(Díli) Mudansa-Tanba lahatene le’e ho asina surat iha tempu hanesan kampu traballu laiha, halo negosiante Madalena de Jesus fa’an etu nasi bungus hodi suporta nia oan ba eskola, uluk hanesan inan aman la eskola, hanesan inan tenke esforsu halo negosiu atu hetan osan hodi dudu oan sira ba eskola.
Negosiante Madelena de Jesus hatete, husik sira inan aman mak beik la hatene le’e no hakerek, maibé oan sira tenki matenek
“Ami inan aman mak beikona ne’e ami nia oan sira tenki matenek, ha’u tenki esforsu buka osan atu labarik sir abele selu bemo, tanba ne’e etu ne’ebé ha’u hodi husi uma mai raga ida kuandu hotu hetan dólar $35, etu ne’e fa’an ho folin $0.50 sentavuss no Dólar $1, etu ne’e ha’u fa’an la hotu lori ba fahe tiha ba estudante sira,” Esplika Madalena ba jornalista Média Mudansa iha Palasiu Governu, Kuarta 29/05/2024
Negosiante ne’e hatete, nia iha oan nain sia (9) ne’ebé mak eskola hotu no nain tolu (3) hakat ona ba iha Universidade nain tolu (3) iha pré-sekundaria, ida (1) iha sekundaria no ida (1) iha pré-primaria.
Nia relata tan katak osan ne’ebé nia uza hodi halo negosiu ne’e nia kredit, hodi halo negosiu atu sustenta moris no suporta oan sira nia eskola, no osan ne’ebé nia kredit ho dólar $200 no kada loron ida hatama fali dólar $9 sntavus $0.20.
“Defisil tebes ba ha’u nia moris, maibé ha’u hakarak dudu ha’u nia oan sira ba eskola nune’e aban-bainrua sira bele hetan futuru ne’ebé di’ak no moris diak,” haktuir nia
Nia dehan, oan nain tolu (3) ne’ebé tu’ur iha banku Pré-sekundaria bainhira sai eskola sempre ajuda nia ba fa’an li’is, tomate no ai-manas iha merkadu Taibesse.
Hahan ne’ebé mak nia fa’an la’os de’it nasi bungkus, maibé fan mós hahan lokal sira hanesan fehuk, ai-farina no hudi bungus iha plastik hodi tama sai ba iha kantor sira.
Inan feton ne’e husu ba estudante sira ba eskola tenki hanoin ba inan aman ne’ebé sustenta imi nia eskola, fokus ba eskola nune’e bele hadia imi nia moris iha futuru no sustenta rasik imi nia moris.
Jornalista : Ana Ribeiro/Estajiada
Editora : Sandi Belo
