Dili (Mudansa)-Tuir dadus hosi Institutu Nasional kombate HIV-SIDA hatudu katak totál kazu HIV- SIDA hamutuk 2050 hosi periodu 2003 to’o 2023, kapitál Dili okupa númeru aas kompara ho munisípiu sira seluk
“Tuir dadus Institutu kombate HIV-SIDA husi tinan 2003- 2023 fulan setembru hamutuk rihun rua lima nulu (2050) ema mate hamutuk atus haat (400),” dehan Prezidente INSIDA,I.P, Daniel Marçal bá jornalista sira iha salaun CNE Caicoli Dili sexta-feira 16/02/24.
Lia hirak ne’e hato’o hafoin realiza seminariu Nasionál hamutuk ho Ministeriu Ensinu Superior Siensia i Kultura (MESSK) hodi sensibíliza prevensaun transmisaun HIV-SIDA.
Nia salienta, HIV maka virus ida ne’ebé ataka sistema imunidade umanu hodi estraga abílidade atu kombate infesaun no moras, se la hetan tratamentu, HIV bele dezenvolve bá AIDS kondisaun sistema imunidade fraku tebes to’o isin sai vulneravél bá infesaun no moras seriú oi-oin.HIV ne’e hanesan virus ida ne’ebé da’et bá ema liu hosi seksu livre ka ransu livre bele mós liu hosi etapa bá etapa bele mós liu hosi uma laran.
“HIV ne’e hanesan virus ida ne’ebé da’et bá ema liu hosi relasaun seksuál liu hosi ran, inan bá oan, bele liu hosi daun ka siringa, HIV kuandu da’et bá ema se ita la hatene la halo kurativu, ou ita la hemu ai-moruk nia transforma bá AIDS ka SIDA maka halo ema hetan moras barak’’ nia esplika
Prezidente ne’e haktuir, kabe ho ai-moruk espesiál ne’ebé atu kura moras ka virus refere seidauk iha, maibé atu garante imunidade forsa iha sira mós koko atu fó informasaun masimu ba komúnidade sosiédade sira hodi bele reduz númeru HIV-SIDA iha rai laran.
“Ai-moruk atu kura la iha moras refere, maske ai-moruk ne’e só mantein de’it ema nia imunidade la hamate virus ne’e iha ema nia isin, ne’ebé ema kuandu hetan virus ne’e bele hemu ai-moruk mantein bá ema nia saúde estavél maibé la halo mate virus ne’e iha ema nia isin, “Tenik nia.
Nia esplika planu ne’ebé sei halo hodi hamenus númeru bá virus refere maka kampaña, seminariu hanesan ohin, koália iha Radiu, Televizaun, Jornál sei uza meius hotu atu fasílita entidade hotu.
“Númeru HIV iha Timor-Leste labarik hosi tinan lima (5) hamutuk 57 ho púrsentu tolu (3%), labarik idade tinan neen (6) to sanulu resin haat (14) hamutuk (18) ho púrsentu %1, labarik idade sanulu resin lima to’o ruanulu resin haat hamutuk (572) ho púrsentu %27, idade ruanulu resin lima to’o haat nulu resin haat hamutuk (1205) ho púrsentu %57.”Nia salienta.
Kazu HIV hamutuk 2050, hosi Munisipiu Dili 1541, Bobonaro 113, Covalima 95, Oe-Cusse 65, Baucau 53, Ermera 37, Ainaro 36, Likisa 23, Manatuto 20, Manufahi 18, Aileu 17, Lautem 16, Viqueque 16.
Jornalista : Remigia Locateli
Editor : Delfina Borges
