(Díli) Mudansa– grupu Forum Joventude Defisiénsia Ermera (FJDE), presiza governu nia tulun atu apoiu sira nia aktividade halo produsaun kafe uut, suku no hortikultura sira, maibé Sentru Solidaridade sosiál munisípiu Ermera seidauk halo rezistu ba sira nia grupu.
Carlito Soares hanesan ema ho defisiénsia iha liman ho ain, maibé nia vontade la mate hodi envolve an iha grupu Fórum Joventude Difisiénsia Ermera (FJDE), husi grupu ne’e nia bele kuda modo, no buat seluk tan ne’eb´fó benefisiu ba nia.
“Grupu ne’e diak tanba ami iha ne’e bele fó benefisiu, kria grupu ne’e bele fanun ami nia maluk defisiénsia, tanba iha area remotas ne’e ema ladun to’o iha ne’ebá nune’e ami bele fahe infórmasuan ba sira iha atividade rurma sira mós bele mai partisipa no ida ne’e bele fó benefisiu ba ami hotu,”
Nia infórma, grupu ne’e iha kafe, to’os bele ba hortikultura ne’e bele kuda buat barak, batar no buat ne’ebé bele hanesan modo kol, brinjela, tomati ne’e kuda hotu, to’os ne’e hala hela maibé fórsa mak la to’o.
“Iha to’o ne’e hetan apoiu husi kolega iha grupu, ami iha grupu laran, produtu ami ba fa’an direita, ami durante ne’e hala’o hela kuda de’it maibé ami seidauk kalkula hira lo’os mak hetan, tanba ami fóin mak hahú, maibé esperea neneik bele jere ho di’ak, ami mós presiza hetan treinemantu atu hatene kuda lo’os ne’e oinsá, ami bain-bain fa’an ne’e konfórme bele hetan $500 ba batar, modo kada futun fa’an sentavus 0.50 to’o dólar 1, osan sira ne’e ami entrega fali ba grupu hodi jere fila fali grupu ne’e,” esplika Carlito Soares, ba jornalista Media Tour iha nia Rezidensia, Palemanu, Fatuquero, Ermera, 19/04/2024
Nune’e, servisu fó bazeia ba nia tipu defisiénsia, iha planu di’ak, buat barak bele mosu, sira keluarga karik oan sira bele ba eskola.
“Ha’u uluk involve iha grupu AHISAUN, no ami hanoin fila fali mai ami nia fatin halo buat ruma, husi grupu mak ita hetan buat oin-oin, tenke hanoin ba futuru, ita mós sei bele hela, labele fó kuitadu tanba ne’e matenek ne’e subar hela no liu husi grupu mak bele motiva no tutan liman ain ba defisiénsia sira, nune’e husi kafe ami hola material oin-oin, ba ami nia grupu,” nia haktuir.
Nune’e antes tama iha grupu, sira sosa ohin han hotu ona, la jere ka rai, maibé husi grupu ne’e sira bele rai osan no bele halo nia funan hodi hola fali kafe produs no ba faan ne’e diak tanba sira grupu ne’e bele hetan hotu.
“Ha’u iha tipu defisiénsia ain no liman, liman mak tohar tanba asidente ho kareta iha tinan 1998, ain mak defisiénsia, la uza aitongka, lao neneik maibé tauk mak rai kois bele monu, ho ain hanesan ne’e kuandu ba ta’a rai sukat de’it fórsa no labele obriga maibé ita mak sente de’it,”nia konta
Nune’e nia hatutan tan, Kuda modo ne’e atu panene ne’e konfórme ba tipu modo, se karik modo mutin bele fulan ida ou liu, ba kol bele fulan 3, maibé sira ladun kalkula tanba durante ne’e sira hala’o de’it, nune’e kuda mós aifarina, fehuk, talas hodi suporta fali.
Nia dehan, iha tempu uluk ema brak seidauk hetan informasaun klean kona-ba defisiénte, sira sempre bolu ho lia-fuan ne’e mak kasar, bolu liman aat ain aat.
“Uluk ne’e deskriminasaun, ba ami defisiénte sira ne’e iha, maibé agora ne’e sira respeita ona tantu ba defisiénsia ka transfeto no transmane, ami mós matan a’at no liman aat ne;e uluk ami rona, agora tanba infórmasaun fahe ona ne’e sira hatene ona,”dehan nia
Iha fatin hanesan, Koordenadór Forum Joventude Defisiénsia Ermera, Marcos de Deus Martins, hanesan mós ema ho defisiénte fíziku iha ain, nia dehan, objetivu harii grupu mak kapasita maluk joven defisiensia sira, kuaze organizasaun barak ko’alia advokasia maibé seidauk ko’alia atividade produtivu no atividade espesífiku ne’ebé ema ho defisiénsia sira halo, nune’e mak FDJE kria grupu atu bele liga ba ema ho defisiensia fíziku sira ho matan sira, tipu sira ne’e maske ho kondisaun diferente maibé ita hare’e katak balun sira bele halo atividade, ho objetivu ne’e mak ita bele hatene katak sira bele hola parte ba servisu agrikultura, tanba dalaruma ema hanoin katak ema defisiensia hein simu de’it.
