha kapasidade atu resolve problema universidade nian, ne’ebe afeta ba komunidade akademika no aktu ida ne’e iha tendensia lori UNTL ba rai naruk, “ Nia Relata
Porta Voz Florindo salienta tan katak, problema hirak ne’e Asosiasaun Akademika Estudantil AAE-UNTL, hakarak esklarese ba kandidatu graduadu 2024 inklui publiku ho pontu prinsipal maka hanesan, Asaun pasifika no blokeia ne’ebe estudante sira halo ne’e organiza husi Asosiasaun Akademika Estudantil AAE-UNTL ho la’ os tanba iha odiu vigansa ruma ba estrutura Universidade, no la’os tanba hetan apoiu husi 3 pessoa, maibe asaun ida ne’e mosu tanba iha problema estrutural ne’ebe komunidade akademika infrenta.
“Asaun pasifika ida ne’e, la’os ho intensaun atu kansela graduasaun iha fulan dezembru, tamba osan kaixa UNTL, no problema universidade nian, la iha relasaun ho graduasaun tamba ne’e magnifiku reitor labele uja graduasaun hodi hases an husi problema universidade nian, aproveita komunikadu imprensa ida ne’e hakarak hato’o ba magnifiku reitor hanesan orgaun governasaun Universidade nian, atu iha seriedade ba problema hirak ne’ebe akontese iha universidade tamba dezenvolvimentu universidade lao hakdasak no Asosiasaun akademika nota katak, aktu balun organizadu no iha tendensia makas lori UNTL ba rai naruk,” Nia rekomenda.
Karik estrutura la iha seriedade atu resolve problema hirak ne’e, maka estudante sira hakarak eziji ba estrutura universidade atu tau prioridade ba resolve kestaun hirak ne’ebe komunidade akademika infrenta,no estudante sira husu ba magnifiku reitor ho nia estrutura katak, ezekusaun osan kaixa la serteza ba estudante sira, tanba ne’e hakarak sira husu atu esklarese politika finansas UNTL nian ba reprezentante estudante tanba osan ida ne’e kontribui direita husi estudante sira .
“Hakarak eziji ba magnifiku reitor atu buka solusaun no resolve urjenti kazu Departamentu Pescas Ciencia Marina tanba agora dadaun estudante no profesor sira sai vitima, no eziji ba magnifiku reitor ho nia estrutura atu resolve problema infrasturtura universidade nian, liuliu kestaun emergensia sira hanesan casa de banho la sufisiente, ventuina la funsiona, no falta projetor,” Porta Voz ne’e Afirma
Entretantu estudante sira husu ba sivitas akademika UNTL atu nafatin hola nía pozisaun hamutuk ho Asosiasaun Akademika Estudantil AAE-UNTL hodi eziji sira nia direitu ne’ebe iha, no estudante sira mos husu estrutura Universidade labele ignora problema hirak ne’e mak asosiasaun akademika no estudantil sira hasoru no estudante sira sei nafatin kontinua halo asaun pasifika no blokeia.
Relasiona ho asuntu ne’e jornalista sira tenta hasoru no intervista ho Magnifiku Reitor UNTL maibe laiha edifisíu Kampus Sentral UNTL.
Jornalista :Gaudencia Belo
Editór :Sandi Belo
