(Ermera) Mudansa-Venáncio Abílio Soares, naran estimado “Bunda” hanesan foin sa’e mane ida ne’ebé mak badinas halo servisu feto nian iha uma laran hanesan tein, hare labarik inklui sai master of cerimony (MC) iha festa
“Loron ha’u halo de’it atividade uma laran nian hanesan tein, haré labarik no seluk tan, Além de tein iha uma, ha’u mós tein ba festa, ha’u transforma hahán tradisional sai hahan modernu hanesan transforma ai-farina ba dose bolus, ho badinas sira ne’e iha eventu ruma, ema sempre mai iha ne ou liga ba ha’u atu bele tein,” esplika foin sa’e ho naran estimadu “Bunda”
Nia hatutan tan, prosesu halo bolu modernu husi aifarina mak dan tiha aifarina, hasai mai, lori fatuk deut, hafoin tau ba fornu, no halo sai ba bolus, ai-farina sira ne’e nia ke’e iha sira nia toos rasik, dosi bolus ne’e nia sabor nebé diferente, nia la hetan osan ruma, maibé nia hakarak halo ida ne’e hodi ajuda deit família uma laran.
“Ha’u gosta ko’alia ho ema hotu hotu, ha’u moris mai, sempre halo buat ne’ebé ha’u gosta no ha’u nia família sira mós apoiu ha’u, iha ami nia bairu, wainhira iha acara ruma mak ha’u laiha ne’e, família sira sempre buka hau hodi partisípa, ha’u la konsegue eskola hotu tanba iha momentu ne’eba ha’u haré avó feto, no ha’u ho avó feto hela mesak iha Atsabe, apa ho família sira hotu mai hela iha Fatuquero, iha Railaku, entaun hakarak ka lakohi, ha’u tenke para eskola hodi haré ha’u nia avó feto, ha’u para eskola wainhira ha’u sei iha ensinu pre-sekundária,” hatutan nia
Nia dehan, maske nia gosta halo servisu ka atividade feto nian maibé nia nunka hetan deskriminasaun husi família sira.
“Ha’u nia família sira la deskrimina ha’u, tanba ha’u mak mane bo’ot, ne’ebé sira respeita lo”os ha’u, iha ami nia sosiedade ne’e, sira la halo diskriminasaun ba ha’u, no ha’u nia apa ho ama hadomi lo’os ha’u ho maun alin sira, dala ruma ha’u fila husi festa, apa ho ama sempre husu mai ha’u, no ha’u ko’alia jujur ba sira katak ha’u ba festa, ha’u dansa ho mane sira, no mane balun gosta ha’u,” dehan nia
Nia informa, bainhira iha festa ruma, ema barak gosta nia prezensa no nia gosta ajuda ema iha serimonia sira.
“Kuandu iha festa ruma, ema sempre gosta ha’u nia prezensa tanba ha’u ne’e mama dor, songe ten, no ha’u liga ema hotu, iha festa ruma ema sempre konvida ha’u ba tein no master of cerimony (MC), ha’u iha kolega Lesbian, Gay, Bisexual, Transjender(LGBT) ida ne’ebé mak sempre MC iha eventu ka serimonia sira, maibé se iha eventu ida nia mak MC entaun ha’u ba tein,” nia haktuir
Nia konta naran estimadu “Bunda” hasai husi nia Tia, bainhira nia ajuda fó partus nia Tia.
“Ha’u nia naran “Bunda” ne’e ha’u nia tia mak fó wainhira ha’u fó partus nia, wainhura ha’u nia subrinho moris, ha’u nia tia fó naran mai ha’u “Bunda”, Tia ne bolu ha’u, iha momentu ne’ebá, to’o ha’u nia komunidade tomak bolu ha’u ho naran ida ne’e, ema barak ne’ebé rona ida ne’e sira dúvida no sira hakarak hatene se los mak “Bunda”ne’e, no sira dehan katak “Bunda” ne mak mana ida mama dor no sempre iha dapur,” konta nia
Maske hanesan ne’e ema barak mak respeitu no tau atu goja ka bully nia.
“Iha bairu laran, maluk sira tauk atu goza ha’u ka bully ha’u tanba ha’u sempre dehan ba sira katak maske ha’u hanesan feto maibé ha’u la halo at ba ema ida nem viola ema seluk nia direitu, ha’u sempre ajuda ha’u nia família sira, ho hahalok sira ne, dala ruma halo mane balun gosta ha’u,” nia haktuir tan Bunda iha doben mane ida, maibé nia rasik seidauk iha hanoin atu forma família ho nia doben ne’e.
“Ha’u iha doben mane ida, maibé ha’u seidauk iha mehi atu forma família ho nia, dala ruma ami nia kolega sira mai husi fatin seluk dehan nune “Bunda, ami sira ne moris tuir mane lolos, tanba sá maka o moris fali hanesan ne’e? O sulan los ne’e? ha’u hatán ba sira katak moris ne’e ema ida-idak nian, importante ita tenke respeita malu, suporta malu, atu moris hanusa, hatais hanusa ne’e ema ida-idak nian, ha’u gosta liu hatais kalsa luan, wainhira ba festa sira sempre bolu ha’u atu ba dansa pembukaan ho mane sira, ha’u prontu de’it,” nia relata
Bunda mós envolve iha grupu suku roupa nian, hanesan hena meza, pontu cruz no despiadu, no nia rasik la gista uza vestidu.
