Díli Mudansa– Natureza umanu komprova ona katak, bainhira ema ida hahu moris iha mundu ne’e, universu prega nia ho abilidade oi-oin, atu deskobre abilidade hirak ne’e depende ona ema ida-idak, abilidade hirak ne’e eziste atu ajuda ema hodi kontinua moris iha rai ne’e.
Basilio da Costa Lequi deskobre nia abilidade liuhosi suku sapatu (Sapateiru), nia transforma abilidade ne’e sai lukrutivu ba nia hodi sustenta moris, liuhosi nia atividade ne’e nia konsege rekolla rendimentu hamutuk $.300.00 resin iha fulan ida nia laran. Osan ne’e kompara ho salariu standard iha Timor-Leste ne’e dobru.
“Osan ne’ebé ha’u hetan husi suku sapatu ne’e hodi sustenta nesesidade uma laran no atende mós ha’u nia inan-aman nia nesesidade, la’ós ida ne’e de’it maibé selu mós kos iha Dili ho osan $ 50.00”, haktuir Basilio da Costa Lequi ba Média Mudansa iha Kaikoli Díli kuarta 07/02/2024.
Bainhira ema ida hadomi servisu ne’ebé nia halo la iha sentimentu triste maibé iha de’it mak kontente , la sente kole, motivadu, no kontinua servisu tanba iha nia matan posibilidade barak mak mosu. Dalaruma ema haree servisu ne’ebé ita halo la dignu maibé ba ita ne’e extraordinariu.
Situasaun ne’e akontese ba Basilio, nia sente kontente ho nia atividade, tanba ne’e nia dehan, servisu ne’ebé nia halo ne’e servisu ba an rasik, ba futuru nia sei kontinua dezenvolve atividade suku sapatu ne’e. nia mos dehan katak Tane liman ba inan-aman ne’e atividade la saudavél sei hosik ita moris fraku iha ita nia zona konfortu.
“Ha’u sente kontenti ho ha’u nia atividade suku sapatu ne’e rasik ho idade hanesan ne’e ha’u lakohi husu bebeik ba inan aman maibé ha’u kria rasik traballu ba ha’u nia an diak liu duke ema seluk mak fó traballu ba ha’u”, informa Basilio.
Nia hatutan, hahú halo atividade suku sapatu iha tinan 2023, kada loron nia hetan rendimentu dólar sanulu 10 no loron ne’ebé nia atende kliente hanesan estudante no ema ne’ebé funsionariu mak sempre iha loron sábadu no domingu.
Material ne’ebé nia presiza hodi suku sapatu mak hanesan, daun ho kabas ne’ebé nia sosa iha loja Timor diak no gastu la to dólar dólar 10, Signifika manan liu ho investimentu ne’ebé nia halo.
Kada loron nia hahu nia servisu hosi dadersan to’o rai nakaras hafoin nia fila ba uma, iha tempu meiudia nia la Fila ba uma maibé nia sosa de’it etu $ 0.50 sentavus ho bee kalsu kabun to’o rai nakarak mak nia foin fila uma.
Hosi domin ne’e iha ba ema hotu, nia rekomenda ba maluk sira ho idade ne’ebé sei bele atu halo servisu, labele hanoin de’it problema, kria servisu ba an rasik hanoin inan-aman ne’ebé idade avansadu ona, tanba buat hotu ne’e Maromak planu no kria ona presiza kakutak no pensamentu atu halo mudansa ba an rasik.
Basilio da Costa Lequi husi Munisípiu Aileu, Postu administrativu Aileu Vila, suku Liu-Rai no aldeia Coulau-Udu, oan husi Aman João Lequi no inan Teresa do Rego nia ho idade rua nulu resin lima (25) nu’udar kaben nain, iha oan nain rua no nia oan sira hela ho nia inan aman iha Aileu, nia oan dahuluk eskola iha Aileu no oan daruak seidauk eskola.
Estajiada : Marcelina da Silva Sarmento
Asistente Editór : Sandi Belo