Nia dehan tan, grupu ne’e hari’i iha 17 de setembru 2019 to’o oras ne’e, ho membru nain 5, defisiensia 3 no la ho defisiensia nain 2, iha grupu ne’e nia tipu atividade mak hanesan produsaun kafe, suku sira, no hortikultura.
“Ita iha ona kliente nain ba kafe ne’e hamutuk 12 ne’ebé rejistu ona FDJE ida ne’e mak distribui kafe kada tinan no ami iha planu ona iha fulan maiu ne’e hodi sosa produtu kafe iha aldeia sira ba komunidade sira ne’ebé sai tarjetu, sira nia kafe sira lansung tetu ho kulit tasak deit depois ida ne’e gasta osan hotu ona, entaun ita ba fali ho hanoin ida katak sira kuu kafe halo selesaun tuir treinamentu ita fo, sira kuu kafe rai tiha depois ita ba sosa fali,no presu kafe ita sosa ne’e hare’e ba folin kafe iha merkadu, kuandu NCBA sira fo kafe kulit tasak ne’e ho $0.35/kilo entaun ita ba fali $0.40/kilo para ita atu asegura sira labele fo lai, iha 2022 ita kolleta kafe ho kulit tasak 48kg,” esplika koordenadór FJDE, Marcos de Deus Martins
Nia konta, kafe ne’ebe sira sosa lori ba sira nia fatin produsaun, hodi produs ba kafe uut no sira liga ba merkadu hanesna iha Díli sira nia ekipa promosaun marketing ne’e mós ema ho defisiensia nain rua mak faan hela iha kapital Díli, defisiénsia matan no fíziku, no folin kafe uut ne’e bazeia ba criteria, hanesan 2 gram/$1.00, setengah kilogram/$5, 1kg/$10, bain-bain kafe ho kulit ne’e nia folin tun ba $2.50 kada kilo mas sira halo inovasaun fali ba folin sae.
Alienede husi atividade kafe ne’e sira mós involve feto ba atividade suku, no iha tempu pandemia ne’e sira servisu halo maskara, kartera, pasta no haruka ba Díli no komunidade sira. Nune’e ligadu ba kafe, ne’e bele uza ba tempu naruk fulan 9, kada fuan bele $80 ba kafe de’it, ba modo ne’e depende ba prosesu kolieta, depende ba kantaderu ne’e $15 to $20, liu fulan 3 bele $60 too $70, no sira kuda uza adubu organiku.
Uma ne’ebé MJDE uza hodi halo produsaun ba sira nia produtu, Marcos hetan hanesan ema ho defisiénsia, no iha tempu uluk kafe produs uza lesu ho alu, katak manual de’it hodi halo ba kafe uut, hafoin mak sira hetan osan sosa mesin, komputadór no seluk tan.
Iha sorin seluk, responsavél Raes Hadomi Timor-Oan (RHTO), ne’ebé hamriik iha munisípiu Ermera, total ema ho defisiensia iha munisipiu Ermera tuir sensus 2023 hamutuk 4421 husi feto no mane, nune’e mós tipu defisiensia hanesan defisiensia fíziku hamutuk lima, defisiénsia matan, defisiénsia komunikasaun, defisiensia mental nomós defisiensia intelektual, husi tipu hirak ne’e RHTO konbre hotu, tanba RHTO ne’e rasik, eziste iha 13 munisípiu inklui Raeoa.
“Husi numeru defisiensia ne’ebé mak eziste iha munisípiu Ermera ba oras ne’e balun hetan oan apoiu no balun seidauk, sira seidauk hetan apoiu ne’e, tanba balun hetan fallansu husi dokumentus sira hanesan kartaun eleitoral, nomós sertidaun rdtl, husi dukumentus hirak ne’e mak prejudika ema ho defisiensia atu hetan sira nia diretu,” dehan responsavél ne’e
Nia mós haktuir tan katak, RHTO nafatin halo koperasaun ne’ebé diak ho família sira hodi halo tratamentu ne’ebé dignu ba ema ho defisiensia, atu nune’e bele asesu ba diretu saida mak sira husu, hanesan kadera roda ka ai-tonka, maibé dala barak família sira mak la fó autorizasaun ka fó konfiansa ba ema ho defisiensia, husi ida ne’e, sai hanesan problema ida ba sira, tanba RHTO labele foti desizaun hodi lori ema ho defisiensia, sé lori ema ho defisiensia ba mak hetan dezastre ruma, ida ne’e sai hanesan problema bo’ot ida ba sira, tanba sira nia servisu atu fasilita de’it ema ho defisiensia hodi hetan sira nia diretu saida deit sira hakarak, parte família mak tenke akompaña sira nia oan iha momentu sira presiza, tanba RHTO, hanesan dalan ida atu fasilita de’it, maibé parte família mak tenki asegura sira nia oan karik sira husu apoiu ruma kona-ba kadera roka ka ai-tonka hodi fasilita sira iha momentu ba liur.