“Ha’u envolve iha grupu suku nian, foin hari’i iha fulan ida ne’e, ami suku hena hanesan hena meza, pontu cruz no despiadu, bele suku hanesan ne’e maibé ha’u la uza vestidu, iha ami nia grupu ne’e ami hetan osan ami tabung de’it, to’o osan barak, no ami nia membru ne’ebé mak presiza, bele foti osan, ema ida bele foti to’o $ 50 dólar se ema sosa hena ne hotu, entaun bele simu osan bo’ot itoan, ami nia grupu ne kompostu husi ema 12, ha’u ho kolega Ken ami LGBT hotu mak iha inisiativa atu hari’i depois nia ba tiha Díli, ha’u mak lidera, ami hari’i tiha mak ami envolve mós feto nain 11, ha’u iha inisiativa atu hari’i grupu ne no konta ho ajuda husi ami nia chefe suku, nia mai enkoraja ha’u no ajuda atu kria grupu ne’e, grupu ne’e naran Marua, ha’u hanesan xefe no ha’u kontrola de’it,” haktuir nia
Pai husi Bunda, David Xavier Amaral, 1959, agricultor iha oan nain lima mane tolu feto rua
Iha fatin hanesan Aman husi “Bunda” David Xavier Amaral, konta, nia ian mane husi kiik to’o bo’o la tesi fu’uk, no nia hatudu ona hahalok hanesan feto husi ki’ik kedas.
“Ha’u servisu hanesan agrikultór, desde “Bunda” sei ki’ik to’o nia tinan lima nia fu’uk la tesi no nia hatudu hahalok hanesan feto husi kiik to’o bo’ot, nia iha alin mane nain rua ne’ebé mak forma ona família, “Bunda” de’it mak seidauk iha hanoin atu forma família tanba nia hakarak iha uma de’it ajuda família iha uma laran hanesan tein, fase bikan, fase roupa ha’u nian, nia ama nian no nia alin feto sira nian,” Konta aman husi Bunda
Aman husi “Bunda” hatutan tan katak, Babain vijiñu sira konvida nia ba foru meza, tein halo modo, no MC, nia mós envolve an iha grupu suku hena karik nia hetan osan ruma hodi nia ajuda fali nia alin mane sira nia oan nia la fó mai ami tanba ema selu nia osan ki’ik hanesan $20 dala ruma nia sosa mak sigaru ba nia apa.
Nu’udar aman David sempre suporta nia oan no husik nia oan livre hodi halo nia atividade no ajuda ema seluk, no sei hirus bainhira ema ruma bolu nia oan ho lia funa “panleru”, nia rasik la autoriza bunda atu forma família ho mane, tanba mane ba la halo servisu uma laran.
“Ha’u hanesan aman ida ha’u suporta de’it no husik nia livre hodi ba ajuda ema seluk ka halo nia servisu, ha’u la hirus nia, ha’u nafatin hadomi nia tanba “Bunda” mak oan mane bo’ot iha uma laran, iha ami nia jerasaun iha tempu uluk ha’u nia tiu ida mós halo nia hahalok hanesan feto entaun tiu ne’e la hola feto to ami halai ba ailaran iha tinan 1975 ema tiru mate nia, tanba ne’e ha’u rona ema ruma dehan ha’u nia oan panleru ne’e ha’u la gosta no hirus ema sira ne’e, karik iha futuru mak bunda hakarak forma família ne’e ha’u hatan maibé nia mak hola fali mane ne’e labele tanba mane ne’e mai la halo servisu uma laran karik nia hola feto ne’e di’ak liu tanba feto ne’e mai kaer servisu uma laran,” dehan David
Entretantu Xefe Suku Fatuquero, Leoncia Trindade, hatete iha ninia mandatu iha programa hitu ida mak LGBT, maibé nia parte seidauk rona komunidade ka joven sira ko’alia a’at LGBT sira.
“Iha ha’u nia mandatu ha’u iha programa hitu, ida maka LGBT no ha’u hatete ba sira katak laiha ema ida hasai lia-fuan ne’ebé ladi’ak ba LGBT, tanba saida mak sira halo ita bo’ot sira labele halo, maibé iha Fatuquero rasik durante ne’e ha’u laiha ema ida hasai lia fuan deskriminasaun ba ema ho defisiénsia no labele hasai lia fuan deskriminasaun ba LGBT, hanesa ita nia lia fuan kasar bolu feto la’o hanesan ne’e no mane la’o hanesan ne’e ida ne’e maka ha’u rona, ha’u bolu kedas nian no bolu nia inan aman mak tenke responsabilidade, tanba moris ne’e la’ós o maka halo, ne’ebé ba ha’u rona ema ida halo diskriminasaun ba ema ida nia vida moris ne’e la’ós o maka halo, ne’ebé o laiha diretu atu ko’alia nia,” dehan xefe suku Fatuquero
Xefe Suku ne’e hatutan, nia seidauk hatene kona-ba saida mak LGBT sira nia planu no saida mak sira halo, maibé se sira iha planu ruma nia prontu atu apoiu sira.
“LGBT sira nia atividade ha’u lahatene saida maka sira halo no saida maka sira nia planu, maibé bainhira mak sira iha planu ruma sira hakat mai sede Suku ou sira mensajen ha’u prontu apoiu sira kualkér oras no kualkér tempu ha’u prontu tanba sira iha maka ha’u iha, laiha sira ha’u la sai Xefe Suku,” tenik xefe suku Fatuquero
Jornalista : Sandi Belo
Editor : Veraka
