(Díli) Mudansa–Strategy and Engagement Lead Oxfam in Timor-Leste Adilson da Costa Junior infórma, Oxfam iha Timor-Leste servisu hamutuk ho Asosiasaun jornalista Timor-Leste AJTL hodi kolabora Jornalista sira ba kobertura iha asuntu mudansa klimatika ne’ebé fó impaktu ba Komunidade liu-liu ba ema vulnerável sira.
“Media Tour ne’ebé hala’o husi Asosiasaun jornalista Timor-Leste (AJTL) programa ida ne’e ita bolu dehan asaun ba justisa klimatika, Oxfam servisu hamutuk ho AJTL nu’udar parseiru estratejiku ida atu kontinua halo kobertura kona-ba asuntu mudansa klimatika nian impaktu ba komunidade sira liu-liu ba ema vulnerável feto ho ema defisiensia sira,” Dehan Strategy and Engagement Lead Oxfam in Timor-Leste Adilson da Costa Junior, ba Jornalista sira iha resintu Oxfam Díli Quarta, 29/05/2024
Nia hatete tan, iha loron Rua ou tolu liu ba servisu hamutuk ho AJTL molok halo Media Tour sei organiza workshop ida no konvida mós husi Lao Hamutuk fahe oituan esperesia no infórmasaun liga ho asuntu sira ne’ebé liga ba mudansa klimatika nian, alende ne’e mós konvida Permatil Kejuss, hanesan grupu movimentu husi sagadati ne’ebé durante hala’o servisu ba konservasaun Bee iha Laga.
“ Iha Media Tour ida ne’e sei la’o durante loron tolu nia laran, jornalista sei vizita Munisípiu Lautem Postu Administrativu Lore halo kobertura kona-ba asuntouoin-oin ne’ebé mak deskuti iha loron rua ne’ebé liga ho agrikultura, infrastrutura Estrada, produsaun agrikola no asuntu ambiente, ami hanoin katak programa Media Tour ida ne’e la’o ho di’ak hetan infórmasaun ne’ebé naton sai evidensia hodi kontinua infórma ba governu oinsá sira nia programa ou polítika no orsamentu liga ba asuntu ne’ebé sai prioridade situasaun mudansa klimatika ba komunidade nia moris ne’ebé iha área rural ne’eba,”Nia Afirma
Oxfam servisu hamutuk ho AJTL halo desde tinan rua liu ba hahú Media Tour hodi halo kobertura kona-ba asuntu joven agrikultura no konservasaun Bee, no Media Tour sira ne’e halo iha Munisípiu oin-oin hanesan Ermera no Oe-cusse ne’e kobertura ne’ebé jornalista sira halo uza hodi sai hanesan evidensia realidade ne’ebé komunidade nia moris iha área remotas.
“Ita iha diakusaun antes halo dezisaun kona-ba identifikasaun área kobertura ba Media Tour la’os akontese de’it iha Postu Lore, maibé ita mós halo Media Tour iha Oe-cusse, Baucau no mós Ermera ita deside área sira ne’e tanba ita hotu hatene katak kobertura ba Media asuntu sira iha área remotas ne’e susar tebes,”dehan nia
Nia infórma, impaktu husi mudansa klimatika ne’e estrada sira sai aat liu tan to’o agora no joven barak lakon vida tanba estrada ne’e rasik tinan rua ba kotuk estudante nain rua husi Lore sira halo viagem ba eskola depois fila kareta baku fila sira tenki hakotu sira nia vida, no mós komunidade barak afeita estrada ne’e rasik no labele lori produtu ba fa’an iha merkadu susar atu ba Saúde no feto tenke lakon nia vida tanba problema estrada
Iha sorin seluk Prezidenti AJTL Maria Jevonia Viera Fernandes hatutan tan katak, apresia tebes ba kolaborasaun ho Oxfam iha Timor Leste ne’ebé mak fó informasia, oinsá halo atu envolve asosiasaun jornalista Timor-Leste hodi halo advokasia kona-ba problema asuntu mudansa klimatika no oinsá mak halo advokasia liu tan ba iha justisa klimatika nian.
“AJTL kontinua fó espasu ba nia membru sira hakerek barak liu kona-ba lian kbi’it la’ek sira ne’ebé mak sente mudansa injustisa akontese ba sira nia moris liu-liu mudansa klimatika ne’ebé mak moris hanesan tos nain, sira feto vulnerável no ema defisíensia sira no ferik katuas sira ne’ebé mak hetan impaktu bo’ot husi krize mudansa klimatika ida ne’e,”dehan Prezidenti AJTL
Alende ne’e mós AJTL korajen ba nia membru sira hodi foti kobertura sira ne’ebé husi kbi’it la’ek sira atu nune’e bele ajuda governu atu tau importansia ba problema mudansa klimatika, no oinsá tau prioridade ba asuntu justisa klimatika atu ema vulnerável sira sente iha inpaktu mudansa klimatika bele hasoru sobrevivente adapta ba iha ne’eba no hadia estrada sira ne’ebé mak hetan eatragus barak liu.
“Ba ema ne’ebé tesi ai arbiru, espera katak jornalista sira bele iha reportagen sensivel ba asuntu sira ne’e, AJTL kontinua servisu hamutuk ho Oxfam hodi promove no luta ba iha justisa klimatika ita hatene katak justisa klimatika ne’ebé akontese, tanba ema povu ki’ik sira hetan afeita bo’ot liu ba iha problema mudansa klimatika nune’e ohin loron Media Tour AJTL ba dahuluk lansa liu projetu Oxfam apoiu husi Hongkong sei ba Munisípiu Lautem Postu Administrativu Lore,” haktuir nia
Prezidenti AJTL akresenta liu tan katak, asuntu sira ne’ebé durante ne’e jornalista sira seidauk halo kobertura ba iha problema sira hanesan, asessu bee, estrada no asuntu setór produtivu sira ne’ebé seidauk halo kobertura.
“AJTL fó espasu ida ne’e ba jornalista sira espera katak imi bele hetan informasaun interesante iha valór notísia no imi nia advokasia bele ajuda ita nia governu atu bele tau polítika no mós tau orasamentu ida hodi bele hadia tuir prekupasaun ne’ebé kbi’it la’ek sira ezize durante ne’e,” Hakotu Prezidenti AJTL
Jornalista : Gaudeçia Belo
Editora : Sandi Belo
