(Díli) Mudansa– Koordenadór Media Tour husi Asosiasaun Jornalista Timor Lorosa’e (AJTL) ho Oxfam iha Timor-Leste, Scos Vieira hatete, Ohin Asosiasaun Jornalista Timor Lorosa’e (AJTL), hala’o asaun karitativa ida iha Gleno, ba ho inan ferik ida ne’ebé mak defisiénsia, tanba ne’e jornalista halo apoiu umanitária, jornalista la’os halo advokasia de’it, pelumenus asaun ki’ik oan ne’ebé mak jornalista sira bele halo.
Tanba apoiu ida ne’e jornalista sira nian ideia rasik, bainhira sira halo vizita ema ho defisiénsia, sira iha hanoin katak tenke halo buat ruma, hodi bele apoiu, tanba jornalista sira hatene sira nian realidade ida ne’e.
“Ohin buat ki’ik oan ne’ebé mak ami lori, ita nia oan jornalista sira mak iha inisiativa hodi hakarak lori mai, labele hare’e ba iha nia kuantidadade barak ka oetuan, maibé hare’e ba ami nia domin, ita la’os utiliza ita nia lapijeira tutun hodi hamamar ema nian fuan, maibé ita rasik uza saida maka ita bele, tanba buat ki’ik oan ne’ebé ita halo, la’os hare’e husi nia kuantidade, maibé ida ne’e ita hare’e husi ita nia fuan hun ne’ebé mak ita bele fó,” Dehan Koordenadór Média Tour, Scos Vieira, iha Munisípiu Ermera, Postu Railaku, Suku Fatuquero, Aldeia Palemanu, hafoin halo asaun karidade ne’e, 19/04/2024
Nune’e mós, nia enkoraja ba maluk defisénsia ho família sira, atu iha forsa nafatin hodi hasoru laloran ne’e, tanba moris ema ida rasik maka tenke esforsu hodi hasoru laloran ne’e, jornalista sai hanesan sadere fatin ba ema lian laek sira maske mai ho lalais de’it.
“Ami sai ita bo’ot nia sadere fatin maske lalais de’it, lalika hanoin barak, ita hakarak kontente, kontente de’it, ita hakarak tanis tanis de’it, ita hakarak hirus, hirus de’it, só ida ne’e mak kompleta ita nia moris, forsa nafatin hodi hasoru laloran ne’e, tanba bero moris ita mak hean rasik to’o maromak fó kbi’it nafatin ba ita, ami la’os moris iha Gleno, maibé ami iha ne’e, ami nian fuan iha Gleno,” hatutan koordenadór ne’e.
Enkuantu jornalista sira ne’ebé mak hamahan-an iha Asosiasaun Jornalista Timor Lorosa’e (AJTL) tenke iha fuan bo’ot nafatin, no mantein nafatin ho sira ne’ebé maka kbi’it laek, sai lian ba sira lian laek, jornalista tenke sai sira nia sadere fatin, iha ne’ebé de’it.
Iha fatin hanesan, Roberto De Deus nu’udar laen husi inan defisénsia fíziku, Filomena Soares, hatete, agradese ba Maromak tanba domin husi jornalista sira mai to’o iha fatin ida ne’e hodi hare’e rasik kondisaun moris família ida ne’e nian, maske hala’o hela nia programa maibé ho fuan ne’ebé boot tebes, hodi mai to’o iha fatin ida ne’e hodi hare’e rasik ho matan tanba ema ne’e ho difisiénsia fíziku duni.
“Agradese ba Maromak tanba domin husi jornalista sira, maske hala’o hela nia programa maibé ho fuan ne’ebé bo’ot tebes, hodi mai to’o iha ami nia fatin ida ijoladu hanesan ne’e, hodi hare’e rasik ema ho defisiénsia ne’ebé mak hader ladiak, maibé ho nia esforsu an rasik nia bele hader hodi tu’ur, maibé ita bo’ot sira iha fuan bo’ot duni, maske mai husi fatin dodok maibé mai to’o iha ne’e minutu ida ka rua hodi hamutuk ho ema defisiénsia atu hamaluk ami,” haktuir Roberto de Deus
Nia mós dehan, sei reza nafatin “ba ita boot sira, halo nafatin ita bo’ot sira nia servisu ho di’ak no susesu nafatin, atu lori nafatin ita nia rai ida ne’e ba iha futuru ne’ebé di’ak liu tan”.
Diretór Timor-Leste Organic Fertilzer (TILOFE) Zaquiel Martins, hateten, sente kontente tebes servisu hamutuk ho AJTL no Oxfam iha Timor-Leste, Tanba AJTL hili ona TILOFE, EAMO, FJDE, ne’ebé mak durante ne’e servisu besik liu ba iha komunidade iha Ermera, no sai hanesan mata dalan ba jornalista sira oinsá mak lori sira atu bele deskobre problema sosial sira ne’ebé maka akontese iha Munisípiu Ermera.
Problema sosial ne’ebé mak jornalista sira atu foti maka liga ba iha agrikultura, Turízmu, ekonomia nomós problema sosial, iha suku Fatuquero ho prezensa jornalista konsegue deskobre problema ema ho defisiénsia, sira balun apoiu husi Governu maibé ladun másimu no balun apoiu husi Organizasaun maibé seidauk másimu, entaun prezensa jornalista sira bele lori tan sira nia lian ba iha autoridade relevantes sira.
“Ema ho defisiénsia labele sai de’it projeitu iha momentu balun, polítiku sira labele halo sira hanesan temporariu de’it, maibé ema ho defisiénsia no Lesbian Gay, Biseksual no Transjender (LGBT sigla Inglês) sira, ema ne’e sai planu permanente ne’ebé mak governu iha dever atu tau atensaun ba iha ne’ebá,” Tenik Zaquiel Martins.
Jornalista : Sandi Belo
Editór : Veraka
