(Dili) Mudansa- sai oan hosi família ida, iha tendensia makaas atu kria dependensia ba inan-aman maske idade joven hahu to’o dadaun, tendensia ne’e akontese tanba natureza moris família nian ne’ebé refleta ba toleransia responsabilidade inan-aman nian ba oan hahu hosi nia ki’ik to’o nia bo’ot. Toleransia ne’e kria defisiensia ba espiritu auto-dependensia ne’ebé orienta oan ida iha abitua tane liman ba inan-aman.
Jonio ne’ebé moris husi família simples, oan daruak hosi maun-alin nain hitu (7), nia aman naran José Barbosa no inan naran Amelia da Silva, nia konsiente abitu dependensia ne’e, bainhira nia atinje tinan rua nulu resin hitu (27). Nia komesa moe bainhira tane liman ba Inan-aman. Sentimentu ne’e salva nia hosi nia zona konfortu dependensia ba zona auto-dependensia.
Iha tinan 2019, sai tinan transformasaun totál ba Jonio, nia komesa enkaixa an iha vida negósiu. Negósiu la’ós opsaun maibé ne’e reprezenta ezijensia moris no alevia hosi dependensia ba inan-aman ka tane liman. “halo negósiu ne’e la’ós ema ida mak obriga maibé nesesidade moris mak ezije,” Dehan Negosiante Jonio Barbosa ba Jornalista Media Mudansa iha Merkadu Taibesi,26/01/24.
Joven naturál munisípu Manufahi, postu administrativu Turiskai ne’e hatete, moris iha zona konfortu ne’e fasíl maibé sei la oferese dolar ruma tanba ne’e desizaun ne’ebé nia foti konsege liberta nia loke dalan ba sustentabilidade família uma laran. “atu hetan osan la’ós tur- tur de’it osan iha maibé esforsu an mak foin bele hetan osan,” klarifika nia.
Dalan moris ne’ebé dadaun ne’e salva ona nia, hahu dahuluk hosi negosiu ki’ik faan modo. Nia hahu ho osan dolar rua nolu ($. 20.00), iha momentu ne’eba kedan, nia la tane liman tan maske dala ruma la sufisienta atu sobrevive maibé nia maneja ho di’ak to’o nia sustenta fali família uma laran. Liafuan xave ne’ebé ajuda nia durante prosesu mak se ema bele kaer osan ita mós bele kaer osan. Duke husu inan-aman bei-beik faan modo di’ak liu.
Nia haktuir modo ne’ebé nia faan, loron ida nia konsege hetan rendimentu hamutuk dolar atus ida ($.100.00), ho redimentu ne’ebé di’ak halo nia kontinua hamriik metin hodi faan modo.
“Rendimentu ne’ebé ha’u hetan husi modo ne’ebé ha’u faan ho montante $. 100.00, no osan sira ne’e, uza ba nesesidade uma laran no ajuda mós inan-aman no osan balu rai hodi sosa modo ba faan fali no ha’u nia esperansa ba future hakarak mantein ho negósiu ne’ebé mak agora ha’u hala’o ne’e.”Nia hakotu.
Jornalista : Esperansa Gomes/Estajiada: Marcelina da Silva Sarmento
Editor: Delfina Borges