“Ami sempre halo advokasia ho inkluzaun defisiensia nomós asuntu ema ho defisiensia, husi advokasia ne’e rasik laos deit ba ema ho defisiensia, maibé ba hotu-hotu hanesan autoridade lokal, autoridade munisipiu, komunidade nomós eskola sira, atu nune’e partilla informasaun ba sira kona-ba oinsá hatene asuntu inkluzaun nomós asuntu ema ho defisiensia, atu nune’e ema hotu bele hatene uza liafuan ba ema ho defisiensia ne’e ho dignu, karik bolu ema ho defisiensia ho liafuan ne’ebé mak ita sente orgullu,” informa nia
Entretantu xefe suku Fatuquero, Leoncia Trindade, informa, nia knar atu fasilita grupu defisiente sira ne’ebé halao hela sira nia aktividade iha produsaun kafe no hortikultura sira.
“Ha’u nia knar mak atu fasilita grupu forum juventude difisiente ermera ne’ebe hala’o hela sira nia atividade hortikultura no produsaun café uut ne’ebe seidauk hetan tulun husi governu liu husi sentru solidariedade sosiál,” informa Xefe Suku ne’e
Nia salienta tan katak, nu’udar xefe suku nia pronto atu halo karta deklarasaun ba iha parte Sentru Solidaridade sosiál munisípiu Ermera bele rekoñese grupu FJDE
“Ha’u pronto atu halo deklarasaun no karte akompañamentu ba sira atu lori ba sentru solidariedade sosiál atu hetan rekoiñesimentu hodi tulun apoiu grupu difisienste FJDE,” afirma nia
Enkuantu hatan ba preokupasaun sira ne’e, Sentru Solidaridade sosiál munisípiu Ermera, Vito Caio Dos Santos, hatete, grupu defisiénte ne’ebé durante servisu hamutuk sentru Solidaridade Sosial Munisípiu Ermera mak Raes Hadomi Timor Oan (RHTO) mesak, maibé iha ona grupu balun ba aprezenta ona atu bele hetan apoiu husi Sentru Solidaridade Sosial Munisípiu Ermera maibé ne’e sei iha prosesu.
Nia dehan, Grupu Forum Defisiénte Juventude Ermera ne’ebé ho sira nia kreatividade halo negósiu faan kafé ezisite ona iha Munisípiu Ermera ne’e iha kuñesimentu ka lae.
“Grupu FDJE durante ne’e eziste kleur ona halo sira nia aktividade negósiu faan kafé, maibé sira foin mai rejista iha ne’e atu MSSI Munisípiu Ermera ba oin hare’e apoiu ba sira nia aktividade ne’e, Tanba ne’e ita nafatin halo sosializasaun ba iha postu administrativu sira iha Munisípiu to’o iha suku no aldeia para Autoridade komunitariu sira halo resensiamentu lista foun ba ema ho defisiénte iha Munisípiu Ermera inklui sira ne’ebé seidauk tama iha lista sentru Solidaridade Sosial Munisípiu Ermera,” nia hktuir
Grupu ema ho defisiénte sira halo aktividade negosiasaun, durante ne’e la fó apoiu ba sira, maibé apoiu pesoal ba ema ho vulneravel ba defisiénte, la’ós ba grupu defisiénte agrikultór sira, tanba iha matadalan ne’e orienta atu apoiu de’it ba sira ne’ebé vulneravel, entaun sira husi RHTO sira hanesan membru kontinua hetan apoiu sosial.
Nune’e nia dehan, grupu RHTO mesak mak durante ne’e sentru Solidaridade Sosial Munisípiu Ermera apoiu, tanba grupu seluk ne’e seidauk, ho razaun ida katak sira seidauk ba iha sentru Solidaridade Sosial Munisípiu Ermera nia fatin hodi aprezenta grupu sira ne’ebé eziste.
Enkuantu, totál ema ho defisiente ne’ebé sentru Solidaridade Sosial Munisípiu Ermera rejista hamutuk ema rihun rua resin mak hetan ona dadus, maibé la taka dalan ba maluk defisiénte sira seluk ne’ebé hela iha area rural.
Orsamentu jerál estadu tinan 2024 ne’e Governu liu husi Ministeriu Solidaridade Sosial no Inkluizaun (MSSI) aloka ba iha sentru Solidaridade Sosial Munisípiu Ermera ne’e la prevee, maibé sira iha Orsamentu jerál ne’e hamutuk $ 39 Mil, maibé apoiu ba aktividade sira hotu hanesan administrasaun ho rekursu humanu no selu funsionariu sira iha sentru Solidaridade Sosial Munisípiu Ermera ne’e rasik, maibé la inklui orsamentu kondisional ba iha idozu invalides sira. Orsamentu ne’e MSSI aloka ba iha sentru Solidaridade Sosial Munisípiu Ermera ne’e la sufisiente, tanba sira laiha orsamentu espesifiku atu kobre ba iha problema sosiál sira ne’ebé akontese iha area rural. Maibé da-daun iha ona biban tama ba tinan 2024 ne’e sira halo rasik planu atu depois prepara kondisaun sira ne’e hotu.
Jornalista : Sandi Belo
Editor : Veraka
