(Lautem) Mudansa– Sescko Cryelon susesu nuda’ar kompañia ida ne’ebé hari’i hosi Timoroan rasik ho nia motto ami nia hakarak ita hotu moris saúdavél ho dignu nune’e sira reáliza treinamentu kona-bá saúde bazika no profisaun promotor bá Joven lima-nulu resin-hitu iha Munisipíu Lautém, Postu-Loré
Nain ba kompañia Napoleão Ornai hateten, objetivu hosi treinamentu ida ne’e oinsá atu fó dalan bá traballadór iha kompañia refere atu lori saúde bazika bá iha komúnidade sira inklui mós atu hatene kle’an kona-bá ai-moruk idak-idak nia funsaun atu hatene mós kona-bá lala’ok hanesan pesoál promotor ida bainhira tun bá iha komúnidade nia le’et.
“Objetivu hosi treinamentu ida ne’e kompañia Sescko Cryelon Susesu loke no treinamentu bá Staff sira, atu bele treinu sira hodi maduru no kuiñese di’ak ezisténsia kompañia ida ne’e nomós hatene kona-bá profisaun nuda’ar promotór nia, hatene saída maka mina Marungiño ida ne’e, oinsá sira bele hatene bá iha terrenu lori saúde bazika bá iha komúnidade idak-idak nia le’et nomós oinsá sira bele halo promosaun kona-bá marungi, mina marungi, kapsúl marungi nomós ai-kameli kapsúl sira ne’e atu bele kuiñese no hatene para sira bele kuda marungi no ai-kameli hodi bele promove iha futuru mós”dehan nain bá kompañia Napoleão Ornai ba jornalista Media Mudansa iha Postu-Lore,Tersa-Feira(16/07/24)
Nia haktuir, traballadór sira ne’ebé maka tuir treinamentu refere maiória remata Estudu iha area Saúde nia, liu-liu iha area Saúde Públiku, Enfermajen Jerál no balun mós antes ne’e iha ona esperiénsia servisu saúde nian liu-liu iha parte atendimentu pasiente.
“Iha ne’e Staff sira ne’ebé tuir treinamentu ida ne’e barak liu sira Graduasaun iha Departamentu Saúde Públiku, mós Estudante Enfermajen sira gradua hotu ona,no agora dadaun sira la iha servisu entaun loke vaga ida ne’e hodi sira bele mai asesu no dedika sira nia aan iha ne’e bele asesu bá servisu nomós oinsá sira atu hatene kona-bá maneira kurativu no prevensaun, tanbá ita hatene katak agora ema barak mak moras ema barak mak mate tanbá de’it nia saúde ladi’ak”Nia sálienta
Nain bá kompañia mós akresenta,bainhira remata iha treinamentu ne’e kompañia fiar katak traballadór sira iha ona kapasidade ne’ebé di’ak hodi hala’o sira nia knaar idak-idak, tanbá durante treinamentu ne’e kompañia fasílita ona materia barak bá traballador sira,liu-liu materia hanesan Lei natureza no mindset cleaning.
“Depois treinu sira mentáliza sira nia mentálidade ida ne’e hotu sira sei tun bá iha Dili hafoin sira sei tun terrenu hodi servisu no promove programa Saúde bazika ne’e bá iha komúnidade no bá iha produtu herbál bá iha komúnidade nomós produtu marungi ne’e bá iha komúnidade,”katak Nia
Iha fatin hanesan prezidenti komisaun bá iha treinamentu refere mós hatutan,traballadór sira ne’ebé maka tuir treinamentu antes ne’e sira mós liu hosi selesaun bá vaga ne’ebé maka hosi kompañia Sescko Cryelon susesu públika no sira ne’ebé maka ultrapassa ona iha faze selesaun dokumentus no intervista.
