(Díli) Mudansa-Professores kontratadu Igildo Alves Tilman, hatete sira sei kontinua halo asaun greve hasoru Ministériu Edukasaun tanba hakarak halakon Injustisa no hetan solusaun ba professores sira nia problema kontratu.
“Assebisu ne’ebé ami halo fulan rua ami bazeia ba ami nia karta halo ba komandate sira katak ami halo ba fulan rua to’o hetan solusaun maka ami foin para, tanba ami nia hakarak ne’e iha solusaun se bainhira solusaun la iha ami kontinua nafatin hamrik, injustisa tenke lakon, tanba Ministra rasik seidauk hatun notifikasaun, ami professores la’os kriminozu ami professores 1.717 ne’e mate hotu mós la iha buat ida ami prontu fó a’an,” nia salienta.
Profesor Igildo, hatete, assebisu ne’ebé sira halo ne’e liga ho karta sei halo fulan rua nia laran enkuantu Ministra rasik seidauk resposta sira nia karta ne’ebé antes ne’e submete ona, se la iha solusaun maka sira sei halo asaun greve hasoru Ministériu Edukasaun .
“Ohin ami mai iha ne’e ami nia assuntu maka halo asebisu ami rona informasaun horseik katak Prezidente mai iha tuku 2 otl ne’e mak ami ho maluk professores sira mai iha ne’e atu halo asesibu ami hamrik iha ne’e la halo buat ida, tempu no situasaun orsida tuku 2 otl la iha solusaun ami sei halo asaun greve signifika ami foti kualker desizaun professor hotu-hotu,” Dehan Korlap Igildo Alves Tilman Segunda-Feira 19/02/24.
Iha fatin hanesan Porta-voz Munisípiu Bobonaro Elisiario soares Bareto mós hateten, karta petisaun ne’ebé sira hatama Ministra rasik halo manipulasaun hasoru sira, tanba ne’e nia husu Ministra labele kria istoria foun ba dekretu Lei ne’ebé tuir nia ideia.
“Ami nia karta ne’e mai tiha ona depois karta Provedoria dos Direitus Humanos e Justiҫa (sigla Português PDHJ) ne’e mós bosok ami mai iha ne’e halo konfirmasaun nia responde tiha ba PDHJ, maibé realidade ami to’o iha PDHJ ne’eba la iha, nia halo manipulasaun polÍtika vinativa ne’e mak nia implementa ida ne’e atu hatete ba Ministra katak atu kria istoria foun ba ninia ukun ida ne’e, dektretu Lei ne’ebé nia defende ami mós defende nia taka ho ninia ideia de’it la bazeia ba Lei ne’ebé hakerek momos iha ne’eba,” tenik Porta-Voz Elisiario Soares
Hatan ba preokupasaun hirak ne’e forum organizasaun Nasional Timor-Leste (FONGTIL) hamutuk ho Ministeriu Edukasaun hodi halo konferensia hatan ba ezijensia no informasaun ligadu ho assuntu refere, Porta-Voz Gabinete Minitériu Edukasaun Filipe Rodrigues Pereira hatete, Relasiona ho Ingresu Espesial ba eis-professores kontratadus tinan 2023 ne’ebé sai polémika iha públiku, dala ida tan Ministériu Edukasaun hakarak klarifika katak implementasaun Ingresu Espesial nu’udar polítika VIII Governu nian ne’ebé hatu’ur iha Dekretu-Lei Nú. 31/2023, 31 de Maiu.
Iha Dezembru tinan 2023, Ministériu Edukasaun halo ona ingresu espesial ba 4.600 ital professores kontratadus, tanba priense kriterius tuir artigu 11, Dekretu-Lei 31/2023.
“Infelizmente, eis-profesores kontratadus tinan 2023 hamutuk 1.499 labele tama ba ingresu espesial tanba la priense kriteriu sira la iha ultimu avaliasaun dezempeñu tinan 2021-2022 nian ne’ebé rejistadu iha Sistema Integradu Gestão Administrasaun Públika (SIGAP\ – CFP) relasiona ho prosesu ingresu espesial ba eis-profesores kontratadu sira, Ministériu Edukasaun mós bazeia ba Despaixu husi Komisaun Funsaun Públika (CFP) iha loron 14 fulan Novembru tinan 2023, Despaixu ho númeru 12433/2023/CFP, ne’ebé asina husi prezidente,” Nia salienta.
Nia akresenta, CFP Faustino Cardoso Gomes, iha despaixu refere remata katak, eis-profesores kontratadu sira tenki aprezenta avaliasaun ikus dezenpeñu husi tinan 2021- 2022 nian nu’udar mós kriteria ida atu tama ba ingresu espesial.
“Ami afirma dala ida tan katak, Ingresu Espesial ne’ebé ME halo ona iha fulan Dezembru tinan 2023 bazeia ba Dekretu-Lei nú.31/2023, 31 Maiu, ne’ebé VIII Governu Aprova no Reforsa mós husi despaixu prezidente Komisaun Funsaun Pùblika Faustino Cardoso Gomes iha loron 14 Fulan Novembru 2023, ho Despaixu 12433/2023/CFP, husi aspetu umanu no sosiál, Ministériu Edukasaun kumpriende tebes sentimentu, preokupasaun no opiniaun sira husi parte hotu ligadu ho ingresu espesial ba eis-profesores kontratradu sira, maibé Ministériu Edukasaun mós hakarak husu ba parte hotu, Labele Obriga Ministériu Edukasaun atu viola Lei ka regra sira iha rai doben Timor-Leste,”Tenik Porta Vos GME Felipe Rodrigues Pereira liu husi pres Konferensia .
Ministériu Edukasaun husu mós atu eis-dirijente Ministériu Edukasaun Juventude no Desportu (MEJD) nian, husi VIII Governu atu bele esplika diak no lolos kona-ba polítika VIII Governu nian ne’ebé hatu’ur iha Dekretu-Lei Nú. 31/2023 kona-ba Estatutu Kareira Dosente, liu-liu liga ho artigu 11 kona-ba lalaok tomak ingresu espesial ba profesores kontradu 2023 sira, tanba sá mak Dekretu-Lei 31/2023, 31 de Maiu la akomoda eis-profesores kontratadus 2023 ba ingresu espesial?
“Ha’u honoin ita ko’alia tiha ona kona-ba notifikasaun tanba kontratadu ida asina iha Abril 2023 ne’e ho MEJD ne’e kontratu ne’e rasik mak termina ho MEJD, iha kontratu ne’e mós la fó ba parte rua ne’e atu notifika malu bainhira kontratu ne’e termina, iha kontratu ne’e hateten de’it katak notifikasaun sira rua bele halo banhira serbisu lao hela mak hapara maibé ida kontratu mak termina ona, Ministériu Edukasaun la iha obrigasaun atu fó notifikasaun Kona-ba dialogu ne’e’ Ministra ho sekretáriu estadu hasoru sira dala hira ona no ohin Fongtil mós mai ho ideia ne’ebé hanesan maibé iha dialogu Ministra ho sekretáriu estadu eis kontratu professor 2023 ne’e maibé la hetan solusaun, tanba Ministériu Edukasaun bazeia ba dekretu lei nú. 31/2023 sira nia kontratu termina ona, dalan ne’ebé kontinua mak profesor ne’e liu husi bolsa kandidatura ba profesores,” Nia hakotu
Jornalista : Remigia Locateli & estajiada Marcelina Sarmento
Editóra : Sandi Belo
