(Dili) Mudansa- Negosiantes merkadu Taibessi iha tipu rua mak hanesan Vendedóres Ambulante ka provizoriu no Vendedores permanente. Korente Poblema ne’ebé nunka kotu entre Vendedóres sira mak insufisiensia espasu asesivél. Balkaun ka flat ne’ebé governu oferese ba negosiante sira la sufisiente. Vendedóres Ambulante ne’ebé mós konsidera hanesan negosiante hosi munisípiu sira la iha fatin propriu atu faan sira nia produtu, tanba ne’e sira okupa fali aredores merkadu oin no okupa parajen kareta ho motor hodi faan sira nia sasan.
Situasaun ne’e, dahuluk, implika ba negosiante permanente sira nia rendimentu lor-loron tanba hola nain (kompradór) sira la asesu ba merkadu laran (Balkaun) hodi sosa vendedór permanente sira nia produtu maibé sira sosa de’it produtu hosi vendedóres ambulante tanba hetan satan hosi vendedóres ambulante iha merkadu oin, rezulta vendedóres ambulante sira hetan rendimentu di’ak liu kompara ho vendedóres permanente. Alende ida ne’e, Vededores permanente sira nia produtu sai aat no dodok tanba ema la sosa.
Daruak, Situasaun ne’e mós provoka vendedóres permante sira lori sira nia produtu sai mai faan iha merkadu oin, konsekuensia fó impaktu ba merkadu sai dezorganizadu. Bainhira situasaun ne’e akontese vendedores sira kontinua fó kulpa lesuk ba jestór merkadu, nune’e mós jestór sira, (viseversa) tanba la kumpri dekretu lei governu nú 33/2008.
Negosiante Juvita da Costa Pereira ne’ebé nu’udar mós portavós iha merkadu Taibessi, aprezenta tan problema seluk mak hanesan, haris fatin no sintina ne’ebé eziste iha merkadu taibessi hamutuk lima avaria hotu, la iha manutensaun, nune’e difikulta negosiante sira. Dala barak sintina no haris fatin sira iis demais liu tanba negosiante sira la iha konsiensia bainhira ba soe bee bo’ot ka kiik. Nia admite katak la’ós sintina sira ne’e de’it mak iis maibé merkadu ne’e rasik mós iis, impaktu hosi kompradór sira ne’e la asesu ba haris fatin, alternativu mak aproveita fatin arbiru, liu-liu iha tempu kalan.
“Tinan rua ona hariis fatin ne’e aat, foer de’it mak nakonu, ema bainhira tuur besik la tahan tanba iis no dois. Presija estadu tenke hadia, labele bolu mak merkadu nasionál maibé hanesan merkadu baibain, la dignu,” dehan negosiante Juvita da Costa Pereira
Problema seluk mak be’e moos la iha merkadu Taibesi, difikulta vendedores sira atu mantein ijene iha fatin refere, nune’e vendedores ida-idak hola inisiativa hodi sosa bee ba ida-idak nia nesesidade, hanesan, fase ropa, haris no seluk tan. Bainhira bee la iha difisíl tebes atu garante fatin saudavél, ema saudavél no produtu saudavél iha merkadu.
Iha sorin seluk, Tuir hakerek nain Antonio JC da Cunha, iha artigu ne’e publika iha Setembru 2014, hatete katak, iha kontrusaun final merekadu Taibessi rejista flat hamutuk 780 kompostu hosi Warung 20, roupa foun 181, obralan (OB) 244, kios 125 no produtu lokál 292. Sintina no haris fatin hamutuk 28. Kontrusaun ne’e prepara ba vendedores 780. Maibé hahu hosi 2014 to’o mai agora, vendedores kontinua aumenta kada tinan fó ona sinal atu hamosu iregularidade oi-oin iha merkadu Taibessi.
Partisipasaun Labarik Iha Atividade Negósiu Iha Merkadu Taibessi
Tuir livriñu 54 versaun simples, Direitu Labarik nian ne’ebé Media Mudansa asesu, define direitu fundamentál ha’at (4) mak, dahuluk direitu sobrevivensia, segundu direitu ba Dezenvolvimentu, terseiru direitu ba Protesaun no ikus liu direitu ba Partisipasaun. Direitu fundamentál ha’at ne’e seida’uk aplikavél ho loos no klaru. Entre numeru 54, iha numeru 32, ne’ebé ko’alia kona ba traballadór labarik, katak, labarik ida-idak iha direitu atu hetan protesaun hosi esplorasaun ekonomiku.
Hanesan mensiona iha paragrafu balun iha leten katak, vendedores ambulande faan iha terminál merkadu, indireitamente, konvida labarik sira ne’ebé deskonfia haruka hosi inan-aman ka vendedores ho otas bo’ot, mai hotu faan iha terminal, situasaun ne’e akontese kada loron. Kuaze faan produtu ho plastiku leba tun sae iha terminal ne’e maioria labarik. Iha tendensia komprador sira sosa lalais labarik sira nian tanba haree hosi sira nia idade ne’ebé ki’ik provoka sentimentu patia (care).
Haree hosi prespetiva ne’e, deskonfia katak bele iha esplorasaun ekonomiku iha merkadu Taibessi maibé Media Mudansa seidauk halo peskiza klean kona ba asuntu ne’e.
Negosiante Juvita preokupa tebes ho labarik sira ne’ebé faan sasan iha merkadu tanba difikulta negosiante permanente sira nia rendimentu. Nia mós dekonfia katak inan-aman no vendedor balun mak haruka labarik sira halo servisu ida ne’e.
“Husu ba governu atu la bele autoriza labarik sira faan sasan iha merkadu Taibessi,” sujere Juvita.
Ekipa Media Mudansa
Editór : Felisberto F. Da Costa
