(Dili) Mudansa- Primeiru-Ministru (PM), Kay Rala Xanana Gusmão halo abertura bá feira produtu lokál hodi komemora loron konsulta popular 30 Agostu ba dala XXV tinan ida ne’e.
PM Xanana Gusmão hateten, agradese bá Organizasaun Nasaun Unidas (ONU) no mós Xefe Misaun United Nations Mission in East Timor (UNAMET) Ian Martin ne’ebé partisipa mós iha serimónia ne’e.
“Obrigado ba esforsu tomak Organizasaun Nasaun Unidas (ONU) nian ne’ebé haruka Misaun United Nations Mission in East Timor (UNAMET), ida ne’e importante tebes ba ami, ita nia povu rihun ba rihun terus, ema rihun atus resin mate ita nia povu senti katak ida ne’e maka tempu lolos bá sira atu hateten ba mundu katak rezistensia ida ne’e, agradese no obrigado ONU ho ha’u nia belun Ian Martin,” dehan PM bainhira halo abertura feira iha Estadium Munisipál Dili, kuarta (28/08/24)
PM mós hato’o nia omenajen bá Eis Sekretáriu Jerál ONU nian, Saudozu Kofi Annan ne’ebé ho kompromisu hakarak rezolve problema Timor-Leste nian durante tinan-24.
“Hato’o ha’u omenajen bá Eis Sekretáriu Jerál ONU nian Saudozu Kofi Annan ne’ebé ho kompromisu hakarak rezolve problema Timor-Leste nian durante tinan-24,ha’u konsidera selebrasaun tinan 25 Konsulta Populár nu’udár onra no festa boot bá povu Timor-Leste ne’ebé hanesan éroi lolós bá Independénsia”Tenik PM Xanana
Iha sorin seluk Ministru Administrasaun Estatal (MAE) Tomas Cabral mos hateten, Ohin atividade iha Estadium ne’e la’os Municipiu Díli nian,ne’e governu sentral nian, Municipiu Díli nian halo iha Metinaro ohin loron hotu teritoriu timor laran tomak Komemora tinan 25 bá refrendu nomós prenzensa Sekretariu Geral ONU nian hanesan Primeiru Ministro Portugés nian iha Díli.
“Ita komemora loron 30 agostu kompleta tinan 25 refrendu, ita nia maluk sira ne’ebé fó sira nia vida durante refrendu ba liberdade ita hetan partisipa iha feira ne’e timor laran tomak postu Adminitrativu 67 iha ida-idak nia Postu,iha Díli ho Ministériu Sentral sira deit, iha laran ema barak hau hanoin kontinua to’o loron 31, ” Ministru Estatal Tomas Cabral
Governante ne’e afirma, ba Komemorasaun tinan ida ne’e reflesaun ida ne’e li-liu presta omenajen ba povu mak determina liberdade ida ne’e ho tema sentral komemora konsulta popular ne’ebé povu rasik mak diside nia desizaun bá libertasaun país.
“Iha Díli ita loke feira de’it iha Munisipiu sira iha kalan kulturál,jogus, komunitariu iha komute 25 lori filme ba loke iha Munisipiu no postu sira atu komemora ita nia loron konsulta popular nian, ne’e la’os governu mesak deit,maibé servisuukomite 25 servisu hamutuk ho sosiedade tomak atu ita komemora loron 25 bá loron 31 agostu,tanbá iha loron 1 fulan oin ita prepara ona ba vizita Amu Papa nian iha dia 3 to’o ona iha Jakarta signifika komemorasaun sira ne’e ita remata iha loron 31 hodi ita prepara an atu simu Amu Papa.” Ministru Estatal Tomas hakotu
Jornalista: Esperança Monteiro Soares
Editóra : Delfina Borges