“Prosesu antes sira mai tuir treinamentu ida ne’e primeiru kompañia loke vaga no sira aplika no hirak ne’ebé maka liu ona iha selesaun dokumentus no intervista maka tuir treinamentu ida ne’e,”Tenik prezidenti Komisaun Bonifasio
Nia relata tan, durante sira tuir treinamentu ne’e materia barak mak kompañia fasílita ona bá iha traballadór sira oinsá atu bá aplika fali iha públiku bainhira sira fila-fali bá iha kapitál no fatin ne’ebé maka sira lokáliza bá.
“Durante sira tuir treinamentu ne’e materia lubuk ida maka sira aprende sira tuir tiha treinamentu ida ne’e sira bele aplika fali ba iha komúnidade sira, treinamentu ida ne’ebé sira hetan primeiru maka sira hetan estilu aprezentasaun, sira mós aprende kona-bá Lei natureza aumezmu tempu ita mós hetan treinamentu bá alata ida ne’ebé maka naran kuantum no ita mós sei iha treinamentu kona-bá produtu sira ne’ebé iha mós informasaun bá nain bá kompañia hodi bele esplika bá sira kona-bá istória hosi kompañia no priense mós atividade hanesan desportu no fahe esperiénsia,”Tenik Nia
Nia esplika, traballadór sira ne’ebé maka tuir treinamentu refere hamutuk lima-nulu resin-hitu (57) kompostu husi hosi mane nain sanulu-resin hitu (17) no feto hamutuk haat-nolu (40).
Iha sorin seluk partisipante Evangelina do Rosário mós hatutan, nia parte senti kontenti tanbá bele haknaar aan ona iha kompañia Sescko Cryelon Susesu liu-liu iha parte promotor nia, no liu hosi treinamentu ida ne’e bele kapasita ona hirak ne’ebé hanesan traballadór foun bá iha tinan ne’e nia.
“Ha’u sente kontenti no agradese tebes tanbá bele hola parte iha kompañia ida ne’e nuda’ar pesoál promotór bá iha kompñia ida ne’e, ha’u senti orgullu no kontenti liu hosi treinamentu ida ne’e bele forma ha’u no ami sira ne’ebé foun atu bele lori saúde baziku hakbesik liu bá iha komúnidade sira, ami nu’udar pesoál promotór presiza tebes treinamentu ida ne’e atu nune’e bainhira ami lori informasaun bá komúnidade karik ami bele hatene didi’ak ami nia profisaun no bainhira ami lori ita nia produtu bá iha komúnidade bele hatene funsaun hosi produtu ida ne’e oinsá atu kura ka halakon moras ne’ebé sira enfrenta hela,” Nia sublina
Partisipante ne’e garante katak,materia ne’ebé durante kompañia fasílita ona bá sira, sei tatóli liu tan bá komúnidade sira ne’ebé presiza tebes informasaun liu-liu iha parte saúde bazika nia, tanbá iha situasaun reál komúnidade barak seidauk iha kuiñesimentu kona-bá saúde bazika .
“Treinamentu ida ne’e ha’u garante katak fila hosi fatin ida ne’e bá Dilí ha’u aplika duni saída maka ami aprende iha ne’e,tanbá ha’u nia pozisaun nuda’ar promotór tan ne’e informasaun ne’ebé maka kompañia fó mai ami sei habelar liu tan bá iha ita nia komúnidade sira ne’ebé maka presiza tebes informasaun oinsá ami lori saúde ne’e hakbesik liu bá iha komúnidade sira’’ Nia hakotu
Entretantu mensajen hosi kompañia bá iha traballadór sira maka, labele lakon esperansa no labele ta’uk atu hasoru obstaklu, nafatin iha esperansa bá servisu no hatudu liu tan profesionál servisu bá iha komúnidade sira, tanbá motto komapañia hateten katak’’ami nia hakarak ita hotu moris saúdavél ho dignu.
Jornalista : Remigia Locateli
Editóra : Delfina Borges
