(Díli) Mudansa– Basilio ho modal dolar $5 hahú Suku sapatu iha tinan 2022 hodi kompleta nesesidade família uma-laran.
“Ha’u hahú suku sapatu ho modal dolar lima ($5) hodi sosa daun no kabas hahú prosesu suku sepatu iha tinan 2022 mai to’o agora,” Basilio da Costa Leite bá Jornálista estájiada Media Mudansa Segunda-feira (22/07/24)
Basilio akresenta,nia hahú suku sepatu ho modal ne’ebé mak kiik kada loron nia suku hodi hetan rendimentu ituan depende bá konsúmidór sira nia presiza.
“Ha’u hahú suku ho modal ne’ebé kiik, maibé ha’u kontinua suku kada loron hodi hetan osan ituan, maibé rendimentu ne’ebé ha’u hetan depende bá konsúmidór sira nia presiza dala-ruma mós loron ida la hetan,” Basilio sublina
Nia akresenta, Sepatu ne’ebé mak nia suku ho presu hanesan de’it hodi hetan osan oituan uza ba nesesidade moris nian.
“Sepatu ne’ebé ha’u suku ho presu ne’ebé mak hanesan hotu, sepatu par ho folin dollar rua ($2.00), no rendimentu sira ne’ebé mak ha’u hetan hodi responde bá nesesidade moris nian inklui selu kos kada fulan selu ho presu dollar lima-nulu ($50.00),”nia afirma
Basilio dehan,dezafiu ne’ebé nia hasoru mak hanesan dala-ruma suku sapatu la tuir konsúmidór nia hakarak no nia hetan hirus.
“Dezafius ne’ebé ha’u hasoru maka dala-ruma ema lori sapatu mai aat liu ona no suku hadía, maibé labele tanbá sapatu ne’e aat liu ona no nain obriga ha’u suku ladi’ak no hetan hirus hosi ema nain,maibé ita nafatin pasénsia de’it no prontu atu simu liafuan saída mak konsumidór sira ko’alia,”tenik Basilio
Basilio da Costa hateten nia senti triste la’os, ho servisu ne’ebé nia hala’o,maibé nia triste tanbá haree Joven barak mak abandona nia tempu hodi buka de’it problema.
“Ha’u sente triste ló ho Joven barak mak ne’ebé mak abandona sira nia tempu hodi buka halo problema deit,joven agora barak mak moe kaer sasan foer moe halo negósiu ki’ik hodi sustenta família,tanbá ne’e ha’u husu bá joven sira ita nuda’ar joven labele moe atu aprende buat ruma,sai joven luta bá moris di’ak labele moe,” Basilio sujere
Entertantu Basilio da Costa Leite ho idade rua-nulu resin-neen (26) hosi munisipiu Aileu, no iha kaben no oan nain rua, feto ida no mane ida no nia kaben mós servisu iha loja kompleta malu hodi selu oan nia eskola no uza ba nesesidade moris kada loron nia.
Estajiada : Nelia Pereira
Editóra : Delfina Bores
