(Díli) Mudansa– Prezidente Assosiasaun Jornalista Timor-Lorosa’e (AJTL), Zevonia Vieira, hatete, Média Tour ne’e AJTL sei vizita joven produtivu sira iha Munísipiu Ermera atu promove setór produtivu sira ba diversifikasaun ekonomia iha Timor-Leste.
“Média Tour ida ne’e oinsá atu promove setór produtivu sira ba diversifika ekonomia iha Timor, entaun AJTL foti papél ida ne’e hodi jornalista sira ba vizita joven no grupu sira iha area rurál hodi foti sira nia istória susesu ka obstaklu ne’ebé mak sira hasoru, ida ne’e hanesan advokasia ida ba governu no parlamentu, oinsá mak sira bele foti solusaun, no oinsá mak governu kontinua apoiu joven sira ne’e hodi bele kontinua setór produtivu sira hodi diversifika ekonomia iha rai laran,” esplika Prezidente AJTL, Zevonia Vieira, iha Workshop Média Tour iha salaun Oxfam Hudi-laran, Díli 16/04/2024
Prezidente AJTL ne’e dehan, Governu atu tau prioridade ba setór produtivu sira, joven sira ne’ebé mak motiva sira nia an, sira la hein no sira hahú ona, oinsá mak governu bele tau importansia hodi fasilita sira.
Nia hatutan, Média advokasia ne’e importante los atu aproxima governu hodi prioritiza setór produtivu sira, nune’e governu bele hare’e saida mak joven sira halo ona ba rai ida ne’e, tanba ne’e AJTL sei ba Ermera hodi vizita joven produtivu sira iha setór Agrikultura, Turízmu no sesional works program.
Iha fatin hanesan, reprezentante Oxfam iha Timor-leste, Jude Perera, hatete, AJTL ho Oxfam halo kobertura iha area rurál sira, ida ne’e hanesan oportunidade ida di’ak tebes tanba kria espasu hodi halibur informasaun kona-ba foin sa’e sira nia kreatividade no sira nia investimentu ba iha setór agrikultura no setór produtivu sira seluk.
“Ida ne’e bele promove potensia no koñesementu ne’ebé joven iha hodi kontinua fahe informasaun sira ne’e husi baze hodi informa ba ukun nain sira bele hatene saida mak joven sira halo iha area rurál, potensia saida mak sira iha no saida mak governu presiza apoiu ba sira,” dehan reprezentante ne’e.
Entretantu, Diretór Diresaun Nasionál Empregu Estranjeiru (DNEE sigla português), João Correia Perreira, hatete, hanesan joven foin sa’e oinsá atu garante joven ho idade produtivu sira iha oportunidade ba servisu iha rai liur.
“Ha’u hanoin iha nasaun ida atu la’o ne’e la’ós ema ida ou rua de’it, foin sa’e hotu-hotu iha papél no oportunidade servisu iha area saida de’it atu dezenvolve asuntu saida mak importante ba joven sira,”tenik Diretór DNEE
Jornalista :Sandi Belo
Editór : Veraka
