Dili) Mudansa–Governu Timor-Leste liu-hosi Sekretáriu Estadu Fórmasaun Profisionál no Empregu (SEFÓPE) liberta tan Traballadór Timor-oan nain 71 atu ba servisu iha nasaun Korea do Súl.
“Ohin ita halo serimonia deklarasaun ne’e, governu Timor-Leste liu-hosi Sekretáriu Estadu Fórmasaun Profisionál no Empregu (SEFÓPE) hamutuk ho Traballadór akompaña ho sira nia família asina deklarasaun molok Traballadór sira ba servisu iha Korea do Súl no Traballadór sira ne’ebé mak ohin asina deklarasaun ne’e hamutuk 71, kompostu hosi fábrika hamutuk 11 Peskas 41 no reentry 19 no Traballadór sira ne’e sei aranka iha Domingo,” Dehan SEFÓPE Rogério Araújo Mendonça ba jornalista sira iha Timor Lodge Dili Sesta, 16/02/2024
Governante ne’e akresenta, Serimonia ida ne’e sai ona hanesan tradisaun ou abitua ida atu estadu fó mensajen ba Traballadór sira nu’udar oan-alin no família hodi hala’o sira nia servisu iha nasaun Korea no hala’o ho resposabilidade tanba servisu iha Korea tinan 4 la’ós loron 4 ou semana 4.
“Atu ba servisu iha Korea tenke disiplina iha servisu, liu-liu servisu iha tasi laran ne’e la’ós servisu hanesan iha rai maran maibé fatin risku ho nune’e bainhira ita bo’ot sira ba fatin ne’ebé risku di’ak liu labele komete iregularidade tanba servisu iha tasi laran ne’e risku,” Nia afirma
Nia infórma, kada tinan traballadór sira molok atu ba iha nasaun Australia, Korea, no Japan SEFÓPE sempre realiza serimonia despedida, nia objetivu hodi fó mensajen ba traballadór sira hodi ba servisu iha ema nia rai, atu nune’e sira servisu tuir regras ou tuir lei nasaun ne’ebé mak simu Traballadór sira.
“Mensajen parte governu no família entidade hotu hakarak katak, ita nia Traballadór labele sai hosi sistema se ita nia Traballadór sai hosi sistema mak hetan asidente ruma responsabiliza ne’e família mak resposabiliza ba ida ne’e, Se mak tuir regra prosedimentu estadu rua ne’e estabelese ona akordu tanba ne’e, se ita hetan problema ruma iha fatin servisu família sei hetan benifisiu durante sira servisu,” klarifika nia
Taballadór sira labele sai hosi sistema ilegal razaun tanba pasaporte Traballadór bainhira mate, parte SEFÓPE servisu hamutuk ho ministeiru justisa hodi buka solusaun liu-hosi haruka ekipa tékniku sira hodi halo preparasaun prodúz pasaporte ne’ebé mate, bele renova fali atu nune’e sira bele hetan oportunidade kontratu fóun,” Hakotu SEFÓPE
Iha sorin seluk Traballadór Vitor Tilman apresia tebes ho governu Timor-leste ne’ebé koopera ho governu Korea fó biban ba joven sira kore an iha dezempregu liu-hosi fó biban ba servisu iha ema nia rai hodi hadia moris família nian.
“Hanesan joven orgullu tebes tanba prosesu lubuk ida ha’u ultra pasa hahú hosi EPS topik mai to’o iha skill test no finalmente ha’u bele hatais kaus ida ne’e kaus ne’e bele hatais iha merkadu maibé hatais hamrik iha Airoportu ne’e difisíl,” Nia hateten
Traballadór ne’e deklara ba públika katak durante ne’e nia aprende makaas hosi profesór Cornelio nia kanál Youtube finalmente tranallador ne’e bele pasa iha ezame ESP topik no ohin loron bele hamrik iha momentu ida ne’e no Traballadór ne’e mós husu ba joven sira kontinua aprende lian Korea.
“Ha’u ba servisu iha Korea bainhira ha’u hetan osan ha’u investe ba negosiu tanba ne’e importante para hetan rendimentu sustenta família no mós ha’u nia alin sira ne’ebé mak sei tuir hela ha’u, ha’u bele haree fali nia eskola,” Nia relata
Entertantu Traballadór ne’e mós kompromete katak sei la ses hosi sistema tanba halai ses hosi sistema perigu, problema bo’ot , ilegal signifika bainhira hetan asidente ruma Traballadór rasik mak responsabiliza la’ós governu tanba ne’e, nia sei la sai hosi sistema.
Jornalista: Gaudencia Belo
Editór : Veraka
