(Díli) Mudansa-situasan moris ne’ebé mak obriga Jefrianos Cauna ho tinan 15 tenki fa’an manu-tolun da’an hodi suporta nia bin atu selu eskola, maibé nia hetan ameasa husi ema deskoñesidu sira ne’ebé mak foti manu-tolun han no la selu.
Jefrianos Cauna, idade 15 husi munisípiu Oe-cusse, suku Taiboko, aldeia Kulas, bainhira dada-lia ho jornalista Média Mudansa nia haktruir, moris inan aman la kompletu ne’e defisil lo’os, laran ne’e hakarak lo’os hetan edukasaun ne’ebé mak di’ak maibé susar lo’os.
“Moris inan aman la kompletu ne’e defisil lo’os, ita hakarak hetan edukasaun ne’ebé mak kualidade hanesan ho kolega sira seluk, maibé oportunidade ba ha’u tanba de’it situasaun moris ne’ebé obriga ha’u tenki buka osan hodi suporta fali ha’u nia bin ho alin sira nia eskola,” konta Jefrianos Cauna ba jornalista Média Mudansa, iha Largo Lecidere Díli, Kuarta 29/05/2024
Nia haktuir, situasaun moris ne’ebé obriga nia tenki foti desizaun hodi fa’an manu-tolun da’an hodi ajuda nia aman atu suporta fali nia bin no alin sira nia eskola, tanba nia bin hakat ona ba iha banku Sekundaria.
Nia afirma, manu-tolun ne’e nia fa’an nia ba sosa iha loja kada rack ida ho folin dolar $5, no nia fa’an fali manu-tolun ida ho folin sentavus 0.25, nune’e manu-tolun rack ida hotu hetan rendimentu dólar $7 sentavus 0.50.
“Ha’u remata pré-sekundaria iha tinan 2021, atu kontinua ba Sekundaria mak ha’u sai tiha tanba ha’u nia ama mate, entaun ha’u la bele kontinua tanba apa mesak no servisu hanesan agrikultor nune’e la iha forsa hodi suporta ami ba eskola,” konta nia
Nune’e nia dehan tan katak, dezafius ne’e nia hasoru mak bainhira nia fa’an manu-tolun iha ema deskoñesidu ne’ebé foti manu-tolun hodi han, no nia la bele halo asaun ruma atu hasoru ema ne’e tanba tauk ema baku nia.
Enkuantu Jefrianos Cauna iha esperansa hakarak kontinua eskola hanesan ho nia maluk sira seluk, maibé defisil ba nia tanba situasaun realidade moris mak la permite nia atu kontinua eskola, Jefrianos senti fuan moras bainhira hare’e nia maluk sira ba eskola, maibé nia só bele agradese de’it ba moris ne’ebé nia iha.
Estajiada :Teresa da Silva Gomes/ Nelia Pereira
Editora : Sandi Belo
